الأب : احم .. المهم ا بنتي اللي بغينا نقولو ليك هو واحد السيد بغاك للزواج .. ولد الأستاذ اللي كايقري ختك سارة
الأم (بسعادة) : ناس الله يعمر ليهم الدار .. شنو قلتي ا دعاء ؟
دعاء : (الصمت)
الأب : (حس بيها حشمات .. ووقف) أنا غانخرج دابا عندي شي شغل نقديه .. بنتي دعاء خوذي وقتك واللي قلتيها هي اللي غاتكون (خرج)
الأم : دعاء !
دعاء : وشكون قاليكم أنا بغيت نتزوج ؟
الأم : أي بنت كاتحلم بالزواج ا دعاء .. والولد ظريف وولد عائلة .. بخيرو وخميرو وغاتعيشي معاه مزيان
دعاء سكتات وبقات كاتشوف قدامها بلا ما ترمش عينيها ..
الأم : مالك سكتي ؟ شوفيه بعدا وجلسي معاه وديك ساعة قرري
دعاء : فين شافني هاد السيد ؟
الأم : ماشافكش .. كانو سيفطو لباباك استدعاء للثانوية فين كاتقرى سارة وتما تلاقاه وفهضرتهم جبدوك نتي وصافي
دعاء : ويلا ماعجبتوش ؟
الأم : (تصدمات من سؤال بنتها)
دعاء (باستهزاء) : ماكاين لاش يشوفني ولا نشوفو .. بلغيهم رفضي
الأم (بغضب) : دعاء ما تعصبينيش .. مالك على هاد التشاءم ؟ حتى ل ايمتا غاتبقاي هاكا ؟ قريناتك تزوجو وولدو ونتي جالسة سادة على نفسك وخانقة راسك .. غدا ولا بعدو يدي مول الأمانة أمانتو ونتي غاتبقاي وحدك ؟ حنا مادايمينش ليك ابنتي
دعاء : الله يطول فعمركم 😔 صافي واخا ديرو اللي بغيتو
الأم : دعاء أنا ماكانقولش ليك هاكا باش نضغط عليك ولا نبزز عليك هاد الشاب .. ولكن بغيتك ديري عقلك وتفكري فمستقبلك وتحيدي دوك الأفكار السلبية اللي مسيطرة عليك
دعاء : أنا غانطلع لبيتي دابا ..
الأم : ففف سيري الله يهديك على نفسك
طلعات دعاء لبيتها .. دخلات وسدات عليها .. جلسات فطرف سريرها وسهات كاتفكر .. النهار اللي شحال وهي كاتهرب منو وماكاتبغيش تفكر فيه وصل وماكانتش ضاربة ليه الحساب .. شكون هادا اللي غايشوف فيها وغايقبل بيها بالرغم من دمامتها ؟ من غير يلا كان عمى .. وهي تفكر قصة عبد الله الدميم اللي تزوج عمياء فاتنة وفاش خبرها الطبيب باللي عندها أمل ترجع تشوف من جديد .. عبد الله تصدم وبدا كايتهرب وكل مرة فاش كاتسولو على الطبيب وموعد العملية كايختارع ليها كذبة .. حتى للنهار اللي القدر غايلعب بيه ويرجع ليها بصرها .. ماكانتش عندو الجرأة يواجهها وكان خايف أنها ترفضو يلا شافت البشاعة ديالو .. ومع ذلك كابر وضغط على راسو ومشا عندها .. وما إن وقعت عيناها عليه علات ملامحها الدهشة والصدمة اللي بسرعة تداركات الموقف ورسمات ابتسامة حنونة .. وفاش سولها واش غاتفرق عليه .. جاوباتو بالرفض وقالت ليه باللي بغات الداخل ديالو والمظهر ماكايهمهاش .. حتى لهاد النقطة نزلو دموع دعاء .. زعما يكون هاد الشاب بحال ديك العمياء الجميلة ؟ ولا غايكون بحالو بحال الناس اللي المظهر عندهم هو كلشي ؟
دعاء : هههه أصلا القصة من وحي الخيال فقط .. الواقع حاجة أخرى .. والعمياء هي شخصية خرافية لا غير .. ومستحيل يكون عندها شبيه فالواقع
هاكا قنعات راسها .. ودك النهار داز عليها غير فالتفكير والبكا مرة مرة فاش كاتفكر ختها ..
أنت تقرأ
الذميمة
Romanceقصة فتاة ينظر إليها المجتمع نظرة دونية بسبب شكلها الذي يعتبرونه قبيحا وأعطوها لقب #ذميمة .. لقب سيكون هو منبع معاناة البطلة في محيطها وفي علاقاتها مع الآخري .. تتعرض للاحتقار والظلم من أقرب الناس
