رواية ورقة جوكر..[مكتملة]

الحلقة العشرون

ورقة_جوكر٢٠
#الحلقة_عشرون
"يارا يا يارا فوقي في حد عايزك علي التليفون"
كانت فردوس تفيق يارا من نومها..كانت يارا في أشد إحتياج للراحة التامة..استيقظت يارا من نومها وهي تقول..
-في ايه يا ماما؟
-في واحدة عايزاكي علي التليفون.
-مين؟
-واحدة اسمها يسرا تعالي شوفي.
خرجت فردوس من الغرفة و خرجت بعدها يارا..مسكت يارا سماعة التليفون وهي تقول..
-الو؟
-ايوه يا يارا عاملة ايه؟
-الحمدلله يا يسرا..هي هبة كويسة؟
-اه كويسه بس بتسألي ليه؟
-لا أصل انتي عمرك ما كلمتيني علي التليفون يعني.
-ما هو انا كنت عايزاكي في حاجه كده.
-ايه هي؟
-بصي ألبسي وانا هاجي اخدك.
-قوليلي بس ايه هي؟
-هقولك لما اجيلك ..سلام.
أغلقت يارا الخط و دخلت المرحاض للإستحمام و صلت وارتدت ملابسها لتجد يسرا ترسل لها رسالة علي هاتفها تقول..
" انا مستنياكي تحت"
خرجت يارا من المنزل بعد اذن والدها وهي تريد ان تعرف لماذا يسرا طلبت ان تقابلها..هل هو شئ بخصوص كريم؟ ام انه شئ آخر.
دخلت يارا السيارة وهي تقول..
-صباح الخير يا هبة التانية.
-اشمعني هبة التانية؟
-عشان هي اللي بتصحيني كده وبتيجي تاخدني.
-معلش يا يارا انا آسفة اني صحيتك من النوم والله.
-ولا يهمك يا ستي..المهم انتي كنتي عايزاني في ايه؟
-استني احرك العربية و بعدين هقولك.
تحركت يسرا بالسيارة وبعدها بدأت في الحديث وهي تقول..
-بصي يا ستي..انتي عارفة اني لسه فاتحة الجيم جديد صح؟
-اها عارفة.
-و فاتحة قسم للأيروبكس و للزومبا والحاجات دي.
-تمام.
-فبما انك ماشاءالله يعني عندك جسم رياضي و لين فانا عايزاكي تيجي تشتغلي معايا.
-يااه انا اشتغل في الرياضة والحاجات دي!! ده انا من سنة كدة مصحيتش بدري وقعدت اجري.
-طب خلاص بقي انتي تيجي تشتغلي معايا...وطبعا الرأي رأيك.
-امممم طب هو كريم شغال في انهي قسم؟
-لا كريم مدرب في الجيم ذات نفسه..يعني المبتدئين وكده هو اللي بيرشدهم يعملوا ايه...بس صحيح كنت عايزة اسألك علي حاجة بخصوص كريم.
-ها؟
-هو كريم فعلا ابن عيلة المنشاوي؟
-اها ابنها.
-طب ازاي يبقي واحد غني الغني ده ويجي يشتغل عندي؟
-انتي سألتيه؟
-اها بس مرضيش يجاوب.
-يبقي متحوليش تعرفي غير لما هو يقولك عشان ميزعلش مني.
-صح عندك حق.. عموما انا وانتي هنروح دلوقت الجيم عشان أوريكي الصالة وكده وطبعا الاختيار أختيارك.
ظلت يارا تفكر طول الطريق بهذا العمل وهي تقول في نفسها..
"اشتغل معاها في الجيم ولا افضل قاعدة في البيت بكرامتي؟ بس انا اصلا مش بعرف ادرب ايروبكس !!"
أدارت يارا وجهها ناحيه يسرا وهي تقول..
-بس انا مش بعرف ادرب أيروبكس!
-لا مانتي هتتعلمي قبل ما تبدأي.
-ومين هيعلمني؟
-يابنتي انتي مش فاهمة الموضوع سهل ازاي..هو عبارة انك بتعملي شوية حركات بتحرقي بيها دهون ..يعني فيديوهين من علي اليوتيوب و الموضوع خلص..وانا كمان جايبالك فلاشة عليها كل حاجة.
-طب كويس...مدام هو سهل كده انتي ليه معملتيش الموضوع ده؟
-عشان مش هعرف اسيب الحسابات و الحاجات دي و ادرب..انا كان نفسي اعمل كده بس مش هعرف.
-ماشي يا ستي.
ظلت يارا و يسرا يتحدثا حتي انهما وصلا المركز الرياضي..دخلت يارا و بعدها يسرا لكن يارا قدمها دخل في بعض الأسلاك علي الأرض فسقطت علي الأرض..لتجد يسرا و كريم يتجها عليها...جري كريم عليها وهو يقول..
-ايه يابنتي مش شايفة السلك؟
-مش فاهمة انتوا ازاي تحطوا أسلاك علي الأرض زي كده!!
