ضفائر صبريه

٢٤...

٢٤....
(
قصة_ضفائر_صبرية ٢٤
الجزء الثاني ..

جنت ادري ما نبقى سوى ..
دمعة وي ضحكة الشفة ....

الجنازة من تمشي بدرب ...
يندار وجه الزفة
مو حقي لو رد الوكت ...
اكفر بذيج الصدفة ...
*رائد ابو فتيان **************************************

- مجد ما اكدر اشرد ؟ احبك اكثر من عمري بس ما اريد اكسر ابوي وهو بكبرة كافي السمعة الصارت لابوي من ورى شغلة صبرية ...
افهمني ...
قاطعني .. وصوت لهاثه المغضب وصلني غمضت عيوني اواسي الروح و اشبع من صوته ..
ادري ما اكدر انساه وراح يبقى طول عمري مرافقني طيفه.. لانه حلم من الأحلام الي ما تحققت ...
- انت جبانة خذلتيني .. أستسلمتي مو اي استسلمتي ..
لعاداتهم خضعتي انت مثقفة شلون ترضخين ولج اوكفي وياي واطلعج من حلك السبع بس كولي اني وياك...
غمضت عيوني

- اسفة والله لاني مثقفة ايضا الهروب غلط اكبر غلط يا مجد مو من اخلاقي واخلاقك اهرب والطخ سمعة ابوية للمرة الثانية ...

تدري مجبورة مو بيدي بس اذا اشرد الناس ما ترحم هي صبرية مغتصبة و الناس اولت عليها حجي شكلك مرافجة و مصاحبة و اخذها صاحبها والي يكول سودت وجه اهلها ..

افهمني مجد ما اريد اصير الطعنة الثانية لابوي
ما اريد بكبره والناس تكول بتة الثانية نهبت وي صويحبها .. محد يرحم يا مجد هذا هو مجتمعنا شسوي ...

- غبية و جبانة اخذج اامنج يم قرايب لابوي و اطلع مفرزة احبسهم كلهم ما اتركهم الا بتعهد ما يتعرضولج ولا يجبروج اعقد عليج و نترك الهم حتى العراق اعرف اصدقاء خارج العراق تساعدني ...

نزلت دموعي ادري بامكانيته محدودة ورثه لابوه و ياه ورث امه ضاع استولى عليه خالي سهيل و ما تحمل الخسارة الشراكة اعتبر كم فلس لابو مجد بحوزته وياه ارض امه هو تعويض عن شراكة فشلت..

مجد يحلم ما يكدرلهم و انة اكتشفت ما املك شجاعة ...
ما اكدر اجازف ... لسببين ما اريد الطخ سمعة ابوية وهو بكبره كافي الفضيحة بحياته ..
و الثاني اخاف غازي ما يرحم والوصف الي وصفوه شلون قتل صبرية( صبرا ) يقشعر البدن ويزيد الخوف...

همست..

- اسفة اي انة جبانة مكدر اجازف لا تضوج مني وشوف طريقك بلي تستاهلك ...
انة حظي واعرفة مجد اني امي تبجي تكلي لا انت هم تكسريني ما تتحمل امي تموت والله هاي المرة اعذرني و ...

كبل لا اسده هو سده بوجهي وبهيج انتهى حلمي بمجد و حل محلة كابوس ....

خليت ايدي على خدي اضغط على عيوني ما اريدهن تبجي ...
- اش لا تبجين اشش وراج ايام سودة اي انت قوية رفعي راسج..

عصرت مخي و لحظي حتى مرضي هل مرة ما عاني جان الواقع المر و الصدمة الي عشتها تفوق الخيال وحسيت عقلي حيطك لاني انازع اريد اهرب لخيال...