မင်းသားအပေါင်းလုပ်ကြံခံရတုန်းက နန်းတွင်းထဲကအမတ်တွေကိုတရားဝင်သိခွင့်မပေးခဲ့သည့် မိဖုရားကြီးသည် သူ့သားငယ်သေဆုံးသည့်သတင်းကိုတော့ ညီလာခံမှာတင်ကြေညာခဲ့သည်။ တစ်ဆက်တည်း သူ့သားတော်နဲ့မင်းသားခြောက်ကိုသတ်သူမှာ မင်းသားရှစ်ဖြစ်ပြီးနိုင်ငံတော်ပုန်ကန်သည်ဟူသောခေါင်းစဥ်အောက်ကိုပါတစ်ခါထဲဆွဲသွင်း၏။ ညီလာခံမှာလည်း သူမလူတွေပဲမို့ အားလုံးကသူမခြေ သူမလက်ဖြစ်နေလေတော့..မင်းသားရှစ်ကို သုတ်သင်ဖို့ နန်းတွင်းတပ်တော်ကိုပါသူမစေလွှတ်လေသည်။
ငါ့သားတော်ကိုထိပါးခဲ့တဲ့မှန်သမျှကို အလုံးစုံခြေမွှပစ်မယ်။
အရှင်ကလည်းအခုဆို ပြန်လည်ဆိုးဝါးလာပြန်တဲ့ရောဂါကြောင့် နတ်ရွာစံလုနီးနီးဖြစ်နေလေတော့ နန်းတွင်းမှာအခြေအနေတွေက ကသောင်းကနင်း။ မင်းသားရှစ်အပြစ်မပြုမှန်း သိသည့်အမတ်တွေရှိပေမဲ့ မိဖုရားကြီးကိုပြန်အာမခံရဲ။ အရှင်ကနတ်ရွာစံတော့မှာ။
ကျန်ခဲ့မယ့်မိဖုရားကြီး သူတို့အပေါ်အမျက်ရှမှာ သူတို့မလုပ်ရဲ။
ပိုပြီးအားကြီးတဲ့သူနိုင်လိမ့်မပေါ့။ သူတို့ဆိုတာ တရားမျှတမှုနဲ့ မတရားမှုကြားထဲဝင်စွက်ဖက်လို့ အကျိုးရနိုင်စရာမရှိ။
မီးများမီးနိုင် ရေများရေနိုင်ပွဲမှာ အဖြေကိုရှင်းရှင်းလင်းလင်းသိမှ ခြေထောက်ပြေးဖက်လဲ မှီသေးသည်မို့ သူတို့အလုပ်ကညီလာခံထဲထိုင်ပြီး ဆိတ်ဆိတ်နေရုံသာ။
ဒီလိုနဲ့ နန်းတော်ကစေလွှတ်လိုက်သည့် စစ်သူကြီးခေါင်းဆောင်သည့် တပ်တော်ကြီးသည် မင်းသားရှစ်ကိုနှိမ်နင်းဖို့ နယ်စပ်ကိုချီတက်လာကြသည်။
အထောက်တော်တွေပြန်ပေးသည့်သတင်းကြောင့် သူ့တို့ဆီစစ်သူကြီးကိုယ်တိုင်ချီတက်လာမှန်းရိပေါ်သိသည်။ အခုလောလောဆယ်အာဏာရထားတဲ့သူပြောတဲ့စကားက အမှန်ဆိုတော့ သူဆိုတာ သူတို့ပါးစပ်ဖျားထဲ ပုန်ကန်သူ ညီအစ်ကိုချင်းပြန်သတ်သူထက်မပို။
စစ်သူကြီးကိုယ်တော်တိုင်ချီတက်လာသည့်တပ်သည် နိုင်ငံ့အတော်ဆုံး တပ်သားတွေနဲ့ဖွဲ့စည်းထားတာမို့ ရိပေါ်ရဲ့လူတွေနဲ့တိုက်ရင် ဘယ်လိုမှမနိုင်နိုင်။ လူအင်အားရော အရည်အချင်းကရော စစ်သူကြီးတို့တပ်ကအသာကြီး။
