ازيكم عاملين إيه
جاهزين؟؟
يلا نبدأ
ومع إصراره خاف الرجل من أن يتجاهله فيغضب اللواء لذلك قرر أن يخبره وله الخيرة إذا أراد أن يقابله أم لا، وبالفعل أدخل فايز غرفة استقبال الضيوف ثم ذهب كي يخبر اللواء.
وعقب مرور دقائق من الوقت، دخل السيد الغرفة وهو يرتدي ملابس المنزل والتي كانت أنيقة تليق به، قام له فايز ثم صافحه. سمح له السيد أن يجلس مجددًا وجلس هو الآخر وقال:
_ إيه بقى يا ترى الموضوع المهم جدا اللي عايزني فيه يا دكتور فايز؟
_ الحقيقة يا فندم أنا كنت جاي اتكلم بخصوص منة
_ مالها منة؟
_ منة مريضة بالشيزوفيرينيا وأنا كنت الدكتور المعالج ليها لفترة طويلة ولما يئست والسبب كان والدها سبت الحالة
_ ماله والدها؟
تنهد ورد:
_ كلنا اتخدعنا فيه، دكتور مصطفى حد مش شريف... هو اللي ضيع بنته وهو السبب في كل اللي حصلها لأنه سلبي ودايما عنده شعور بالنقص
_ إيه اللي حصل بالظبط علشان تقول كده؟
_ أنا هقول اللي شفته بنفسي، شفت قد إيه هو سلبي مع بنته وجابب بس يريح دماغه وتصرفه كان معاها غلط تماما رغم إني حذرته كتير وقولتله ارجعلي في كل حاجة بس مفيش فايدة
_ وبعدين؟
سكت برهة وأخرج له الورقة الخاصة بمنة ومد يده كي يعطيها له وهو يقول:
_ دي ورقة سبتها منة قبل ما تعمل محاولة انتحار وهي بالفعل عملتها
أخذ منه الورقة وهو يصيح في صدمة:
_ انتحرت! انتحرت ازاي يعني؟ إيه الكلام ده؟ فين هي وازاي محدش قالي؟
_ اقرأ بس
بالفعل أخذ يقرأ مضمون الرسالة وهو يشعر بالحزن والأسف على ما عانته وتعرضت له ابنة أخته وحدها، كان يتماسك حتى لا تظهر دموعه أمام فايز ولما وقع بصره على جملة ( والدي قاتل والدتي) جحظت عيناه تكاد تخرج من محجريها أثر الصدمة ونظر إلى فايز في سرعة وصاح:
_ قتل أختي! قتلها ازاي؟ الطب الشرعي مأكد إن صفا ماتت في حادث سير أثناء رجوعها من المستشفى!
_ وهي كانت ليه؟
_ هو قالي تعبت شوية وراح وداها المستشفى
_ معنديش تفاصيل منة هي اللي عارفة كل حاجة أنا ده بس اللي وصلي، إنما أنا معرفش هي تعرف إيه وايه اللي خلاها تقول كده، وجيت لحضرتك لاني خفت يهرب من ساعة ما بنته كانت في المستشفى ولا مرة زارها
نهض وصاح في غضب:
_ قوم وديني مكان منة
نهض الآخر وتحدث في هدوء:
_ اهدى بس يا فندم، منة في وضع خطير وأكيد إن سمح لها الدكتور تتكلم مش هينفع نكلمها أول ما تفوق كده في الموضوع ده؛ بقولك مريضة وتعبانة!
أطرق برهة يفكر في الأمر ثم قال:
_ خلاص يبقى نروح للطبيب الشرعي
_ ما يمكن يا فندم ماتت في حادث سير فعلا بس هو اللي قطع لها الفراميل مثلا!
_ صح... أنت صح هو أنا لسه هقعد أدور على الطبيب الشرعي! أنا هأمر بالقبض على مصطفى حالا لحد أما منة تصحى وتقول كل حاجة عنه وتوضح إيه المقصود بالكلام ده، وقبل ما انسى هات رقمك أكيد هحتاجه، وياريت تخليك مع منة لحد أما اخلص من موضوع مصطفى ده الأول
أنت تقرأ
الجعة يشوبها الأخلاق
Misterio / Suspensoو كان خطئه الوحيد طيبة قلبه وعفته، الدنيا ليست المكان الذي يستحقه. الحقارة لم تعرف طريقه قط، والشك لم يطرق بابه حتى. فلما فعلوا ذلك به؟ ومن المسؤول عن الحال الذي وصل إليه ؟ هل تلك التي ستغير حياته السبب في ذلك؟ أم هي السبب في تدميرها؟ بالطبع الجمي...
