الذميمة

البارت 29

🌞أصبحنا وأصبح الملك لله ..
اليوم مميز، كلشي كان يتسناه بفارغ الصبر، البنات هجمو على دعاء مع النبوري 😂 نزلو عليها فحال الباطل، جمعو ليها حوايجها ولبسوها جلابتها وخرجوها للحمام اللي رفضات تمشي ليه البارح ولكن اليوم بززوه عليها وداوها، دخلوها كسلوها وماخلاوها دير يديها فحتى حاجة كلشي داروه ليها هوما أما مريم وأسماء بقاو كايتسناوها فالجلسة حيت مثقلات وماقدروش على الحمام سخون، دخلات معاها غير سلوى مع البقية، كملو ليها ولبسوها بينوارها وخرجوها بالزغاريد ودخلو هوما شدو سليبها دارو فسطل ديال الماء وتشللو بيه باش يتبعوها 😂، وخرجو عندها نشفو ليها ولبسوها والبعض منهم هاز التعارج كايضربو ويغنيو وهي ماقاداها فرحة، حماو الطرح فالحمام وكملوها فطريق للدار، دخلوها لبيتها باش تنعس شوية وترتاح باش العشية تلقاها مزيان وهوما كل وحدة تكلفات بحاجة، باب الدار محلول والداخل والخارج عليهم من الجيران ولالة نعيمة ماجلساتش وقفات على عرس بنتها بيديها وكاتحمد الله وتشكرو حيت عافاها وخلاها توقف فهاد النهار، سارة بقات شادت بنتها اللي ماسكتاتش ليها ومع الصداع ماخلاوهاش تنعس، جسار مشا مع هارون ويوسف يشوفو التقدية اللي خاصا ويديوها للقاعة قبل مايمشيو عند نبيل، وفالقاعة كاينة مريم وسلوى اللي واقفين على الزينة والديكورات، هزو ماكلة العرس والحلاوي داوهم فالكرارس للقاعة وتبعاتهم لالة نعيمة هازا معاها صاكها فيه تكشيطها باش غاتبرز وسارة بقات مع دعاء فالدار، الوقت كايدوز وعروستنا ناعسة حتى دخلات عليها ختها هازا بنتها وبدات كاتفيق فيها ..
سارة (كاتحركها) : دعاااء، دعااء نوضي
دعاء : امممم
سارة : نوضي اختي باراكا عليك من النعاس
حلات عينيها بزز وتكعدات كاتجمع فشعرها وكاتكسل ..
سارة : كاينة واحد الضيفة بغات تشوفك
دعاء : شكون هادي؟
سارة : سيري للصالون وغاتلقايها، المهم أنا غانمشي لبيتي نرضع جنة ونعسها حيت يالاه خوات الدار
دعاء : اوك
تلاحت على البنية باستها وناضت من الفراش دخلات للحمام غسلات وجهها وخرجات للصالون، شافتها جالسة وسطو وعينيها كايضورو فيه، تصدمات وماعرفات باقي واش تزيد ولا ترجع بقات واقفة فبلاصتها حتى انتابهات ليها الضيفة ووقفات مبتاسمة ليها ..
نرمين : دعاء
ماجاوباتهاش فقط بقات كاتشوفيها ..
نرمين : عارفاك تصدمتي وماكنتيش متوقعة تشوفيني، المهم بغيت نهضر معاك ممكن؟
دعاء (فاقت من الصدمة) : احم مرحبا بيك
نرمين : شكرا
جلسو مقابلات مع بعضياتهم وعينيهم مانزلوهمش ..
نرمين : كاينة شي عروسة كاتبقا ناعسة حتى لهاد الوقت نهار عرسها؟
دعاء : غغير داتني عيني
نرمين : كايبانو عينيك منفوخين شوية، ديري ليهم ثلج باش يتفشو
دعاء : امم واخا
نرمين : المهم ابنتي سمحيليا ماجيتش نهار الخطبة ولكن ماكانش عندي الوجه اللي نتقابل معاك بيه ونتي راكي عارفة، أنا غلطت فحقك ومعتارفة بيها، غروري وتكبري عماوني ووليت كانقيم الناس من مظهرهم الخارجي وحالتهم المادية، ونسيت أصلي وباللي حتى أنا كنت فحالك وكثر منك كااع، عائلتي ناس دراوش وعلى قد الحال، عشت حرمان مادي معاهم، كان كايبقى فيا الحال فاش كانشوف الناس شنو كايلبسو وشنو كاياكلو والطموبيلات فاش كايركبو والديور فين ساكنين وحنا عايشين فدار راشية فحي شعبي، وكنت كانطمح نولي من الطبقة الراقية وحطيتو هدف قدامي وحققتو فالأخير فاش تعرفت على خالد وتزوجني وقبل عليا واخا عارف مستوايا وهو كان لاباس عليه وماهموش ولكن عائلتو مابغاتنيش وهو وقف فوجههم وهددهم يسمح ليهم فكلشي ويخوي المدينة وحيت كان ولدهم الوحيد اضطرو يوافقو ليه ولكن شرطهم نسا أصلي ونسا والديا وأي حاجة كاتربطني بيهم وأنا عماني الطمع وسمحت فيهم وعطيتهم بظهري وتزوجت بخالد وماسيقتش ليهم الخبار حيت مارضيتش يحضرو لعرسي اللي كانو المعزومين كلهم هاي كلاس وحتى عائلة خالد ماكانوش يسمحو فهادشي حيت الواجهة الاجتماعية كانت أهم حاجة عندهم وأنا فاش عاشرتهم وليت فحالهم وكانفكر ونتعامل بحالهم، ونهار شفتك مع بنتي فكرتيني فراسي والفرق اللي كان بيناتنا هو المظهر الخارجي .. وقررت نبعدك عليها وحتى فاش شفت نبيل تعلق بيك من أول مرة تملكني غضب شديد ومارضيتش بصورتي قدام الناس
دعاء : اه قلتي فقيرة ماعليش ولكن ذميمة مستحيل
نرمين : اه وندمت على ديك الشوفة، نسيت باللي الانسان ماشي هو اللي كايخلق راسو وباللي الله سبحانه وتعالى يخلق مايشاء، وأن الجمال هو جمال الروح اللي كايبقى خالد ودائم أما جمال الوجه كايزول مع الوقت وكايبقا الفعل اللي كايقيم بنادم، الفترة اللي بعدت فيها على راجلي وولادي بعدما واجهوني بعيوبي ورجعت للوسط اللي تولدت وكبرت فيه خلاتني نعيد النظر فشحال من حاجة ومنها نتي ابنتي، اكتاشفت باللي ظلمتك بزاف وجرحتك وهنتك وتسببت ليك فآلام، وأنا دابا جيت عندك كانطلب منك السماحة ابنتي 😢 ..