رواية ورقة جوكر..[مكتملة]

الحلقة السادسة و العشرون

#ورقة_جوكر٢٦
#الحلقه_السادسة_والعشرون
استيقظ خالد ليجد نفسه نائم علي الأريكة بدون كريم..وايضا بدون الجاكيت المخصص له و بدون الحذاء..نهض من علي الأريكة وهو ينادي علي كريم لكنه لم يجد رد..فتح علبة السجائر و بدأ في التدخين ليجد بعد فترة كريم يدخل من باب المنزل وهو يقول..
-كل ده نوم؟
-دماغي هتفرقع يا كريم ..عندي صداع شديد اووي.
-اجبلك اسبرين؟
-ياريت.
اخذ خالد الدواء و بعدها استكمل الحديث وهو يقول..
-انت كنت فين صحيح؟
-كنت بجيب أكل..يلا قوم عشان تفطر.
-انت جايب اكل ايه؟
-فطار يعني جبن و فول والحاجات دي.
-لا انا مش قادر أكل الأكل ده.
-اومال هتاكل ايه؟
مسح خالد علي رأسه وهو يقول..
-كلملنا أي محل بيتزا نفسي فيها.
-طب والأكل ده؟
-سيبه ..ابقي كله يوم تاني.
-معاك رقمهم؟
وقف خالد من مكانه ثم اخرج هاتفه من جيبه وأخذه واعطاه لكريم.. وبالفعل اتصل كريم بهم..لكنه بعد ان انتهي اقترب من خالد وهو يقول..
-انت امبارح تقريبا كنت شارب ازازة وسكي كاملة!!
-ليه؟
-انت مشوفتش نفسك امبارح؟ كنت سكران طينة!
-اااه متفكرنيش بجد انا تعبان جدا يا كريم.
-طب يلا احكيلي عندي فضول.
-طب قوم هات مخدة انام علي رجلك تاني عشان انت رجلك بقيت نشفة اوي!!
-هتتأمر كمان! استني اروح اجيب.
دخل كريم غرفته و أخذ منها الخدادية وخرج لخالد مرة اخري وهو يقول..
-يلا جبتها ..احكيلي بقي.
بالفعل وضع خالد رأسه علي هذه الخدادية لكنه  أخذ يد كريم و وضعها في خصلات شعره وهو يقول..
-يا ندل ..ألعبلي في شعري!!
-لا يا خالد كده كتير انت ايه جو الطفولة ده؟
ضحك خالد وهو يقول..
-نفسي اوي اخلف واقعد اعمل كده مع ابني.
-طب شد حيلك بقي و هات تالت حفيد لعيلة حسين.
-هو انا مقولتلكش مش انا طلقت ماهي.
نظر كريم لخالد نظرة صدمة وهو يقول..
-انت لحقت يا خالد!! ده انت مكملتش شهر!!
-المصيبة مش في كده! المصيبة قالتلي انها حامل!
-يخربيتك يا خالد..عشان كده كنت شارب امبارح؟
-حاجه زي كده.
-طب وهتعمل ايه؟
-مش عارف..اسيبها كده ولا ارجعها عشان الولد اللي في بطنها؟
-هو انت ليه يا خالد محبتش ماهي..مع انها بنت حلوة و جميلة و فيها مواصفات كتيرة اوي حلوة يعني.
-قولتلك ١٠٠ مرة انا مش عايز واحدة شكلها حلو بس! انا عايز واحده دماغها حلوة تفهمني! تكون بتحبني مش بتحب حاجه في خالد.
-ثواني بس يا خالد كده.. انت قولت عايز واحدة مش عايز تحب واحده.
-اها..قصدك ايه مش فاهم؟
-يعني مثلا انت لو هتتجوز واحدة غير ماهي ..هتحبها؟
-لا طبعا.
-استغفر الله العظيم..اومال هتتجوزها ليه؟
-عشان شايف انها زوجة كويسة و هتفهمني وكده.
-طب ليه متحبهاش؟
-عشان مفيش حاجة اسمها حب يا كريم اصلا.
-ليه بتقول كده؟
-كل الحب مصلحة..احنا بنحب عشان مصلحتنا وبس.
-ازاي؟
-هو انت بتعرف نفسك انك بتحب امتي؟
-لما احس الشخص اللي قدامي بقي حاجة كبيره بالنسبه لي.
-تمام..والشخص ده هتنجذب له ليه؟
-مش عارف بس ممكن عشان شخصيته و..
-اديك انت قولت اهو عشان في سبب..يعني انت بتحب مثلا فلانة عشان شخصيتها حلوة.
-ايوه بس ممكن احبها من غير سبب ..يعني ممكن اشوفها احس ان في بينا حاجة مشتركه.
-ابقي تعال تف علي وشي يا كريم لو مكنتش البنت اللي انت شايف بينك وبينها حاجة مشتركه دي حلوة.
-يعني ايه؟
-يعني انت عمرك ما هتشوف ان في حاجة مشتركة بينك وبين البنت دي إلا لو كانت حلوة ..عمرك ما هتعرف تحب واحدة مش حلوة.
-ايوه ما هي ممكن تكون وحشة بس انا شايفها حلوة!!
