My handsome Prime Minister

Extra 3💞

အဖြူရောင်သံဆွဲတံခါးခပ်နိမ့်နိမ့်လေး‌အပေါ်၌ ခရမ်းရောင်စက္ကူပန်းပင်၏အကိုင်းအခက်တို့ကမှီဝဲတင်ကျန်နေသည်။
ရှားပါးလွန်းလှသောခရမ်းရောင် Bougainville ပွင့်ဖတ်ခြောက်တို့သည်ခြံဝန်းရှေ့၌ပြန့်ကြဲနေသည်။
ခြံဝန်းအတွင်း၌သစ်ပင်ပန်းမန်များဖြင့် ငြိမ်သက်အေးချမ်းနေပြီး ခြံဝန်းဗဟိုချက်၌ထောပတ်သီးရောင်နှစ်ထပ်တိုက်ကတင့်တယ်စွာတည်ရှ်ိသည်။
ဤဝန်းနှင့် ဤခြံကိုအပြင်မှကြည့်ရုံနှင့်တင်အေးချမ်းရာရိပ်မြုံလေးဖြစ်ကြောင်းအလိုလိုထွင်းဖောက်မြင်နေရသည်။ထိုရိပ်မြုံသည်အပြင်ပန်းတင်သာမက အတွင်း၌လည်းချစ်ခြင်းမေတ္တာတို့ထုံမွှမ်းထားသောသီရိဂေဟာလေးဖြစ်နေလေသည်။

မုန်လာဥနီ၊‌ရွှေပဲသီးနှင့်ငရုတ်ပွသီးစသည်တို့ကိုစဉ့်တီတုံးပေါ်မှာခင်မြန်မြန်ဆန်ဆန်လှီးဖြတ်လိုက်ပြီးနောက် အိုးထဲထည့်ကာကြော်လိုက်သည်။
ထို့နောက်ကြက်သားထည့်ကြော်သည်။
အသီးနှံတွေနူးသလိုရှိမှအပေါ်ကထမင်းထပ်ထည့်လိုက်ပြီး လိုအပ်သည့်ဟင်းအမယ်များထည့်သည်။
အရသာမမှန်သေးဟုခံစားရသည့်အတွက်အပေါ်မှခရုဆီချိန်ထည့်လိုက်သေးသည်။
ထိုစဉ်ခါးပေါ်သို့ အနောက်ဖက်မှသိုင်းဖက်လာသောလက်တစ်စုံကြောင့် ခင့်၏နှုတ်ခမ်းများကွေးညွှတ်တက်သွားသည်။

"မောနင်း"

"လူကြီးမင်းနိုးပြီပေါ့"

အိမ်ထောင်သက်ပင်ဆယ်စုနှစ်တစ်ခုကျော်ဖြတ်လာခဲ့ပြီဖြစ်သော်လည်း ခင် ‌ ယောကျာ်းဖြစ်သူကိုလူကြိီးမင်းဟူသောနာမ်စားကိုသာနှုတ်ကျိုးနေခဲ့သည်။
ရံဖန်ရံခါတော့သူစိတ်ရှိရင်ယောကျာ်းတို့ အချစ်တို့ခေါ်တတ်သည်။

"ဘာလို့အစောကြီးထသွားတာလဲကွာ အေးဆေးအိပ်စရာရှိမအိပ်ပဲကွာ"

ကျောပေး၍ထမင်းကြော်နေသောခင့်၏ပုခုံးပေါ်သို့မေးဖျားလေးတင်ကာမှီထားပြီးအိပ်ချင်မူးတူးအသံဖြင့်မြတ်ဆိုလာသည်။
ကလေးတယောက်လိုတိုးကပ်ချွဲနေသောမြတ်ကြောင့် ခင်ပြုံးလိုက်မိပြီး

"၇နာရီပဲထိုး‌တော့ပါမယ်လူကြီးမင်းရယ် မစောတော့ပါဘူး"

"မသိဘူးကွာ မင်းကိုဖက်အိပ်ချင်နေသေးတာ အစောကြီးထသွားတယ်ကွာ"