جنون الصبا

الرابع من التكمله

السلام عليكم
نازك الحمراني
جنون الصبا
يوزر الانستا  al_homrna)

حتى وأن كبرنا
فكل منا بداخله طفل يهوى الاهتمام
ويحتاج لمن يمد يده لنا ليساعدنا في أن نخطوا طريقنا في طرقات الحياة لنصل الى بر الامان
،،،،،،،،،،،،،،،،،،،،،،،،،،،،،
أنداريت عليها ردت أجاوبها هو جاوب عني

-البنيه وحيدة أبلد غريب منين تعرف احد أنتن دائما هيج النساء عدكم قرارات مستعجلة

سدت الفون وابتسمت بضوجة

-لاااا مو جنت أشوفك واكف مهتم كأنما تعرفها

رد بهدوء

-لاحول ولاقوة الا باالله وحضرتج كيف قررتي نيابه عني أنا مهتم..

-لاااا مااقصد بس اعتقد شايفتك لذالك هيج حجيت

-مااظن لان انا من الأشخاص اذا اشوف أحد او اي شخص حتى لو مجرد نظرة عابرة او موقف اذكره كلش زين

ردت
-اي انا همات مثل ذاكرتك كلش احتفظ بوجوه الناس الي اشوفها وبدقه المهم ماعرفتني بحضرتك او اسمك

مدت ايدها وهو هم مد ايده لابس كفوف سود جلد...

قدم نفسه
-لؤي استاذ لؤي مهندس حاسبات 'ماستر تكنولوجيا عصرية وطالب دكتوراه حاليا

جاوبته
-المهندسه سالي وطالبة ماستر تشرفت بحضرتك

-الي شرف ست

-بس؟

-بس شنو؟

-جنت تتصلين ليش كطعتي اتصالج

-ماكطعته بس المدير الأمني مجاي يسمعني صار دقيقتين احاجي ومايسمع مني رغم الكارت اشتريته من مكتب موثق هنا

-انطيني الفون اشوف الخلل

ناوشته الفون وبقى يقلب بيه 'انطا الها مد ايده وابتسم

-حليت الخلل

-شنوو الخلل

-سر  المهنة
صفنت بتصرفاتها ليش هيج تتعامل ويايه

شنو وراها ابد گلبي ممئطن الها رغم اشوفها ويه أم علي بأستمرار بس سبحان الله هذيج غير

يعني أنسانة حكيمة وفاهمة وتتصرف برزانة عود شنو معنى السوته شنو غايتها منه

جنت متخوفة ومتحذرة من ناحية لؤي
هسه صاروا اثنين سالي هم انضمت للقائمة

اي لازم انتبه عليها اكثر من لؤي لان هذا مجرد يعرض مساعدته عليه رغم هذا اشوفه انسان واضح والله اعلم بداخله ونواياه ؟

بس سالي لا ابد تتظاهر بشي وأحس بداخلها شي اخر ؟

الله يبعد كل نية سيئة من اي شخص تجاهي
طلعتني من موجة افكاري صوت أم علي الي اجت لزمتني