الذميمة

البارت 15

سيء جدا أن تحمل هموم ليست مناسبة لعمرك في وقت المفروض فيه أنك في أجمل أيامك ..

دعاء : توحشتها بزاف 😢 ولكن هي تخلات عليا وماتاقتش بيا ، من أول مشكل كايصادفنا قلبات عليا ا ختي
مريم : على داكشي اللي عاودتي ليا ا دعاء راه بجوج بيكم مظلومات ، بجوج طحتو فالفخ ونتوما ماوقفتوش وإنما بقيتو طايحين ، هاديك اللي خططات لهادشي مازال مامعروفش السبب اللي خلاها دير فيك داكشي ويمكن تكون بغات تشوه صورتك قدام الناس وقدام صاحبتك ، يعني هي اللي دخلات بيناتكم باش تفرقكم .. بغات تهدم ديك الصداقة النقية اللي كانت كاتجمعكم .. نقدرو نقولو الغيرة هي الدافع ديالها ، ونتوما غلطتو فاش ماتمسكتوش فبعضياتكم ، مابينتوش ليها الساس ديال العلاقة ا دعاء .. أسماء عرفات غلطها وجات عندك باش تعتاذر ولكن نتي قابلتيها بالرفض وداك الغضب المكبوت من جيهتها فرغتيه فوجهها داك النهار ومع ذلك هي ما استسلماتش واخا طردتيها من داركم عااود رجعات عندك وعاود اعتاذرات وماملاتش .. عرفتي علاش ؟ حيت بصح كاتبغيك وكاتعزك بزاف ودايراك ختها ماشي صاحبتها ، هي داك المرة أثر فيها كلامك وحيت كانت ديما معاك وكاتبغي تخرجك من ديك حالة الكآبة اللي كنتي عايشاها يحساب ليها بصح خنقاتك وكاتبزز عليك شي حوايج نتي ماباغاهمش وهي ماقصدات منهم والو من غير تشوفك فرحانة ، كون شي وحدة اخرى تقلب فمرة وعمرك تشوفي وجهها ولا تنازل وتجي طلب السماحة ولكن أسماء غير ا دعاء ، شوفي تذكري الحاجات الزوينة اللي عشتوها ، الضحك اللي ضحكتوه ، الفرحة اللي تشاركتوها ، أي ذكرى زوينة دازت بيناتكم تفكريها ا دعاء ونساي الحاجات الخايبة اللي وقعو ليكم وسوء تفاهم اللي خلاكم تخسرو بعضكم ، رجعي لصاحبتك ا دعاء .. الله وكايسامح وشكون حنا اللي مانسامحوش ؟ هضري معاها وصفيو الخواطر راه الدنيا فانية .. شحال قدنا نبقاو هازين فخواطرنا من جهة الناس ؟؟ واش حنا ضامنين عمرنا فهاد اللحظة ؟ علاش نخليو حتى يفوت الفوت عاد ندمو حيت ماسامحناش ؟ أو مااعتاذرناش لشي حد جرحناه ؟ جلسي مع نفسك ا دعاء وفكري فكلامي ويلا جاك خاوي ومامنوش نسايه وديري فحال يلا ماسمعتيهش ☺
دعاء : 😢
رنين هاتف مريم كايقاطع حديثهم ..
مريم : هادا هارون .. سمحيليا غانجاوب
دعاء : واخا .. أنا نوض نطل على الاولاد
مريم : نو غير خليك حدايا .. هوما غايكونو مازال مافاقو
دعاء : اوك
مريم (جاوبات هارون) : ألو حياتي ..... وي ....... واخا غانقولها ليها ...... حتى أنا ا عمري ...... بيزو (قطعات)
مريم : يوسف اتاصل بهارون وخذا منو الاذن باش يجي عندك وتخرجو تشوفو الخواتم
دعاء : وقلت ليه خدامة 😡
مريم : اشمن خدمة الله يهديك ههه ولاش تعصبتي ؟ عادي ا دعاء .. خرجي مع خطيبك ودوزو وقت زوين وزيدو تعرفو على بعضياتكم 😉 راه باينة فيه ولد الناس وشاريك
دعاء (لا رد)
مريم : نوضي وجدي راسك ، راه فالطريق 😉
دعاء (حركات راسها بالايجاب)
ناضت قادات حوايجها وعاودات المايكاب وخلات شعرها مجموع .. وجلسات كاتسناه حتى سمعات صوت طوموبيل وهي توقف هزات صاكها وودعات مريم وخرجات عندو وهي ماحاملاش راسها .. جاتها فشكل تخرج معاه ..
خرجات من الفيلا ولقاتو واقف قدامها متكي على طوموبيلتو ومربع يديه ، انتابه لخطواتها وضار شاف فيها والابتسامة على وجهو ، وقفات قدامو ومد ليها يديه سلم عليها ..
يوسف : دعاء سافا ؟
دعاء : الحمد لله ونتا ؟ وأنس وخالتي بيخير ؟
يوسف : بيخير وكايسلمو عليك
دعاء : يسلم عليهم الخير
حل ليها الباب طلعات وسدو وداز لبلاصتو .. ركب ودار السمطة وقلع .. الطريق كلها وهي ساكتة وهو بوحدو اللي كايهضر وبعد المرات كاتجاوب بكلمة وحدة وكاترجع تسكت .. فسرها هو بالحشمة ..
وصلو لقسارية المجوهرات .. ومشاو نيشان لواحد المحل حيت يوسف كايعرف مولاه .. دخلو وهي عينيها فالأرض ..
يوسف : السلام عليكم ا سي مصطفى
سي مصطفى : وعليكم السلام ولدي يوسف .. لاباس عليك والوليد وواحد الحاجة
يوسف : كلشي لاباس ا سي مصطفى
سي مصطفى : اش حب الخاطر ا ولدي ولا نقولو اش فكرك فينا بعد هاد المدة هههههه
يوسف : ههههه غير عذرني وصافي الوقت لاهات كلشي .. المهم جيت أنا وخطيبتي نشريو الخواتم
سي مصطفى : الله يكمل بالخير ا ولدي ، اوا أنا ماعليا غير نوريكم أحسن ماعندي وراه ذوقك مازال عاقل عليه
يوسف (تزير) : احم غاناخذو على ذوق دعاء
سي مصطفى : اييه مرحبا (بدا يجبد فأشكال الخواتم ويحط قدامهم) هااانااا ابنتي تخيري مع راسك
بقات كاتشوفيهم دعاء واختارت بالزربة بغات غير تفك وتخرج من تما تخنقات .. هزهم يوسف والضحكة مافارقاتوش ، عطاهم لصاحب المحل باش ينقش عليهم سمياتهم ودار معاه موعد باش يجي ياخذهم ، خلصو وخرجو والسيد كايبارك ليهم وكايتمنى ليهم الحياة الزوجية السعيدة ..