دراويش

دراويش ٨

#دراويش
بقلم #روز_الفياض
ح٨

اكثر مايؤلم الانسان هي الذكريات كيفما كانت ..
احزينة ام سعيدة ..
وقد عشت مع هذه الذكريات ١٤ عاماً من الالم ..
على امل ان تلتئم الجراح في يومٍ ما واطوي هذه الصفحة ..
.
.
.
بعد ضربات عديدة تلقيتها وصراخ وعويل من آمنة وبكاء هستيري دخل الضابط كريم وهو يصيح :
لك حيوان ..
شنو مخليها هنا ؟
ليش مخليها هنا ؟
اصلاً منو كلكم تجيبوها ؟
بكيفكم ؟ بسيطة ..
بسيطة اذا ماخليتكم تشبعون دك مثل المطايا ..
بسيطة .

راح لآمنة وفتح رباط ايديها :
مي .. مي جيبولها بسرعة ..
ايا حيوانات .. اني الكم ..
شنو علاقتها الدكتورة جايببها هنا وحاطيها ويه الخونة والمجرمين ؟
خلص لتبجين آمنة لتبجين ..
اني اروايج بيهم ..
اغبياء يعتقلون الناس البريئة المالها ذنب على مزاجهم .

التفت علي كلي :
كله منكم يا خونه .. يا عملاء ..
اصبرلي بس شوية اذا مخليت المسدس بحلك مو بجتفك ..
الا انظف البلد من امثالكم .

منهك القوى مابيه حيل اتنفس بعد كل هالضرب وبنفس الوقت مااريد احجي اي شي خوفاً على آمنة لان ممكن تتصرف تصرف موبصالحها اذا شافتني انضرب اكثر .

جابولها مي هزت راسها متريد دفعت الكلاص ..
كلتله :
عفيه لتخلوه ينزف اكثر راح يخلص دمه .. عفية داووه .. عالجوه .. انطوني اني اعالجه بس لتخلوه ينزف ..

صبت دموعها وهي تتوسل بي واني اهز راسي لا مااريدها تحجي باي شي يخصني لا زين ولا مو زين ..
شافتني بس بقت مصرة وظلت تبجي حيل :
عفيه .. عفيه ..
الله يخليك .. لخاطري ..
لخاطري شتريد مني اسوي اسوي شتريد مني اكول راح اكول بس لا تأذوه ..

كام وكف ودار علي كلي :
منو هاي ؟

هزيت راسي وكتله :
مااعرفها سيدي ..

رجع دار عليها كللها :
هو ميعرفج انتِ ليش تدافعين عنه واحد خاين مالج كل علاقة بي هذا اليوم اوعدج ينعدم وتتعلك لشته بالشارع حتى يصير عبرة لكل كلب يفكر يخون الدولة .
آمنة :
آني اعرفه ..
حتى لو ميعرفني اني اعرفه ..
ومو خاين مو خاين ..
ممسوي شي والله ...
ساعة السودة الاجه يخطبج آمنة ساعة السودة ..

ظلت تضرب على رجلها وتبجي ..
الضابط كريم :
هااا !!!
هيجي طلع الحجي !!

دار علي كلي :
طلعت جنت رايح تخطب آمنة ؟
هههههه لا يا كلب ..
ولك منو انت وشحاسب نفسك ؟

دار على آمنة كللها :
رفضتي مو ؟
رفضتي ؟

باوعتلي آمنة وهي تبجي اشرتلها بعيوني كولي اي ..
بقت ساكته وتبجي رجع سألها :
احجي دكتورة ؟

قبل متجاوب آمنة اندك الباب ودخل واحد عسكري :
سيدي عضو الفرقة ........

عرفت ابو آمنة اجه .