الذميمة

البارت 19

دعاء : شنو وصلك للإمارات ؟ وعلاش غاتخدمي فيها هي بالضبط وأصلا قلت ليك بالناقص من الخدمة .. أنا قادة على كلشي
سارة : قادة دابا ولكن فاش غاتزوجي ماغاتقدي على والو ، واش يحساب ليك راجلك غايسمح ليك تخدمي باش تصرفي على مك وختك ؟ أكيد لا .. وأنا جاني عرض عمل مغري تما ووافقت عليه وغانتسنى غير يفوت عرسك نتي ويوسف ونمشي بينما طلعو ليا الأوراق
دعاء : يعني نتي مخططة لكلشي ! ودابا غير كاتعلميني مابغيتيش رأيي ؟
سارة : دعاء عافاك ، خليني نبني مستقبلي كيف بغيت أنا ، شحال قدني نبقى هاكا ؟ بغيت تانا نحقق داكشي اللي حلمت بيه
دعاء : حققيه هنا ، بجنبي أنا وماما .. علاش غاتبعدي علينا اختي ؟ علاش بغيتي تشتتي شملنا بعدما ولينا بيخير وعلى خير علااش ؟ وماما يلا عرفات واش غاتقبل ؟ غاتقبل تغربي ؟
سارة : عافاك فهميني ، بغيت ندير داكشي اللي أنا غانرتاح فيه ، وهاد الفرصة هي اللي غاتريحني وماما غانعرف كيفاش ندوي معاها
دعاء : فكري مزيان ا سارة ماتسرعيش ، مايغركش داك المكان .. شحال من وحدة مشات تما وندمات
سارة : وشحال من وحدة مشات وولات بيخير
دعاء (لا رد)
سارة : ختي ماتخافيش عليا ، أنا عارفة شنو كاندير والله
دعاء : ضبري لراسك (وقفات) غانمشي نشوف ماما
خرجات دعاء من الكوزينة وهضرة سارة زادتها هم على همومها ، كاتقاد من قنت وتسخر من قنت آخر ، حتى قالت صافي الأمور تقادات وهي تخرج ليها بقضية السفر اللي زعزعاتها وكاتمناها تراجع ، دخلات عند ماماها لقاتها فايقة وكاتحاول تحرك يديها ، ابتاسمات ليها وقربات عندها باست ليها راسها وعنقاتها ..
دعاء : سمحيليا بزاف ا ماما هملتك هاد الأيام
الأم : بنن بنن تي
دعاء : نعام الغزال ، شفتك اليوم منورة الحمد لله 😘 الطبيب قالينا العلاج غادي مزيان والحركات اللي كانديرو ليك فالدار ساعدوك بزاف ياك
حركات الأم يديها كإجابة على سؤال بنتها ..
دعاء : هههه مواح عليك اوا شحال هادي مابقينا تعاودنا 😉
بقات جالسة مع ماماها كايضحكو وكاتعاود ليها على عرس أسماء وكيفاش داز والناس اللي كانو حاضرين وشنو الفرق بين أعراس البورجوازيين و أعراس الشعبيين .. فاش بانت ليها ماماها عيات ، شرباتها دواها وخلاتها تنعس وخرجات طل على الوليدات ، لقاتهم جالسين كايتغداو وسارة حداهم شادة فحناكها وساهية ، ماداتهاش فيها وجلسات حداهم فالطبلة كاتمسح لجوري فمها اللي عمراتو ، كلات معاهم شوية وناضت دوشات ليهم بثلاثة وبدلات ليهم حوايجهم ، لبسات لأنس لبسة من عند جاد ونعساتهم يديرو قيلولة 😂 جمعات الروينة اللي دارو وغسلات الماعن ودازت للصالون تكات وشعلات التلفازة كاتقلب فيها حتى داتها عينها ، فيقها غير التيليفون كايصوني ، هزاتو وجاوبات بلا ماتشوف الرقم ..
دعاء (بصوت مبحوح) : ألووو .. السلام عليكم سي هارون ، شنووو (ناضت قفزات) واااش بصح ، الحمد لله ياربي الحمد لله ، فرحتيني بزااااف والله ..... اه اه ماتخافش عليهم هوما بيخير ، نعسو قبيلة ، صافي واخااا يلا فاقت سلم ليا عليها وقوليها الحمد لله على سلامتها ، الله يجيبكم على خير يا ربي ، بسلاااامة
قطعات المكالمة وبدات تنقز من الفرحة وتغوت ، سمعاتها سارة وخرجات من بيتها كاتجري تشوف مالها ..
سارة : مالكي 😮 واش حماقتيي
دعاء (تلاحت عليها عنقاتها) : مريم نجحاااااااات ليها العملية واااااااااااااااو
سارة : ههههه اوا على سلامتها .. شششش كانسمع الدقان ، باااينة الجيران سمعو غواتك وجا يشوفو اش واقع 😑
دعاء : هههههههههه خليني اختي فرحت لصاحبتي مسكينة ، ناري بحال شي جبل وتزاح على قلبي
سارة : نمشي نحل الباب
مشات سارة كاتجر فرجليها ، حلات الباب ولقاتو يوسف ..
سارة : نسيبي .. دخل
يوسف : لا زربان ، كلمي ليا أنس ..