رواية ورقة جوكر..[مكتملة]

الحلقة الرابعة و العشرون

#ورقة_جوكر٢٤
#الحلقة_الرابعة_والعشرين
"هشام؟ بجد انت ازاي عرفت اني هنا؟ وايه العلبة دي!"
كانت المفاجأة في هشام الذي جاء المركز..وكانت يارا مصدومة للغاية من ملابس هشام وايضا من العلبة الملفوفة الصغيرة..
بذلة من اللون الرمادي كان يرتديها هشام و أسفلها قميص من اللون الأبيض المفتوح..كان مظهره جميل بطريقة كبيرة حتي ان يارا سرحت به لبرهة..لتجد هشام يضع يده امام عيون يارا وهو يقول...
-يارا؟ انتي اتعملك تنويم مغناطيسي؟
-لا بس انا اول مرة اشوفك لابس بدلة حتي اليوم اللي جيت تتقدملي فيه مكنتش لابس كده!
-هي وحشة ولا ايه؟
-وحشة!! مطبتلش تلبس بدل يا هشام يخربيتك هدخلني النار..وبعدين ايه العلبة اللي انت ماسكها دي؟
مسك هشام يد يارا بتعمد ثم فتحها و وضع بيها العلبة الصغيرة ويارا مازالت مصدومة من طريقة هشام الغريبة!
اخذت يارا العلبة وهي ترجها لكنها لم تسمع أي صوت.
بدأت بفتحها لكن هشام استوقفها وهو يقول..
-اوعي تفتحيها يا يارا!!
توقفت يارا عن فتحها وهي تقول..
-هي مش ليا ولا ايه؟
-لأ ليكي بس افتحيها لما امشي.
-اشمعني؟
-هتعرفي بعد ما امشي..المهم بقي ايه المكان التحفة ده؟
-ايه رأيك و بعدين انت مين قالك اني شغالة هنا.
اقترب كريم من يارا وهو يقول..
-يسرا عايزاكي يا يارا.
ثم استدار لهشام وهو يقول بأبتسامة..
-اهلا وسهلا.
تدخلت يارا وهي تقدم هشام يكريم وهي تقول..
-ده كريم يا هشام زميلي هنا..وده هشام يا كريم يبقي صديق ليا.
سلم هشام علي كريم بإبتسامة وبعدها ابتعد كريم عنهما ليبدأ هشام الحديث وهو يقول..
-هو انتي بتعملي ايه هنا؟
-بشتغل اكيد يعني!
-لا يا شيخة!! منا عارف انك بتشتغلي هنا بتشتغلي ايه بقي؟
-مدربة.
-اممم ومين بقي اللي جيه سلم عليا ده؟
-ده كريم زميلي وبعدين منا لسه قايلة الكلمتين دول.
-ماشي.
-صحيح انت من امتي بتلبس بدل؟
-مش بحبها اصلا بس عندي فرح ولازم اروح ببدلة.
-طب ومش بتحب تلبسها ليه؟
-كده بحس نفسي عيل توتو اووي ومتسأليش ليه!!
-عيل توتو!! انت متأكد من الكلام اللي انت بتقوله! وبعدين رايح الفرح ببدلة زي ديه؟
-اومال اروح بأنهي بدلة؟
-مش عارفة بس دي شكلها حلو بزيادة.
غمز هشام ليارا وهو يقول..
-بتعاكسي؟
ضحكت يارا وهي تقول..
-يابني انت يخربيت غرورك! طب وانت جاي ليه بقي؟
-جاي عشان اخود رأيك فيها.
-لا حلوة وهتعجب البنات كمان.
ضرب هشام علي وجه يارا برفق وهو يقرمش انفه ويقول..
-يا رخمة!!
-مش ملاحظ انك اخدت عليا اووي؟
-اممم عادي يعني انا حر.
-يا بارد..المهم يعني انت جاي هنا عشان المصلحة صح؟
-انا لا خااالص..يابنتي انا جاي عشان اديكي الهدية بس!
