دراويش

الدراويش ١٧

#دراويش
بقلم #روز_الفياض
ح١٧
.
.
اغفالك عمر لو گتلي امرلك طيف ... ❤️
.
.
ثاني يوم رحت اني وحنان حتى اشوف اهل عذراء ونحجي بموضوع الخطبة واشوفها عن قريب رغم اني شايفها ..
بقيت كاعد يم اهلها نسولف عالوضع العام وعن التعويضات اللي الكل يحجي عنها ..
اما حنان فدخلت جوه يم عذراء وخواتها الاثنين الباقيات لان همه اربع بنات واخ واحد ..
بهالاثناء دخل اخوها هم اتعرفت عليه شاب زغير جامعي يحجي بحماس ذكرني بنفسي من كنت شاب ..
خلال كلامي مع اهلها وضحتلهم انه اني مااعرف وين راح استقر وانه اني احتمال ارجع لامريكا يعني في حال صارت موافقة لازم تكون عذراء حاسبة حسابها انه اكو احتمال اخذها ونروح لامريكا ..
ابو عذراء :
اني بحياتي مجبرت وحده بيهم على شي مرايدته وهسه هم بالنسبة لعذراء هي حره اذا وافقت واذا رفضت ..
فؤاد :
اني مااريد اكون غامض كدامكم على كولتها حتى بعدين متفكر اني غشيتها ..
ابو عذراء :
لا حاشاك احنه معرفناكم غشاشين ولاعرفناكم ناس مو خوش بالعكس الحجي دره وفراس وليدنه والله كلكم طيبين والنعم منكم ..
فؤاد :
رحم الله والديك عمي هذا من طيبك .

طلب ابوها مهر معين واني مفاصلته لان مااعرف شنو المهور اللي تعطى للعروس في تلك الفترة بعدين المهر المؤجر
او كما يسمى المؤخر وكذلك سكتت لان مااعرف قيمته ولااعرف منصف او لا فكتله :
مو مشكلة نتفاهم على كل شي بعدين اني مااعرف المهر هنا شكد لازم يكون .. لكن اني ماعندي مشكلة من الناحية المادية ان شاءالله لخاطر عذراء كله سهل .
ابو عذراء :
بس هي عدها شرط .
فؤاد :
كول عمي اني هنا حتى نحجي كل شي بصراحة .
ابو عذراء :
هي تريد تسكن ابيت وحدها .

محبيت الشرط لان هي تعرف انه اني مااكدر اعرف ابوي بعد كل هالسنين بالغربة .
فؤاد :
شنو السبب ؟
ابو عذراء :
احسن ياعمي يعني حتى تاخذون راحتكم .
فؤاد :
اني اكدر افتح بيت منفصل مو مااكدر لكن مااكدر اطلع واعوف الوالد .. انتو تعرفون اني بقيت بره سنين مااكدر من ارجع اطلع من البيت واترك ابوي كأنما حمله ثكيل علي ..
ابو عذراء :
لا احنه منكول حمله ثكيل لا بس حتى تاخذ راحتها .
فؤاد :
اني اعتذر .. هذا الشرط مرفوض جملةً وتفصيلاً .. ماممكن اترك ابوي واطلع ..
ابو عذراء :
هو الحجي يعني ميقبل اذا كتله اريد اطلع .
فؤاد :
الحجي ماله علاقة ولايتدخل بهيج امور لكن اني كشخص كفؤاد رافض هالموضوع وماممكن اتفاوض بيه .. الوالد قبل كل شي عندي .

سكت شويه ابوها بعدين كلي :
تريد اصيلحها تحجي وياها بهالموضوع ؟
فؤاد :
براحتك .. صيحلها .

دخلت امها صاحتلها واجت هي وحنان وكللها ابوها انه اني رافض موضوع السكن بعيد عن والدي ..
عذراء :
بس اني هذا شرطي .
فؤاد :
وهذا الشرط ميناسبني .. مااشوف اله داعي ..
عذراء :
شلون يعني ماله داعي ؟ يعني ماله داعي اخذ راحتي ابيت وحدي ؟
فؤاد :
وشنو المانع انه تاخذين راحتج بالبيت مالتنه ؟ منو وياج مزاحمج اشو حتى زوجة حماج هي اختج يعني المفروض تفرحين اكو مساعدة وتعاون ومراح تحسين بالغربة او الوحشة بعد الزواج وفي حال سافرت او طلعت اكون مأمن عليج لان مو حدج ..