-وانا مليش دعوة هي حلوة ولا وحشة ..انا ليا دعوة انت شايفها ازاي.
-مش عارف.
-كل حاجه بالحب يا كريم إلا الحب.
-مش عارف .
-طب وانت يا كريم مفيش حد لافت نظرك ؟
-لا مفيش.
-عليا يا كريم؟
-والله مفيش حد لما يكون فيه هحكيلك وبعدين ده انا كريم يعني.
-ماشي يا عم.
وجد كريم هاتفه يهتز..أخذه ليجد المتصل يارا..
-ايوه يا يارا؟
-ايوه يا كريم انت فين!!
-في ايه يابنتي مالك؟
-الجيم كله مقلوب عليك يا كريم و في هنا ظباط و حاجات عايزينك!
-انت بتقولي ايه؟
نهض خالد من علي كريم ..ليجد وجه كريم منقلب للون الأحمر ..استكمل كريم وهو يقول..
-انا مش فاهم أي حاجة يا يارا اتكلمي براحة!
-يا كريم في واحدة جات بتقول انك مديت ايدك عليها!!
-ازاي يعني؟ ضرباتها و لا قليت ادبي يعني؟
-لا قليت ادبك! وحالفة انها لتخدك و تعملك محضر!
-يا نهار اسود يا نهار اسود ..طب اقفلي انا جاي حالا.
اغلق كريم الخط و هو يوجه كلامه لخالد..
-انا لازم اروح الجيم دلوقتي يا خالد ..في مصيبة!
-في ايه يا كريم ؟
-انا داخل البس ورايح اشوف ايه الموضوع.
-انا جاي معاك.
دخل كريم الغرفة وبدل ملابسه وخرج ليجد خالد منتظر اياه وهو يقول..
-يلا تعالي .
-هنروح يأنهي عربية؟
-اللي انت عايزه.
-خلاص تعالي بعربيتي.
نزل كريم وخالد لسياره كريم ..و تحرك كريم بالسيارة وفي رأسه ألف فكرة..ليجد خالد يقول له..
-انا مش فاهم هو مين اللي كلمك؟
-يارا..يارا اللي كانت شغالة عندك في الشركة.. اتصلت بيا بتقولي في واحدة جات الجيم ومعاها ظباط و بتقول اني مديت ايدي عليها.
-وانت عملت حاجه زي كده ؟
-انت هتستهبل يا خالد!! ازاي يعني انا عمري ما اعمل حاجة زي كده وبعدين انا اصلا بدرب ولاد و بطلت ادرب بنات.
-طب هنروح نشوف دلوقت.
وصل كريم وخالد عند الجيم ليجد كريم يارا منتظرة اياه خارج المركز وهي تقول..
-كريم انا عايزة افهم ايه اللي انت عملته ده؟
-انا اللي عايز افهم هو ايه اللي بيحصل.
نظرت يارا لخالد و لم تسلم عليه..لكنها وجدت خالد يقول..
-ندخل جوا وبعدين نشوف ايه اللي بيحصل.
دخل كريم غرفة يسرا ليجد يسرا تقول..
-بقول لحضرتك كريم ده من أحسن المدربين ..الكل بيجي مخصوص عشانه يبقي ازاي هيعمل حاجة زي كده!
تدخل كريم في الحديث وهو يقول..
-في ايه يا يسرا؟
وجد كريم الظابط قادم إليه وهو يقول..
-انت كريم حسين المنشاوي؟
-ايوه انا وعايز افهم في ايه؟
تدخل خالد بكل هيبته في الحديث وهو يقول..
-انا خالد حسين المنشاوي واظن حضرتك عارف انا مين كويس.
-ايوه يا فندم طبعا اكيد عارفين ان حضرتك رجل أعمال معروف بس انا متقدملي بلاغ ان استاذ كريم كان عايز حاجة مش كويسة من واحدة مشتركة هنا في الجيم!
تدخلت يسرا وهي تقول..
-هو حضرتك ليه مش قادر تقتنع ان كريم اصلا مش بيدرب بنات ازاي بقي هيعمل حاجة زي دي؟
تدخلت الفتاة وهي تقول..
-وانا هتبل عليه ليه!!
نظر كريم لهذه الفتاة وهو يقول..
-حضرتك البنت دي كابتن يارا اللي بدربها مش انا!
تدخل الضابط بالحديث وهو يقول...
-وفين يارا دي؟
دخلت يارا وهي تقول..
-انا اهو حضرتك.
-انتي كنتي بدربي البنت دي؟
-اها انا كنت بدربها و هي كانت عايزة كابتن كريم يدربها بس مكنش ينفع عشان كان اتسجل عند يسرا انها هتدرب معايا.
نظر الضابط للفتاة وهو يقول..
-الكلام ده حصل؟
-البنت دي كدابة.
نظرت لها يارا وهي تقول ..
-انا اللي كدابة بردو!
وهمت يارا بالذهاب إليها لكنها وجدت خالد يمسك ذراعها و يثبتها بجانبه..ثم نظر خالد للضابط وهو يقول..
-طب ايه المطلوب مننا دلوقت؟
-انا اسف بس انا لازم اخود استاذ كريم معايا القسم.