جنون الصبا

الجزء السابع

السلام عليكم
نازك ألحمراني

- نبيل نخطف
عیونه تجري دمع

رجعت خطوتين ورى
بابا أنخطف أشلون
راح يقتلو أكيد دموعي نزلن أريد أستوعب معنى كلمة أنخطف لان مترجم

بچیت وبصوت عالي
ضاع وي صوت ماما الأعلى من صوتي

جدو تقرب شبك ماما كعدها عل قنفه أجى يمي سحبني يهدئ بيه

-يرجع جدو
أباوع عليه هو جدو يراد من يهدئه ويصبره على خطف أبنه جاوبته

-حيقتلو جدو صرخت أبچي

-يرجع بنتي مادام خابرو على فدية
يرجع

-بعد ما أضوج من عصبية بابا خلي عصبي علينا خلي يغلط ويضربنا ولا يصير بي شي

إجتي جنه،وجنى على صوتي كعدنا يم ماما سوه حاضنين نفسنا ماما وجهه يصوفر حملها كلش ثقيل هالفترة نسيت كلشي وحتى گلبي ألي يوجعني بيبي شابكه عمتي دنيا وتبچي جدو يصفك بيده يروح ويجي ألبيت كله مستنفر ينتضر

دخل خطيب عمتي  متفاجئ وكف يحاجي جدو وعيونه العمتي يباوع عليها وجدو يسولف وياه ترك جدوه واجى يمها يواسيها
ألكل نظراته شفقه ألنه ألقلق والتعب أخذنا
أليل كله مانمنا من ألتفكير
نعسنا والنوم مايجينا ماما كل شوي تصرخ وتيصح

-عمي شراح نسوي

أصوات نوح بيبي
كمت يمها و راسي بحضنها بلغت ألقلوب ألحناجر والدموع هي وسيلتنا

ألحد ألصبح رن فون جدو ركضنا عليه وكلنا أمل نريد نعرف مصير بابا فتحه وفتح ألمايك
وصوت المتصل يحجي بقبح وغلط

-أبنك عدنا أنريد فديه تلث دفاتر خلال أربعه وعشرين ساعه أن مانفذتو ينذبح حاله حال الخونه الذبحناهم

جدو يترجاهم
-بويه منو أنتم والله هو مو خاين والبارحه
چان دیقدم رجوع للجیش وجاي يترك شغلة ألترجمه هو طول عمرة يخدم البلد وحتى شغله لخدمة البلد والناس

-أسكت نذل دبرو ألمبلغ ياكلاب ياعملاء لك متستحي مربيلك خاين بيتك

- لاتسده خلي احاجي ابني
غلقه ذاك كعد جدو منهار يحاول يكون قوي

برغم الأهانات والسب ألي يكولها المختطفين له يصفك بيده ويردد

-هونها وتهون

سمعت ماما المكالمه نهارت أكثر واغمى عليها
دخلت خالتي أم سرمد رادت أسلم علينا شافت ماما واكعه دنجت عليهه

-أكعدي خيتي نداوي كولي ياألله
جبت مي خالتي بقت تشمر على وجهه بأيدها فزت ماما

-راح أبو بيتي راح يقتلو والله ميتركو

-ذبي قهرچ عند یتیمة أهل ألبيت
مكدرت أسلم كل شخص يدخل يسأل
يرجع يفتح جرحنا أكثر
تركتهم ركضت فوك السطح ألبيت يخنك
جدو ينغلط عليه ويذل نفسه ألهم
بابا مخطوف
ماما مريضه ...واني....