دراويش

دراويش ٥

#دراويش
بقلم #روز_الفياض
ح٥
.
.
.
مع قرب انتهاء الرحلة بدأت عيناي تعقد السلم مع النعاس ...
استسلمت للنوم بعد ساعات طوال من العيش مع تلك الذكريات التي لااعرف ان كانت جميلة ام حزينة ..
كل مااعرفه اني لم اجني منها ولم احصد بعدها سوى االالم والبكاء على الاطلال ..
وماان غفوت حتى زراني طيف امي وهي تستقبلني من بعيد وهي تبتسم وتقول لي :
ها يمه فؤاد ..
شلون ماتكلي انت جاي ؟ شلون تخليني اعرف من الناس الغرب ؟
وما ان تفتح ذراعيها لتحضنني حتى تختفي وتتركني وحيداً في مكان غريب ..

كعدت من النوم على صوت استاذ محمد وهو يسولف ويه زوجته ..
الرحلة تطول تقريباً ( ١٥ ) ساعة من الطيران ..
شكلي غلطت من حجزت طيران مباشر .. اتكسرت من الكعدة ..
لو حاجز ترانزيت احسن ..

في حوار طويل بيني وبين استاذ محمد عن الدمار الذي تخلفه الحروب في الاوطان اعادني الى حيث كنت ..
بديت اسردله العذاب والحرمان والدمار اللي اتعرضله الشعب العراقي خلال الحرب العراقية الايرانية ..
والي مالبثت ان انتهت حتى زُج الشعب في حرب اخرى مع الكويت ووصلنه لنقطه معينه واني اسردله انه الحصول على الماء والغاز والنفط كان شي الهاجس الاكبر ..

استاذ محمد :
طيب .. انت بتؤل ان الميه كان گوز اختك هو اللي بيتطوع يروح يگيبها من الگيران مش كده ؟؟
فؤاد :
صح .
استاذ محمد:
طيب يكيبها ازاي ؟؟
يعني الميه لما تكون بتگري غير لماتكون بكميات بسيطه ..
فؤاد :
جان ينقلها بسطوله ( گردل ) يعني عدكم بالمصري اسمه .. او بالجدوره شكو جدر عدنه زايد عن الجاحة كنا نستخدمه للمي ..
استاذ محمد :
طب دا بياخد وئت كبير .. يعني مهما گبتوا ميه مش حتلحئوا عالاستهلاك بالمقابل وكمان لو فضل طول اليوم يگيب ميه مش حيكفيوا وانتو عيله كبيرة كدا ..
فؤاد :
كان الاستخدام على قدر الحاجة الضرورية فقط .. يعني الاكل والشرب والحمام اجلكم الله ..
محمد استاذ :
طب بتستحموا ازاي ؟
او بتغسلوا الهدوم فين وازاي ؟
فؤاد :
كنا نجيب مي من الشط .. نهر زغير قريب ..
واصلاً الجو كان بررد قارص فبالسنة حسنة واحد يفكر يسبح خصوصاً انه احنه كنا معرضين لخطر القصف لان اغلب البيوت المحيطة فرغت ..
اهلها تركوها وانهزموا واحنه تقريباً الوحيدين اللي كنا نتحرك بالمنطقة ..
استاذ محمد :
وبعدين حصل ايه ؟
فؤاد :
بعدين تم ضرب احد البيوت القريبة الشي الي اثر على وصول المي للنقطة اللي كنا نستسقي منها .. وايضا الذعر سيطر على خواتي كون البيت اللي انضرب قريب من حيث المسافة على البيت اللي كنا نسكن بي .. فقررنه نترك البيت ونشد الرحال نحو مكان اكثر أمناً ربما ..
استاذ محمد :
رحتوا فين ؟
فؤاد :
رحنه للجامع ..
واتفاجأنه بكمية العوائل الموجودة هناك ... لدرجة فكرنه انه ممكن بالليل ماممكن يستوعب عدد الناس الموجودة واحتمال العدد يزداد لحد حلول الظلام ..
استاذ محمد :
لاحول ولاقوة الا بالله ... كمل .
فؤاد :
خلال وجودنه بالجامع تم توزيع مساعدات بسيطة عبارة عن طحين وشاي ومحضوظ اللي كان يكدر يحصل طبقة بيض ..
بعدها بكم ساعة حسينه بضيق المكان وانه المكان مكشوف خصوصاً بالنسبة للبنات لاتوجد جدران ولا حواجز تفصل بين العوائل هالشي ضايقنه حيل وقررنه اني وفراس وكريم انه نإخذ الاهل لمكان اخر ..
فعلاً انتقلنا لمزرعة لناس من اقارب كريم .. مزرعة للحنطة كبيرة وبيت كبير وكانت تقريبا احسن الاماكن الي سكنه بيها خلال الحرب لكون الطحين موجود ومن اجود الانواع من مزرعتهم كنا بالليل اثناء بدأ القصف نحاول ان نتسلى ونستغل الوقت ونتلهى بطحن الحنطة ..
وكان خلف بيتهم نهر صغير لذلك ماكنا نضطر نمشي مسافات بحثاً عن المي ..
كنا بالليل نتوزع على الغرف الموجوده بالطابق السفلي للبيت كل عائلة بغرفة منعاً للاحراج واذا اشتد القصف كنا نتجمع كلنه سوه ...
استاذ محمد :
ليه ؟
فؤاد :
مااعرف .. يمكن بالموت الجماعي كان نوع من العزاء .. او يمكن كنا نفكر انه نموت سوه احسن ميبقى احد عايش ويتعذب ..
استاذ محمد :
او يمكن احساس الانسان بالامان لما يكون في ناس تانيه حواليه  ..
فؤاد :
صدقت .. يمكن .
استاذ محمد :
الله يلعن الحروب واللي يسببوا الحروب ..
فؤاد :
آآه ... شكد ناس ماتت ..
استاذ محمد :
بس انت مموتش ..
فؤاد :
مرت علي ايام جنت افكر ياريتني متت ..
استاذ محمد :
ربنا ليه حكمه في اللي بيحصل اكيد .
فؤاد :
اكيد .. اكيد ..
استاذ محمد :
كل البلدان العربية شافت حروب ..
فؤاد :
لكن الخاسر الوحيد والمتأثر الوحيد هو المواطن اللي يعاني منها ومن ويلاتها ويتحمل الظروف والمآسي اللي تنتج عنها ..
استاذ محمد:
فعلاً .
فؤاد :
المهم بعدد مرور فترة مع اقارب كريم خفنه انه نكون ضيف ثقيل خصوصاً انه الوضع والضروف كانت قاسية جداً ومن جميع النواحي ...
المشكلة ماكان اكو مكان يتسع لهالعدد .. فالقرار الي وصلناله انه نرجع لبيته حتى لو كان جزء منه واكع ومتهدم ..