ضفائر صبريه

١٣...

#قصة_ضفائر_صبرية١٣

بقلم وئام علي ...

الحلقة ١٣...

تجرني وراها ومنا الناس تعاين ... و لساني مدري شبيه ثكل بس اريد احجي اريد اكلها عيب الوادم تعاينلنا .
انة امش بس هديني ..

امي حست بيه وخرت ايد منتوبة ومثل الي مغلوب عليهة ما بيدها حل منتوبة خلت هل مرة ابوي يأمر ينكشف علي..

عاينت لامي وااشر على منتوبة اريد اكلها ابنها ضيعني...

وكفنا لبيت الجدة عيون امي تهمل دموع..

كضيت ايد امي خايفة ....

- شوفي خية بتي اعرفها موش مكسرات عايفين المكسرات لولدج يجوز بتي مغصوبة و الله امر بالستر و هاي عرض ولدج غازي ومحسن خليها ببالج ...

انفتح الباب و دخلنا ومنتوبة تلعلع و حتى تفشر .
فضحتنا .

امي مكسورة مدنجة ..

اشرتلي الجدة للغرفة وهي تهدي بمنتوبة

- خية استهدن بالرحمن ع كيفجن وياهة هاي صبرية السلف مامش بعفتها

دفعتني منتوبة طكت كصتي بالحايط.

- هاي الله يستر منها ساكنة الجول و المكاطيع و السلابة رايحة جاية ...

و يا خوفي لا فضحتنا مرافجة من ورانا وورى خطيبها ..

امي تتوسل

- خية مبقيتي شي ببطنج خايبة بتي اخت ولدج شلفاج ما تضمين ببطنج ...

كاطعتها ...

- هم كولي جذب تحجون على تربيتي لولدي هاج تربيتج لبناتج دشي ولج خل نشوف منو الجذابة ...

بعيون تبجي دخلت و انة كاعدة كضيت ايد المرة و ااشر جني اكللها مو صوجي ..

- يمة شلفاج جنتي وردة ... شصارلج .

موش مصكدة منتوبة ....

هنا دخلت منتوبة وراها امي

- شوفيها بوجودي خافن تضميلها.

كشفت الجدة و رفعت راسها مصدومة ااااااخ يمة الناس تعاينلي جني متكصدة جني رايحة مسوية مكسورة برضاتي ...

رفعت الجدة وجهها ورجعت

عاينتلي وهي تنتر
- فزي كومي الله لا يبارج بيج فضحتي هلج...

ظليت اشهك اصيح مثل الخرسان و ين صوتي راح ...

ما ادري اذا صوج الضر ..

ما ادري شنهي عكد لساني ..

من ردت احجي انعكد لساني بجيت و بكلبي حيرتي حتى لو احجي صياح عصبجي يذبح خضر و انة اموت ولا خضر ينذبح ..

بدت ايدي تعوجب ما اعرفن شنو جرالي ولا اعرفن شنهي اسوي ..

امي مدنجة و منتوبة الي ما قبلت الا تدخل ويانا للجدة تولتني ضرب وفشاير . .