-نفسي في مرة اخليك تعترف انك بتاع مصلحتك!
كان كريم يراقب يارا وهشام في صمت وهو يتذكر عندما تحدثت يارا معه عن هشام وايضا قالت له انها قد تركته..لكن لماذا يتحدث معها؟ و بهذه الطريقة..
استكمل هشام حديثه وهو يقول..
-متحوليش عشان مش هتعرفي.
-ماشي..وفرح مين بقي؟
-واحد صاحبي.
-مين يعني صاحبك ده؟
-هو حضرتك تعرفي صحابي كلهم يعني!
-متزوقش خلاص..يارب البدلة تتقطع منك وانت رايح الفرح.
-لا متخافيش مش هتتقطع ..انا همشي بقي و لما تفتحي العلبة ابقي قوليلي رأيك.
خرج هشام من المركز و ظلت يارا تنظر إلي مكان رحيله وهي شاردة..لتجد كريم يقول..
-ده بقي هشام؟
انتفضت يارا من مكانها وهي تقول..
-حرام عليك يا كريم!! فزعتني!
-معلش مكنش قصدي والله.
-ولا يهمك..اه هو بس مش عارفة هو ازاي بقي كده !
-بقي كده ازاي ؟
-متخودش في بالك بس تعالي بقي نفتح العلبة اللي هو جايبها.
شد كريم منها العلبة وهو يقول..
-سيبيني انا افتحها ونبي انا بحب الهدايا والجو ده.
فتح كريم العلبة ليجد خاتم صغير من الفضي و بجانبه ورقة صغيرة..أخذت يارا الخاتم وهي تقول..
-الله ده حلو اووي!!
-استني بصي في ورقة ..هقرهالك.
فتح كريم الورقه وهو يقرأ المكتوب بالورقة..
-انا عارف اني كنت سخيف اوي لما طلبت منك انك تتخطبيلي عشان مصلحتي..وعارف اني غلط لما سيبتك و بعدين روحت بيتك مع اني المفروض مكونتش اوريكي وشي تاني..و عارف اني كنت المفروض اعتذرلك عن كل حاجة ..بس مش عارف لما قربت منك الأسبوعين دول حسيت انك شبهي اوي يا يارا و كمان حسيت انك فهماني من قبل ما اتكلم..بصي انا عارف اللي بقوله ده مفاجاة بالنسبة ليكي بس انا قررت اني اخطبك بجد..اخطبك عشان يارا ..مش عارف ده حب ولا ايه؟ بس كل اللي اعرفه اني محتاجك جنبي و لو هحب حد مش هيبقي حد غيرك يا يارا..و الرأي رأيك.
ظلت يارا تنظر لكريم وهي مندهشة ثم أخذت منه الورقة فجأة وهي تقول...
-الكلام ده بجد!!!
-اه بجد يا يارا بس الواد هشام ده طلع رومانسي اوي اهو.
ظلت يارا تنظر للورقة وهي فارحة بطريقة غير طبيعية لا تعلم انها كانت تريد ان احد يجعلها تشعر بهذه الحياة ام لأنها تريد هشام ..تنفست نفس عميق ثم أخذت الخاتم وارتدته وهي تقول لكريم..
-هو فيه كده يا كريم؟
-ايوه ياعم اتغر بقي بس انا عايز اسأل سؤال لهشام!
-ايه هو؟
-هو عرف مقاس ايدك منين؟
ضحكت يارا وهي تقول..
-مش ده المهم...المهم انا ايه رأيي دلوقت في موضوع الخطوبة؟
أتت يسرا من خلفهما وهي تقول..
-يارا بعد اذنك عايزاكي جوا.
دخلت يارا مع يسرا الغرفة ..جلست يسرا علي مقعد المكتب ووجهت كلامها ليارا وهي تقول..
-بعد اذنك يا يارا لو حد عايزك ممكن تقعدوا في العربية بتاعت الضيف ده او ممكن تخرجه تقعدوا في الجنينة لكن بلاش نقعد في الجيم و متزعليش مني انا مش قصدي والله احرجك!
