ضفائر صبريه

مشهد

مسحت دموعي وانة بسكتة خاتلة ميريد يشوف وجهي ...

والسمعته خلاص اعلن موتي ونهايتي

اني من امه واخواته اغار عليه مو بعد يزوج ...

على كيف مديت نظري  من باب الغرفة الي هم بيها

شفته مخلي راسة بحضن بيبي ..

و يمه حمدية تفرج رجله من يتعب توجعه...

بيبي تقنعه ...

- يلة يمة محسن كافي البنية يتيمة على الله وعليك اذا غلطت جاهل ...

- سدي موضوع جليلة يمة انتهت من حياتي ...

مبقيها لان موش رايد اكسبن ذنب تشردها اذا طلكتها وطردتها

خليت ايدي على حلكي

- يمة بس كافي  عليش تشلع كلبي الشي قديم ذبة جوة نعالك يمة مجنت تعرفها وجانت جاهل

مو ابن خالتها شرحلك ضروفها

- ابد مو مبرر لهجمان بيوت ناس
بعدين عوفج من ماضيهة وحاضرها ؟

اولا ورى زواجنا مراسلة ابن خالها بغاية هجمان بيته

بسفري للعلاج انة كل لحظة افكر بيها بس هي موش بحالي تلعب من وراي لا وتكول لصحبانها موش ماخذني بنية انة موش كادرة اطلع وياكم شقق

ششوفيني يمة مكرن غيري ذبحها

لو حجيها علي ....

تكلهم  تزوجني عمري ١٣ وموش كادر ياخذني عبنه موش ازلمة كلبة رجيج ..

تقبلينها يمة انة الي خليت طفولتها كدام عيني ..  يمة شفتها روحي الي اثق بيها .

وطلعت موش عارف الي اعتبرتها هي الروح طلعت نذلة

يمة مجروح والنبي مجروح ....

- يعني ابني مامش فايدة ما ناوي ترجعها تشمرها معلكة حرام يبني

الله يحاسبك موش هيج ربيتك عبن ما ردتك قاسي مثل هلك ربيتك بماي عيوني

- يمة فهميني ... من اشوفن وجهه اشوفن خيانتها وغدرها

- فرخة ياهل يمة ..

- مو مبرر  عليش  تضمضمين ودافعين ..

يمة صارلي فترة اكلج دوريلي مرة ازوج وهاي للثواب مبقيها يمج  مامش عدها احد  الي بكلبي يمة انتهى ...

مات حبي الها .. 

- يبني موش عدل كلامك ظلم هلا هلا بظلم اليتيم

- يمة جليلة صفحة طويتها  رحتي لبيت ابو رجاء .. موش كتلج تطلبيلي بتهم

كضت بيبي خشمها وهي تعيب
-  عيع يا ريحة بيتهم وسخين يمة

- وبيت رياض بتهم شبيها شنو عذرج

- اهووو نوامة ضهاري و طلعتلي بكفشتها موش ام بيت يمة

باوعت لامي وسمعت شهكة من الباب لمحت عيون بلون السما

غمضت عيوني ودرت وجهي بعيد

- كليلها تروح ما اريدن اشوفنها من اتواجد تختفي كومي حمدية وخريها لا اكومن اجسرها لو نست اخر مرة شسويت بيها

تحول الشهكات لبجي ...

ونين مكتوم و خوف وحمدية تفتح الباب و تحضنها

- امشي يمة وتعلمي مني الموش رايدج عوفيه حبيبة انة وامي الج لا تخافين محد يشمرج بالشارع لو اعرفن اطلع بيج بيت وحد

صوت محسن يصيح

- حمدية شتخرطين

- سلامتك خوية عبنا نريدك مرتاح سوي التريدة  تعاي يمة ....

اخذتني بس مثل طفل متعلق بهلة عيني على محسن

غلق كل ابواب الامل يسامحني

سمعت صوتة يعليه يسمعني

- يمة اسبوع اذا مو بحضني مرة تزوجيني اروحن اخطب زينب بت نجم اخوج.

خليت ايدي على كلبي ...

💥💥💥

ورى ما طلع للشغل رحت للي جانت غرفة تجمعنا سوى
طلعت مكص وكفت كدام المراية
تاثرت بقصة صبرية الي ضفيرتها جانت هدية بعد موت لحبيب مهوس بيها
تمنيت هيج محسن يحبني بس اني غلطت وانظلمت ومحد يصدكني . 

ضفرت شعري ضفيرة وحدة و شديتة من فوك و من جوة   و باصرار كصيته

هاي ذكرى مني لمحسن

لان اني انسانة غيورة ما اكدر وحدة تشاركني بيه
الموت عمدي ولا اشوفه شلون جان يدللني يدلل غيري

خليت الضفيرة على المخدة طول بطول
و جواها قطعة قماش شرفي الي شمره بوجهي بكل قسوة

و طلعت للفضلة تنور طين لسة موجود و اوكات يخبزن بيه محسن يحب خبز بتنور طين
رغم اكو تنور غاز يستخدمنة بعض الاحيان خاصة خالة عفاف

اخذت دبة النفط ..
ليش هو محتار مبقيني ثواب يتيمة و ميريد ذنب اضيع واشرد

الافضل اموت و الظاهر مصيري مثل ايمن
ما النا قسمة بالنحب ولا النا بخت بدنية
و ناسها

ذبيت النفط علي حرورتة طككت جسمي
و انة اشعل بالجداحة الي عاندتني ...

- الموت اهون الي من اشوف غيري يمه