I Got Married With A Girl!!

- Chapter 2 -

Unicode

တရွေ့ရွေ့သွားနေသော ကားလေးထဲတွင် ငြိမ်သက်စွာဖြင့် အတွေးများနေသော အမျိုးသမီးတစ်ဦးရှိလေသည်။ ထိုအမျိုးသမီးကတော့ တခြားသူမဟုတ်။ နှောင်းရိပ်ငြိမ်ပါပင်။

' ပါပါးတို့ အတင်းမတိုက်တွန်းပါဘူး။ ဒါပေမဲ့ သခင်လေး စော နဲ့ သွားတွေ့စေချင်တယ်။ နှစ်ဦးနှစ်ဖက် ပြောဆိုပြီးလို့မှ အဆင်မပြေရင် ဒီမင်္ဂလာပွဲကို မလုပ်လည်း ဖြစ်တယ် '

လက်ထဲမှ ‌ပါပါးရေးပေးလိုက်တဲ့ မှတ်စုစာရွက် အတိုလေးကိုကြည့်ရင်း သက်ပြင်းချမိသည်။

" စောသင်္ခနွယ်.... "

တီးတိုးရေရွတ်လိုက်မိတဲ့ နာမည်ဟာ သူတစ်ခါလေးမှတောင် မမြင်ဖူးဘဲ လက်ထပ်ဖို့ဖြစ်နေတဲ့သူ။ တကယ်ပဲ ဘာတွေဆက်ဖြစ်ဦးမှာလဲ။ နှောင်း စိတ်တွေလေးလံလာမိသည်။

" အိမ်ရောက်ပြီ မမ "

တစ်ထပ်တိုက်ကလေး တစ်လုံးရှေ့မှာ ရပ်လိုက်ပြီးနောက် ပြောလာသည့် နိုးနိုးစကားကြောင့် နှောင်း စိတ်ကို ပြန်ထိန်းလိုက်ကာ ကားထဲမှ ဆင်းလိုက်သည်။

" ကားကို ဖြည်းဖြည်းမောင်းနော် ၊ ဂရုစိုက်ပြီး ပြန်ဦး "

" ဟုတ်ကဲ့ မမ "

နိုးနိုးကို နှုတ်ဆက်ပြီးနောက် အိတ်ထဲမှ သော့ကို ထုတ်ကာ ခြံတံခါးကိုဖွင့်လိုက်သည်။ ခပ်မြင့်မြင့် တစ်ထပ်တိုက်လေးဟာ နှောင်း စိတ်တိုင်းကျ ဆောက်ထားသည်ဆိုရင်လည်း မမှား။ ခပ်ကျယ်ကျယ်ခြံလေးထဲမှာ ပန်းလေးတွေ ဟိုတစ်စဒီတစ်စစိုက်ထားပြီး ဒန်းလေးတစ်ခုနှင့် သစ်သားစားပွဲလေး ၊ ခုံလေးနှစ်လုံးရှိသည်။ နောက်ပြီး မလှမ်းမကားမှာ ရပ်ထားသည့် အဖြူရောင် ကားလေး။

မှောင်ရီပျိုးစဖြစ်လို့ အနောက်နေရောင် ဖြာကျနေပုံဟာ ကျေနပ်စရာကောင်းသည်။ ခြံတံခါးကို ပြန်ပိတ်ကာ အိမ်သော့ကို ဖွင့်ရင်း အိမ်ထဲသို့ ဝင်လိုက်သည်။ မီးခလုတ်ကို ဖွင့်လိုက်တော့ လင်းချင်းလာသည့် ဧည့်ခန်း။
ပခုံးတွင် လွယ်ထားသည့် အိတ်ကို ပစ်ချကာ ဆိုဖာပေါ်ကို ခြေပစ်လက်ပစ် လှဲလိုက်‌တော့သည်။

" မနက်ဖြန်...ည ၇နာရီ..တဲ့လား။ တွေ့ဖို့ချိန်းတဲ့အချိန်က ဘာလို့ ညဘက်လဲ "