دراويش

دراويش ٣٧

#دراويش
بقلم #روز_الفياض
ح٣٧
.
.
.

انه وصورتَكْ والليل ، وّجهك چان رابعنه ..
.
.
.
احسست بعظيم الشوق لرؤية عينيها ..
اما زلتِ جميلة وفاتنة ؟؟
يتسلل الدفء الى قلبي كلما تذكرتك ..
كلمات منك اتذكرها فتجعلني احلق في سماء العشق واهيم في غيوم الهوى واستلذ بذكريات جعلتني اسير حبك لسنوات ..

شوقي لآمنة كان يزداد يوم بعد يوم لدرجة اصبحت اشك بنفسي اني عاقل لو مجنون ؟
اكو حب هيجي ؟ لو بس اني هيجي من حبيت ؟
اني رجال عمري ( ٤٠) معقولة ماعندي سيطرة على مشاعري واني بهيج عمر ..

مكان عندي تفسير لحالتي غير احبها مو بيدي واحاول اقنع نفسي واكول ماالحب الا للحبيب الاولِ ..
بعد عدة ايام اتصل بيه فراس كلي :
حنان وافقت ورجعنه خبر للولد وطلبوا تكون الخطوبة والمهر بنفس اليوم بعد اسبوعين لان الولد عنده سفر بعدها ويه ابوه عنده علاج بالاردن يبقون تقريباً شهر ومن يرجع يتزوجون .
فؤاد :
بيها الخير ان شاءالله .. الله يوفقها وان شاءالله يطلع خوش ولد ويسعدها .. تستاهل حنونة .
فراس :
نسيت اكلك .
فؤاد :
شنو ؟
فراس :
عذراء مراسله ميسون .
فؤاد :
شتريد ؟
فراس :
تكلها اني غلطت واتعلمت من غلطتي وندمانه خلي فراس يحجي ويه فؤاد حتى يرجعني .. اني حبيته ومتندمه حيل لان تعبته وغلطت بحقه وضيعته من ايدي ومن هالحجي .
فؤاد :
لا والله ههههههه هههههه بشرفي هاي صلفة وجسره وعينها وكحة ..
هاي شنو من بشر ؟ شنو من مخلوقه لاكرامة ولا احساس .
فراس :
والله ماادري .. هي ميسون متحجي وياها من سالفة حمودي ومتجاوبها بس ولاهامها تبقى تراسل وتدز مسجات وتعتذر عبالك اللي صار بسببها شوية ..
فؤاد :
تولي .. هي واختها بينهم يتجازون يتصالحون يتعاركون كيفهم خوات وبينهم بس لااتدخلني بالموضوع لان اني مستحيل اتخبل بعد وارجع اعيد نفس الغلطه واتزوج وخصوصا منها هي .. شبيه قابل ماعندي عقل .. المؤمن لايلدغ من جحرٍ مرتين ..
فراس :
براحتك .. اني كلت ابلغك وانت بكفيك بس اني مثل رأيك هاي مو مال تتورط وياها من تريد تتزوج اختار وحده انت تعرفها وتعرف اطباعها مو يومين وكلبت عالبطانة ..
فؤاد :
هههه لا ماكو بعد لاهي ولاغيرها خلص التوبة .
فراس :
زين انت متكدر تجي للخطبة مال حنان ؟ لو عندك شغل ؟
فؤاد :
لا بعدني ممداوم ومنو يسألني اكله عندي دوام مالي خلك طلعات وروحات ورجعات بعدني مفتقدكم هههه .. ماادري والله اشوف ظروفي اذا اكدر اجي راح اجي ..
فراس :
براحتك بعد .. شوف وضعك واطينه خبر حتى نستقبلك بالمطار .
فؤاد :
الله كريم .. الله كريم .
اشوف الوضع واتصل بيكم ان شاءالله ..

مجان اللي خلك اروح للعراق مرة ثانية لكن حنان اتصلت بيه :
متجي؟
فؤاد :
وين اجي ؟
حنان :
لهنا .. للعراق ..
فؤاد :
بقيت عدكم سنة ممليتوا مني ههههه ..
حنان :
والله عبالك رمشة عين .. ملحكنه نشبع منك ..
فؤاد :
ولا اني والله .. هم ملحكت اشبع منكم ..
حنان :
غير سنين مشايفيك .. حتى اقل من سنة انت بقيت .. ومكانك فارغ نسولف يومية ونتذكرك .. نكول من جان فؤاد هنا ..