دراويش

دراويش ١٨

#دراويش
بقلم #روز_الفياض
ح١٨
.
.
.
الحُبُ الذي يَصِلُ بِكَ الى حد البكاء لَمْ يَكُنْ كَذِبَاً يَوْمَاً ..❤
.
.
.

بعدما تكلمت مع عذراء وبعد محاولتها تبرر اللي صار .. غلست ..
محجيت شي لاحد لان بصراحة حسيت انسدت نفسي بعد اللي صار ..

بعدها بيومين جنت باجتماع مع محمود واعضاء الحزب عن دورنه في تشكيل الحكومة القادمة ..
استمر الاجتماع اكثر من ساعتين من الساعة عشرة للساعة ( ١٢ ) ونص يالله خلص .

من طلعنه رحنه للمكتب اني ومحمود ودريد فسألني محمود :
شصار من سالفة الخطبة ؟ شني خطبت لا ؟
فؤاد :
لا .
محمود :
هاا .. ليش ؟ شني طلعت كاشنه ( مو حلوة ) ؟
فؤاد :
هههه .. لا .. سالفة طويلة
دريد :
سالفتيش ؟ احجيلنه بالله ؟

اتنهدت كتله :
رحنه اني وحنان وكعدنه وحجينه وسوالف عادية اشو فجأة كالوا عدها شرط ..
محمود :
شنو الشرط ؟
فؤاد :
تريد بيت وحدها .
دريد :
هاي شني !
محمود :
هاا .. شكتلهم ؟
فؤاد :
بعد شكتلهم ..طبعاً لا .. اني مااطلع واعوف ابوي بعد كل هالسنين ارجع واعوفه هذا شلون حجي ؟
محمود :
جا كتلهم بعدين بالمستقبل ..
فؤاد :
بعد اني فقدت اعصابي واخذت حنان وطلعت .
دريد :
جا شني انت تريدلك حجه ؟ جا حجيت وياهم الكلام اخذ وعطا .
فؤاد :
مو اني مطلعت وعصبت الا بعدما خلصنه من سالفة البيت انوب ابوهل كال قسموا البيت .. وبعد كلام غثني بيه وضوجني ..
محمود :
عليمن تضوج .. قسمه الصارت خير على خير وان ماصارت هم خير على خير اكو غيرها جا شني بس هي مره ..
دريد :
عندي وحده ..
محمود :
شني ؟
فؤاد :
وحدتيش ؟
دريد :
عروس جا شني بعد غير عروس هههه ..
محمود :
منين ؟
دريد :
صاحبة المره .. موظفة واجتنه جم مره المره تمدح بيها تكول خوش بنيه بس ماعدها حظ وماجايتها قسمة زينه .
محمود :
خوش .. شوفها النه بالله لايبطل هذا اعرفه يريدله حجة حتى يبطل .
فؤاد :
ههههه ... هو انتو مورطيني مورطيني .
محمود :
يعني هذيج البت ماعجبتك ؟
فؤاد :
مو مسألة اعجاب بس هالشرط خلاني انفر منها ومن اهلها .. صح البنية خوش بنية واعتذرت هي وامها بس ابوها معجبني بالبداية شكل وبعدين شكل ثاني طلع.
دريد :
هسه دشوف هاي صاحبة المرة وبعدين عود قرر هم جبيرة لمقاربة لعمرك .. شلك بالزغيرة .. الجبيرة احسن .
فؤاد :
اني اصلا مااريد زغيرة .. اريد وحده مقاربة لعمري نوعاً ما حتى تستوعبني .
دريد :
خوش حجي .. اليوم احاجيلك المره واشوف شلون الخطة .
فؤاد :
اهوو صار بيها خطط .. اني اتشاءم من الخطط والمؤامرات .هههه .
محمود :
دريد .. مالك شغل بي انت شوف البنية اذا عجبتك اخطبها اله من يمك واقرا الفاتحة  .
فؤاد :
هههههه والله وبالله محد راح يورطني غيرك ..
دريد :
بعد حالك من حالنه شني تريد تظل مرتاح ههههه .

وره يومين اتصل بيه دريد :
اكلك عود خلي الشباب يجيبونك النه ليجاي ..
فؤاد :
وين ؟ للمكتب ؟
دريد :
لا للبيت شنسوي بالمكتب تعال اتغدى يمي ..
فؤاد :
لا شيجيبني .. اكلف عليكم غدا ..
دريد :
دتعال تعال انت شعليك بالتكلفه .. تعال خلي يجيبونك الشباب انه متانيك تجي .
فؤاد :
اليوم يعني ؟
دريد :
جا شوكت ؟ اليوم اي .. يالله هسه الساعة بالعشرة منا لثنعش اذا مااجيت اودي عليك ناس يخطفونك هههه .
فؤاد :
هههه لا لا ميحتاج خطف .. نجي شورانه .