I Got Married With A Girl!!

- Chapter 16 -

Unicode

* ဒေါက် ဒေါက် ဒေါက် *

တံခါးခေါက်သံကြားတော့ နိုးနိုး အပြေးလေးသွားဖွင့်လိုက်သည်။ တံခါးဖွင့်တော့ မြင်လိုက်ရသည်က စောသင်္ခနွယ်မဟုတ်။ အဲလစ်ဆိုလား အဲလက်ဆိုလား အဲ့လူ။ ‌ဘာစကားမှ မပြောဘဲ နိုးနိုးကို ကြောင်စီစီကြည့်နေတဲ့ အဲ့လူရဲ့ အကြည့်တွေက နိုးနိုးရဲ့ ပေါ်လွင်နေတဲ့ ပခုံးသားပေါ်မှာ။

" ရှင် ဘာကြည့်တာလဲ! "

" နိုးနိုး ဘာဖြစ်လို့လဲ "

နိုးနိုးရဲ့ အသံက ကျယ်သွားသည် ထင်ပါရဲ့။ မမက အနားကို လျှောက်လာရင်း မေးတော့တယ်။

" ဒီလူ နိုးနိုးရဲ့ ပခုံးကို ပြူးကြည့်နေတာ "

လက်ညှိုးထိုးပြီး ပြောတော့ မမက နိုးနိုးကို ကျော်ကာ ကြည့်နေသည်။

" အဲလစ်? ဘာကိစ္စရှိလို့လဲ "

မမ မေးလိုက်တော့မှ အဲလစ်ဆိုတဲ့သူက သတိပြန်ဝင်လာသလိုလိုဖြင့်

" နေ့လယ်စာစားဖို့ လာခေါ်တာပါ မမလေး "

နိုးနိုးကို အရေးမလုပ်ဘဲ မမကိုသာ ပြန်ဖြေနေသည့် အရှေ့ကလူရဲ့ မျက်နှာအား ဆွဲဖြဲလိုက်ချင်သည်။ ပိုင်စိုးပိုင်နင်းနဲ့ သူများ ပခုံးကိုလည်း ကြည့်သေး မတောင်းပန်တဲ့အပြင် ဒင်းက လူကို ရှိတယ်လို့တောင် မထင်သည့်ပုံ။

" ဒီမယ် ကိုဆံနီ "

နိုးနိုးရဲ့ ပြောသံကိုလည်း အဖက်ပင်မလုပ် ပြူးတူးကြောင်တောင်ဖြင့် ရပ်နေသည့် ထိုလူအား အတော်လေးကို စိတ်တိုမိသွားသည်။

" ရှင်ကို ခေါ်နေတာလေ မကြားဘူးလား "

ထိုသို့ပြောမှ ကိုယ့်ကိုကိုယ် လက်ညှိုးပြန်ထိုးနေသည့် ပြန်ဖြေလာသည့် အဲ့လူ။

" ကျွန်တော့်ကို ပြောတာလား "

" ဟုတ်တယ် ၊ ရှင့်ကိုခေါ်တာလေ။ ဒီမှာ ဆံပင်က နီကြောင်ကြောင်နဲ့ လူဆိုလို့ ရှင်ပဲရှိတာ "

နိုးနိုးပြောတော့ အဲလစ်ကျ သူ့ဆံပင်သူကိုင်ကြည့်နေသည်။ နီရဲနေတာမဟုတ်သော်ငြား အနည်းငယ်တော့ အနီရောင် ပေါက်သလိုလိုရှိသည်။ အဲ့တာကလည်း ခပ်ဖျော့ဖျော့ရယ်ပါ။