-والله المكان ده محدش بيدخل منه معرفش انتي ايه اللي خلاكي تلفي من هنا .
-اهو اللي حصل بقي.
كانت يسرا تكتم ضحكاتها علي سقوط يارا لكن يارا لحظت هذا الكتمان فبدأت في الحديث وهي تقول..
-لا متكتميش الضحكة عشان فعلا اللي يشوفني وانا بطير كده هيضحك.
لم تستطيع يسرا كتمان ضحكاتها أكثر فانفجرت من الضحك..و كريم و يارا يراقبانها و هما يضحكان ايضا..حتي ان يسرا توقفت عن الضحك وهي تقول..
-ااه يالهوي كل ده..سوري يا يارا بس مبعرفش اشوف حد بيقع و مضحكش.
-لا عادي بس ياريت متجيبيش كميرات المراقبة و تقصيها وتنزليهالي علي النت يعني.
-لا لا لا لا خالص انتي تعرفي عني كده يا يارا؟
-اعرف ده انا حفظاكي و حافظة الفيديوهات اللي بتنزليها لهبة علي النت.
تدخل كريم وهو يقول..
-انتي يا يارا جاية عشان تلعبي؟
-اه جاية عشان العب تعالي قولي اعمل ايه بقي.
تدخلت يسرا في الحديث بسرعة وهي تقول..
-تعالي أوريكي الصالة وبعدين اقعدي براحتك بقي.
وجهت يارا حديثها لكريم وهي تقول..
-١٠ دقايق بالظبط وهجيلك.
دخلت يارا و يسرا صالة الأيروبكس حتي ان يارا اندهشت وهي تقول..
-دي شكلها حلو اوي يا يسرا دي متكلفة جامد.
-شوفتي حلوة بجد؟
-دي تحفة مش حلوة بس...انا هبدأ الشغل من امتي بقي؟
-في ناس جات وحجزت يعني بعد بكره كده هتلاقي في ناس جاية.
-طب وانا هديهم حصة واحدة واروح؟
-حصه واحدة كل يوم.
-ايه ده !! ده وقت قصير اووي!!
-ما هو ناس بتجيب ناس بقي وكده و بعدين انتي ممكن تشتغلي هنا وتحت.
-تحت ازاي؟
-يعني تحت مع كريم و علي...وكمان في بنات بتيجي بتبقي عايزة مدربة بنت مش ولد.
-تمام وانا موافقة..هستلم امتي بقي؟
-بعد بكره تيجي و نبدأ بقي.
-تمام تعالي ننزل تحت بقي.
نزلت يارا و يسرا إلي الدور الأرضي..حيث انه كان مبني صغير يحتوي علي دوران فقط..اتجهت يارا لكريم وهي تقول..
-متأخرتش اهو.
-كويس عايز اتكلم معاكي شوية.
-طيب تعال نقعد و نتكلم.
جلست يارا و وقف أمامها كريم وهو يقول..
-انتي جاية عشان تلعبي ولا جاية عشان تشوفي الجيم؟
-ولا ده ولا ده.
-اومال؟
-جاية عشان اشتغل.
-بجد يا يارا هتشتغلي معانا هنا؟
-شوفت بقي ..والمفروض بقي بما اننا أصدقاء يعني تعلمني الشغل هنا.
-عيب عليكي ده انا هخليكي احسن trainer في مصر.
-ايوه انا عايزاك تنفخني كده يا كريم ..عايزة احس اني هعرف اعمل شغل عالي.
-هنفخك يا ستي.
-عارف يا كريم والله بحسك اخويا الصغير.
-وانا بردو بحسك اختي الكبيرة..بحسك عوض عن سالي اللي مش معترفة بيا.
-متقولش كده يا كريم ..سالي اكيد بتحبك انت بس بيتهيألك.
-يارب يارب يكون بيتهيألي..بقولك موبايلي نسيته في العربية تعالي نجيبه.
-يلا بينا.
خرج كريم ومعه يارا إلي الخارج حتي انهما وصلا للسيارة ..دخل كريم السيارة وهو يقول..
لقيته اهو يلا بينا.
كانت المفاجأة في السيارة التي وقفت امام سيارة كريم..
يا له من قدر جعل يارا تري خالد مرة أخري وليس خالد فقط بل معه ماهي...
خرج خالد من السيارة و طلب من ماهي الجلوس بالسيارة..كان خالد لم يري ان يارا مع كريم..فاندهش ايضا من وجودها معه..
حضن خالد كريم وهو يقول..
-عامل ايه ؟ وحشتني؟
-وانت كمان يا خالد بس عرفت منين اني هنا؟
-قولتلك لو عايز اعرف انت فين هجيبك..اهلا يا أنسة يارا.
-اهلا وسهلا يا مستر خالد..انا هدخل يا كريم.
تدخل كريم وهو يقول..
-لا استني هدخل معاكي.
رأت ماهي يارا واقفة بجانب كريم لم تستطيع ان تراها بدون ان تعرفها انها ستصبح زوجة خالد..خرجت ماهي من السيارة وهي تقول..
-ازيك يا كريم..اهلا يا يارا.
