ضفائر صبريه

٢٥..

#قصة_ضفائر_صبرية٢٥
الجزء الاول الاخير .
بقلم وئام علي......

‌انكسر كل شيء داخلي .. فأصبحت حطام..
هشاشة ... و تشضي ... وايدي من تلملمني تحت التراب ..💔💔💔

وكفت سألتهم وداخلي احساس ذنب

- شبيه مجد..

باوعلي خالي و تحسر..

- ينظف سلاحة و ثايرة رصاصة بالغلط بصدره شطح مو خطرة ...

-يلة خوية فرقد الولد يحتاج وكفتنا...

جريت نفس وكلت لعمي..

- خاف يحتاج دم اجي وياكم..

عمي نجم رفع ايده و ضيك عينه..

- شتروح وانت اخذت البنية الي حاجي بيها لا بوية ابقى بعيد هو هيج ما يرتاحلك مو بعد ...

سكت وما كمل .. و طلعوا ...

احساس الذنب داخلي جبير بس احساس الحقد اكبر ...
غطى على شعور الذنب يمكن بقت بداخلي اثار قليلة من خضر الماهود القديم..

رحت شفت عمتي مكابلة تك الضفيرة الثاني الي يمها ..
جريت نفس وانة اخلي ايدي جوة الغطرة ( الجفية) للتك الثاني لضفيرة صبرية الي نعومة حرير شعرها ما ضايقني ولا تسببلي تحسس احسها قريبة مني وانة مرتاح لعطرها الي احسة بدة ينعدم بمرور الوقت...

شفتها تبجي وتنعي...

- يمة ..مشلوع كلبج يم البنات ونامي برغد يم الولد .. الخ.

شافتني وقطعت كلماتها و هي مدنكة ما تباوعلي مثل الي احس بعيونها عتاب وخوف لا اظلم بتها عفاف..

رجعت تبجي واحسها تبسمرني من جابت سيرة عفاف و تنوح بظليمتهة ..

بلعت ريكي و كورت جف ايدي وانة اعصر صابيهي حيل و رحت لبيبي ...

حسيت بصابيعها تمررهن بشعري وهي تذب الغطرة عن راسي ..

جرت حسرة وهي تتلمس الضفيرة الافها مثل لفاف( وشاح رقبة) على ركبتي...

- خضر يمة موش يصلح تعذب روحها هيج انت وام حمدية موش صالح الي جاي تسونة..

يولدي راحت لربها مظلومة .. كافي يوليدي اخذ هاي الظفاير ورجعهن لصويحبتهن ادفنهن يم كبرها يمة ..

رفعت عيون تعبانة من السهر وانة اطالعها ...

ونيت بحضن بيبي ..

- ما اكدر بيبي .... اريد حقي و حق مريتي ..
عايشين بامان الله اجت هاي وجه الصخلة ما صانت السر ضيعت مريتي وضيعتني . .

- اااخ يمة النساوين تحلف موش منهن محد حاجي لمنتوبة وولدها يولدي موش منهن لا تطم حظك وبختك وتضلم امك و مريتك عفاف ...

صفنت بحجاية بيبي

- مريتي ؟ .. بيبي ما تعرفيهن يكرهنها عفاف من الغيرة ضيعتلي مريتي و دمرتني و امي الكره عماها ...
دخلت امي وهي مدمعة