-متقوليش كده يا يسرا ..انا فعلا غلطت ..بس دي كانت صدفة.
-تمام وانا مقدرة .
خرجت يارا من الغرفه ثم اتجهت لهاتفها وارسلت رسالة لهشام وهي تقول..
"وانت عرفت مقاس ايدي منين؟" وارسلت جنبه وجهين يضحكان..
                                 ****
" يا مستر السكرتيرة الجديدة دي شغلها وحش اوي انا مش عارفة اشتغل معاها في أي حاجة "
قالتها رحمة وهي تتكلم مع خالد بالعمل..كانت هذه القتاة المستجدة ارهقت خالد كثيرا وارهقت ايضا رحمة لكن خالد لا يعرف ماذا يفعل..
-طب هنعمل ايه؟ الفترة دي احنا مش فاضيين نجيب سكرتيرة و نمشي سكرتيرة!
-يا مستر خالد رجع يارا ارجوك ..هي الوحيدة اللي كانت سريعة و مؤدبة في طريقة تعاملها!
-رنيت عليها بس مردتش!!
-طب هنعمل ايه دلوقت؟
-ابعتيلي البنت دي خلينا نشوف هنعمل ايه معاها.
انجي فتاة في أوائل العقد الثالث..سمراء بعض الشئ و لديها شعر ناعم مثل الحرير و جسد متوسط الحجم..كانت لديها تكبر شديد و غرور أشد ..دخلت غرفة  خالد ثم نظرت لرحمة نظرة استحقار لرحمة و قلبت نظرتها عندما نظرت لخالد..فهم خالد انها فتاة لعوب لا تريد العمل.. فهي فتاة تريد المال لا أكثر ام انها جاسوسة من منافس..طلب خالد من رحمة ان تخرج..وبالفعل نفذت رحمة أوامره...
وضع خالد ساقيه علي سطح المكتب ثم دخن سيجارته وهو يخرج ظرف من الدرج ..
-اتفضلي يا انجي الظرف ده ..ده فيه تصفية حسابك.
-ليه يا فندم هو حضرتك مش عجبك شغلي؟
نهض خالد من علي المقعد واقترب من انجي وهو يقول..
-هتقوليلي انتي مبعوتة من مين هزودلك المبلغ..هتعملي نفسك بقي متعرفيش حاجة هنقصه للنص..ها تختري ايه؟
انقلب وجه انجي وهي تقول..
-ايه ده حضرتك بتتكلم عن ايه انا مش مبعوتة من حد!
-خلاص انتي اللي اخترتي نقلل لننص.
هم خالد بالرجوع للمكتب لكنه وجد انجي تمسك يده وهي تقول..
-خلاص هقول بس تضعفلي المبلغ.
-ها؟
-انا مبعوتة من مدام ماهي.
-ماهي؟ ماهي مراتي؟
-ايوه يا فندم هي...بس حضرتك ياريت بلاش تقولها وانا مش هاجي هنا تاني ولا هكلمها تاني اصلا.
-وهي بعتاكي ليه؟
-عشان اراقب حضرتك و اشوف البنت اللي اسمها يارا دي بتيجي هنا ولا لا!!
-يادي يارا اللي عملالها هسهس في دماغها وانتي تعرفيها منين؟
-مدام سالي عرفتها عليا.
-كمان مدام سالي.
رجع خالد مكتبه ثم أخذ ظرف أخر من الدرج وأعطاه لأنجي وهو يقول..
-عارفة لو لقيتك ليكي علاقة بسالي او ماهي تاني؟
-والله مش هكلمهم تاني.
-اتفضلي و خودي حاجتك .
خرجت انجي من الغرفة وهي تحمد ربها ان خالد لم يقتلها بصريخه او يضربها...
خرج خالد من الغرفة و توجه لسيارته وهو يقول لنفسه..
"ماشي يا ماهيتاب بعتالي واحدة والله العظيم لتشوفي اللي هيحصلك"
وهرب إلي منزله..