رد كريم السلام و ردت يارا لكنها وجدت سلسة بإسم خالد برقبة ماهي..لكنها تجاهلت الموضوع وهي تقول..
-ألف مبروك يا مستر خالد و مبروك يا انسة ماهي.
تدخلت ماهي وهي تقول..
-لا أنسة ايه بقي..انا خلاص بقيت مدام..أصل انا لسه جاية انا وخالد من عند المأذون.
-ألف مبروك يا مدام ماهي..بعد اذنكوا يا جماعة.
طلب خالد من ماهي الدخول بالسيارة فوافقت ماهي بدون مناقشات..بدأ خالد الحديث مع كريم وهو يقول..
-انا مش فاهم انت ايه علاقتك بيارا يا كريم؟
-ولا حاجة بس هي هتشتغل معايا هنا.
-هتشتغل معاك؟ ازاي يعني؟
-زي الناس زي ما كنا بنشتغل مع بعض في الشركة..وبعدين انت مالك بيها اصلا؟
-خليك هنا انا عايز اقولها علي حاجة .
دخل خالد المركز حتي انه اندهش من جماله ..ليجد يارا تجري علي المشاية وهي واضعة السماعات في أذنها و مغلقة عينيها..لكنه أطفئ الجهاز لتفتح يارا عينيها وهي تقول..
-في حاجه يا خالد؟
-اممم مش عارف بس كنت حابب اعزمك علي فرحي.
-شكرا يا خالد علي الدعوة!
-هتيجي؟
-ربنا يسهل.
-ولا مش عايزة تيجي عشان متزعليش؟
-ازعل ؟ علي ايه؟ ولا من ايه؟
-يعني تزعلي ان ماهي هي اللي فازت في الاخر.
-فازت بإيه؟ انا مش فاهمة حاجة.
-لا فاهمة و متسطعبتيش...اذا كنتي فاكرة انك معرفتيش توقعيني فرايحة تلفي علي كريم تبقي غلطانة.
لم تري يارا نفسها إلا ويدها علي وجه خالد تصفعه صفعة قوية..ثم خرجت من المركز لتجد خالد يجري ورائها وهو يقول..
-يعني اللي كنت متوقعله طلع صح !!
أدارت يارا وجهها وهي تقول بصوت مرتفع...
-انت بني ادم مريض ولا شارب حاجه؟ يعني انت عايز توصل لإيه مش فاهمة؟
-عايز اوصل اني احمي اخويا.
-اممم المرة اللي فاتت كنت بتحمي الشركة و المرة دي بتحمي أخوك!! انت فاكر نفسك مين؟
-والله انتي عارفة كويس انا مين .
-لا معرفش و مش عايزة اعرف شخصية زيك.
ثم أدارت وجهها لتذهب من أمامه لكنه أمسك معصمها وهو يقول..
-انتي عايزة توصلي لإيه؟
-انا اللي المفروض أسأل السؤال ده.
-ليه عايزة تبيني انك الأقوي؟
-عشان انا فعلا الأقوي..متحولش تبقي طماع يا خالد و تعوز كل حاجه..وانت فاهم الجملة دي كويس اوي..بعد أذنك.
وذهبت يارا من أمامه وهو مازال يفكر بعلاقتها بأخيه ليجد ماهي تصرخ من خلفه وهي تقول..
-انت ايه يا أخي عايز كل حاجة ليك؟
-في ايه يا ماهي خضيتيني!!
-خضيتك!! مشوفتش بجد انسان زيك يا خالد.
ذهبت ماهي ايضا من امامه لكنه وقف امامها وهو يقول..
-انتي اتجننتي صح!! في ايه؟
-في انك عايز كل حاجة ليك يا خالد.
-هو ايه اللي عايز كل حاجة ليك عايز كل حاجة ليك!! علي فكرة دماغك دي هتوديكي في داهية!!
-ماشي سيبني انا عايزة اروح في داهية ..عديني بقي.
لكن خالد لف يده علي يد ماهي وهو يقول..
-طب يلا نروح سوا.
-بطل رخامة يا خالد وبعدين انت هتفضل تجري ورا البت دي!
-اجري وراها؟؟ انتي اتجننتي صح؟ هو انا يوم ما اجري ورا واحدة هجري ورا واحدة نصابة.
وكأنه قد نسي انها لم تفعل شئ!!
-اومال تجري ورا مين؟
-تعالي نروح ناكل و هقولك انا بجري ورا مين.
                                 ****
ظلت يارا تبكي في الطريق علي ظن خالد السوء بها..لا تعلم لماذا هو يراها شخصية كاذبة؟ ..شئ غير منطقي ان تجد احد يكرهك بهذه الطريقة لكنها لا تعلم لماذا تشعر ان حياتها في الفترة القادمة ستتغير ١٨٠ درجة.
ركبت يارا سيارة الأجرة و رجعت بيتها لكنها قبل ان تصل البيت بمسافة بسيطة وجدت لوحات مكتوب عليها..
"بحبك يا يارا!!!!"
اللعنة!