الذميمة

البارت 26

🌼أصبحنا وأصبح الملك لله🌼 ..
فاقت بطلتنا ناشطة ماشطة 😂 لا لا ماماشطاش مشعكة كيف عادتها، شعرها شاد الرادار ههه، ناضت كاتكسل وتعكز والضحكة مرسومة على شفتيها وهادي أول مرة توقع، دخلات للحمام وهي كاتغني تطرفات وتوضات وخرجات لبسات عبايتها صلات وحمدات الله وشكراتو على الراحة اللي وهبها ودعاتو تكمل فرحتها، كملات وناضت لبسات جينز لاصق وفوقو شوميز زرق مغلوق طويلة وبالغين فنفس اللون وجمعات شعرها ذيل حصان ودارت مايكاب خفيف ورشات بارفان ديالها، شافت فراسها بكل ثقة وابتاسمات، هزات صاك صغير صمطة طوية وخرجات من بيتها، حطات الصاك فالصالون ومشات للكوزينة وجدات الفطور لماماها بزربة، داكشي خفيف ظريف ساهل ماهل 😂 حطاتو فوق الطبلة ومشات عندها لقاتها كاتصلي، تسناتها حتى سالات وتلاحت عليها عنقاتها بجهد وباست ليها جبهتها وعاوناتها ناضت بعدما مدات ليها العكاز وشدات فيها خرجاتها لطبلة الفطور وعاوناتها تجلس ..
الأم : شفتك فرحانة اليوم
دعاء : ههه وعلاش مانفرحش وماما حبيبتي صحات ليا وختي سمعت خبارها وهضرت معاها وغانولي خالة فأيام قليلة ان شاء الله
الأم : وزيد عليها غاتزوجي قريب
دعاء : 🙈
الأم : ههههه خلي الحشمة حتى يجي العريس يخطب، اوا شفتك لابسة مزيان فين غاديا اممم
دعاء : وراك عارفة اماما وكاتزيدي تحشميني
الأم : صااافي ا لالة، سيري فرحي داك المسكين ورجعي ماتبقاي دوري معاه حتى ضربو الكحل فالبيض وضبرو راسكم
دعاء : هههه واخا واخا
الأم : الحمد لله ابنيتي اللي شفت هاد ضحكتك خارجة من القلب، الله يخليك ديما ضاحكة ياربي ويفتح ليك بيبان الخير ويسعدك ويكمل عليك نتي والانسان اللي بغيتي
دعاء : آمين اميمتي، يالاه فطري دابا وخلي هادشي ماتقيسيهش حتى نجي واخا
الأم : ومتي ماغاتفطريش ؟
دعاء : لا لا غانفطر عند مريم، توحشت الداري وغاندوز نشوفهم
الأم : واخا سلمي عليهم
باستها وهزات صاكها وخرجات من الدار، غادية فالحومة وكاضحك واللي داز من حداها تهضر معاه وتمازح معاه، رجعات ليها الروح المرحة اللي غابت عليها شحال هادا، هزات تيليفونها ودوزات الرقم وقلبها كايخفق بسرعة ..
دعاء : ألو صباح الخير
نبيل : صباح النور دعاء، كيف صبحتي؟
دعاء : الحمد لله ونتا ؟
نبيل : فووور فاش سمعت صوتك
دعاء : نبيل يلا كنتي مسالي دابا نتلاقاو بغيت نهضر معاك
نبيل : نسالي على قبلك، البلاصة؟
دعاء : عرفتي كافي ***** نتلاقاو فيها
نبيل : اوك مسافة الطريق ونكون عندك
قطعات معاه وشدات طاكسي للكافي اللي قالت ليه، كانت قريبة من البلاصة اللي ساكنة فيها مريم باش ماتعذبش فالكريق وتجيها ساهلة، وصلات وخلصات الطاكسي ونزلات، دخلات للكافي وجلسات فطبلة لجوج ديال الناس، جا عندها النادل وخبراتو باللي كاتسنى واحد الشخص، ماكاملاش 5 دقايق باش جلسات حتى وقف عليها..
نبيل : سلام دعاء
دعاء : وعليكم السلام
نبيل : ياكما تعطلت عليك ؟
دعاء : لا لا أنا يالاه وصلت
نبيل : فطرتي ؟
دعاء : لا
نبيل : حتى أنا
عيط للنادل وطلب فطور لشخصين، مشا جابو ليهم وبداو كاياكلو ويهضرو فمواضيع عامة ودعاء كل مرة تبغي تبدا شنو جات على قبلو وكاتعاود تراجع، فاللخر تشجعات وتكلمات ..
دعاء : نبيل، أنا طلبت نتلاقاك باش نقوليك قراري
نبيل (بلهفة) : شنو قررتي ؟
دعاء : احم فكرت مزيان و و امم أما موافقة
نبيل : عاودي شنو قلتي ؟
دعاء : مواافقة نكون معاك
نبيل : لا لا ماسمعتش مزيان
دعاء : هههه واصااافي
نبيل : هههههههههه وأخيييييييييييراااااااا جا العفو 😂😂 كنت حاس غاتوافقي، وأنا كانواعدك ماغاتندميش على قرارك ا دعاء
دعاء : ان شاء الله، المهم أنا خاصني نمشي
نبيل : خليك شوية مازال، توحشتك بزاااف
دعاء : مانقدرش ا نبيل، ماما كاتوصي وتعاود مانبقاش معاك مدة طويلة وهاني كاع جلست حتى فطرت ههه
نبيل : صافي على خاطرك، المهم بلغي ليها سلامي وقولها غانزروكم الجمعة فالعشية ان شاء الله
دعاء : ان شاء الله
ناضت وهي غتموت بالحشمة من شوفاتو ليها، خلص وخرج معاها على برا، اقتارح يوصلها فين بغات ورفضات على أساس فيلا مريم قريبة وماجاتش تركب معاه احيانا عليك ا دعاء ونتي ماكرهتيش ديك الساعة تزوجو وتجلسي حداه 😂😂 ودععها ومشات وهو ركب فسيارتو وبقا وراها غير بشوية بلا ماتشوفو، حتى وصلات لعند مريم وشافها دخلات عاد رجع فحالو وماقاداه فرحة، قصد نيشان دارهم لعند والديه ..