رواية ورقة جوكر..[مكتملة]

الحلقة السادسة عشر

ورقه_جوكر١٦
#الحلقه_السادسة_عشر
"انا لو مكانك مكنتش ضربتها..انا كنت اخبطها بأي حاجه في ايديا...وبعدين ازاي خالد يعمل حاجة زي كده"
قالها كريم وهو يتحدث مع يارا في هذا المطعم..قصت يارا لكريم ما حدث معها ..وهي في أشد غضبها بالطبع ليس من ماهي بل من هذا الخالد...
-انا اعرف يا أخي..وبعدين انا معرفش فعلا ايه علاقتي بالفايل ده.
-سيبك بقي من خالد و ماهي.
-ممكن اسألك سؤال يا كريم؟
-قولي.
-انت ازاي مش شاكك فيا؟
-بصي ..أصل لو انتي واحدة حرامية استحالة كنتي هتقفي جمبي بالعكس ده انتي هتبقي مع خالد في كل كبيرة و صغيرة عشان يحس انك معاه.
-عارف يا كريم رغم ان سنك عشرين بس دماغك توزن بلد.
-شكرا يا ستي...بس ايه حكاية الحجاب اللي انتي لبساه؟
كانت يارا قررت ان ترتدي الحجاب..وكان مظهرها به جميل للغاية..
-يعني بعد اللي حصل لنور حسيت اني فعلا لازم اتحجب.
-لا والله بس..
لكن كريم وجد هاتفه يهتز بجانبه..وكان المتصل خالد...
لم يبالي كريم واستكمل حديثه لكن خالد اتصل مرة أخري.. نظرت يارا لكريم وهي تقول..
-رد عليه يا كريم ده مهما كان أخوك.
رد كريم علي اتصال خالد لكن كانت الإجابة مفاجأة..
-ايوه يا خالد.
-ايوه يا كريم..انا بتصل بيك بس عشان اقولك معاد فرحي.
-فرحك؟
كانت هذه الكلمة صدمة بالنسبة ليارا...كانت كالصاعقة..فرح؟ هل هذا صحيح ام انه شئ آخر لكنها وجدت كريم يستكمل وهو يقول..
-يعني ايه يا خالد؟
-يعني فرحي الأسبوع اللي جاي علي ماهي يا كريم.
-ماهي!!
-ايوه ماهي..انا قولت اقولك بس عشان متبقاش عرفت من بره ..سلام.
أغلق كريم الخط وهو مندهش..هل خالد يمزح معه ام ماذا..لكنه وجد يارا تقول له..
-ايه اللي حصل؟
-خالد هيتجوز ماهي الأسبوع اللي جاي.
صدمة..نعم صدمة..يا له من إحساس..إحساس ان يصلب منك شئ..لا للقدر الذي سيجعل خالد يبعد عنها..لا لكل شئ سيجعل خالد ليس من نصيبها..هل هذا حب؟ ..نعم انها غيرة الحب.."سأتراهن مع نفسي ان تكون ملكي يا خالد..فلتبدأ الحرب"
-ايه سرحتي في ايه؟
-ها؟ لا مفيش.
-هو خالد اتهبل ده مكنش بيطقها!!
-طب وانت هتعمل ايه؟
-في ايه؟
-هتروح يعني ولا لأ؟
-مش عارف.
-روح يابني ده أخوك ..ازاي مش هتحضر فرح أخوك؟
-هشوف هشوف.
انتهت المقابله وركبت يارا سيارتها..و بدأت في البكاء وهي تتحرك بسيارتها..
"طب وبعدين..هعمل ايه!! انا ازاي افكر كده اصلا..فين كرامتي! ازاي احب حد بالشكل ده؟ ازاي أحب حد مبيحبش حاجة في حياته غير شغله..ازاي اصلا احب واحد اتكلم معايا بالأسلوب ده!!"
ظلت يارا تبكي و تتحدث مع نفسها حتي انها وصلت منزلها..
                                *****
" ايوه كده يا ماهي.شوفتي لما سمعتي كلامي خالد جالك اهو"
قالتها سالي لماهي وهي معها في غرفتها ومعهما ابنة سالي الكبري..
-يالهوي يا سالي هموت من الفرحة بجد مش قادرة اصدق اني هتجوز خالد"
كانت ليلي في أشد غضبها من ماهي..تكرها بشدة..
ليلي هي ابنة سالي ..فتاة في الرابعة عشر من عمرها..كان جمالها ليس طاغي مثل والدتها..ليلي هي فتاة بسيطة للغاية..لا تحب المظاهر مثل والدتها ..وكان صديقها المقرب هو كريم..رغم كل الخلفات التي بينه وبين سالي..إلا انها تعشقه..كانت تتحدث معه علي صفحات التواصل الإجتماعي لتجد سالي تقترب منها وهي تقول..
-بتعملي ايه يا ليلي؟
-مبعملش حاجه قاعدة علي موبايلي.
-بتكلمي مين اقصد؟
-بكلم صحابي...و معاهم كريم.
لكنها وجدت صفعة قوية علي وجهها وسالي تصرخ بها وتقول..
-انا مش قولت الزفت ده متتكلميش معاه تاني؟
-حرام عليكي بقي انتي كل شوية تضربيني علي أسباب تافهة.
-تافهة؟ انا كام مره اقول متتكلميش مع كريم الزفت!!
-يا ماما. كريم ده خالي وبعدين ده صاحبي اووي.
وضعت سالي يدها في شعر ليلي وهي تقول..
-قسما عظما يا ليلي لو لقيتك بتكلمي كريم تاني ولا بتقولي عليه خالي هيبقي يومك مش معدي ..سامعة؟..اتفضلي اطلعي علي أوضتك.
خرجت ليلي من الغرفة وهي تبكي لكنها اصتدمت بخالد..كان خالد يعشق ليلي..دائما يعطيها الحب والحنان التي تحتاجه..فوالد ليلي وسالي منفصلين منذ عشرة أعوام..ولم تنجب سالي إلا هي و شقيقها الأصغر ياسين..
احتضن خالد ليلي ثم مسك وجهها وهو يقول..
-السكر ده زعلان ليه؟
لكن ليلي بدأت بالبكاء مرة أخري..حتي ان سالي خرجت من الغرفة وهي تقول..
-انا مش قولت تطلعي علي أوضتك يا ليلي؟
لكنها وجدت خالد يوجه لها الكلام وهو يقول..
-سيبيها معايا شوية يا سالي.
دخلت سالي الغرفة مجددا..ودخل خالد غرفة ليلي وهو يقول..
-مالك بقي بتعيطي ليه؟
-يا خالد ماما علي طول بتضايق لما اتكلم مع كريم!
-انتي بتكلمي كريم؟
-ايوه طبعا ده صاحبي جدا.
-طب ايه المشكلة سالي بتزعقلك يعني؟
-بتزعقلي!! يريتها بتزعقلي دي ضربتني قدام الزفتة اللي اسمها ماهي دي.
صمت خالد قليلا لكن استكملت ليلي وهي تقول..
-انا آسفة يا خالد بس انا بجد مش بحبها و مش عايزاك تتجوزها.
-ولا يهمك..المهم كلمي كريم وملكيش دعوة.
-ماما هتقعد تزعقلي!!
-لا متخافيش ولو حصل حاجه ابقي كلميني علي الموبايل.
خرج خالد من الغرفه واتجه لغرفة سالي ليجد ماهي ترتدي ملابس عارية للغاية و سالي تتحدث معها بكل أهمية..لكن خالد وجه الكلام لماهي وهو يقول..
-اطلعي برا يا ماهي شوية.
-اطلع بره؟
-ايوه اطلعي مسمعتيش؟ وياريت يعني لو مفيهاش اساءة ادب مني ابقي ألبسي هدوم عدلة عشان انتي تقريبا مش لبسة.
-قصدك ايه يا خالد يعني قصدك اني..
-بصي هقولك بعدين عشان انا عايز سالي في موضوع مهم.
خرجت ماهي من الغرفة ..
نظر خالد لسالي بقوة و هو يقول..
-سبحان الله يا شيخة كل الناس اللي انتي بتحبيهم بنتك بتكرهم والعكس صحيح.
-اه قولي بقي انك جاي تديني درس في الأخلاق عشان كريم.
-اه هديكي يا سالي..للمرة المليون ..كريم أخونا!!
-بابا مخلفش غير توأم بس و بعدين احنا اللي تعبنا مع بابا و خلينا الشركة دي تكبر انت نسيت؟
-لا منستش بس دي حاجة ودي حاجة!! لأخر مرة بقولك يا سالي ابعدي عن كريم!!!