دراويش

دراويش ٣

#دراويش
بقلم #روز_الفياض
ح٣

مااطول الليل والتفكير يشغلنا .. مابين هواجس وافكار واماني الغد ومابين الالام وغربة وعذابات الماضي .. اين انا ؟
واين سوف اكون ؟
وكيف اصبحتِ بعد مرور كل هذه السنوات ؟؟
.
.
.
.
الليل شطوله وخاصة بالسفر ..
اريده يخلص ميخلص ...
اريد اوصل .. اريد
اشوف ابوي ..
اريد اشوف خواتي واخواني ..
اريد اشوف اولادهم ..
اقاربي ..
جيراني ..
اصدقائي ..
منطقتي .. محافظتي .. بلدي ...

اتمنى اغفى ..
مابقى شي كلها ساعات .. ليش مااكدر انام مثل الناس ؟
كلها نامت وغفت بس اني مغمض جذب ..

اتذكرت من رجعتي داومتي بعدما اختفتي كم يوم ورة ماجنتي ضايجة وتبجين ماادري شبيج ..

كاعد بنفس المكان انتظرج حتى احجي وياج بصراحة ..
اليومين اللي غبتي بيها خلتني اعيد ترتيب افكاري .. اني بهالعلاقة اعرضج واعرض اصدقائي للخطر ..
حبيتج صحيح .. لكن هالحب خلاني اناني كلما اريد اعوفج مااكدر ..
اتحلف واتحضر واقرر لكن وقت التنفيذ اتراجع ..
لكن هالمرة مابيها مجال بعد ..

كلما المح بنية جايه من بعيد اكول اجت بس من تبدي تقترب اعرفها مو انتي لامشيتج لا عيونج لا طولج لاكشختج ولا اي شي منج ..
ماكو وحدة تشبهج ..

راح تصير الساعة ثمانية وانتي ماكو ..
معقولة اليوم هم ماتجين ؟
كمت من مكاني واتوجهت لمكان تجمع الشلة :
صباح الخير ..

دريد ومحمود ورشا وتغريد :
صباح النور
فؤاد :
شلونكم ؟

كلهم ردوا بالحمد والشكر ..
فؤاد :
غازي وين ؟
دريد :
ماجاي لهسه ..
فؤاد :
شعجب ؟!!
محمود :
تلاكيه البارحة سهران يطبع ..

سكتت اكيد جان يطبع منشورات ..
بقوا يسولفون ويضحكون واني ساكت واباوع يمكن اشوفج ..
محمود :
ها مابينت ؟
فؤاد :
منو ؟
محمود :
سندريلا .
دريد :
ههههه هسه تجي خاف سهرانه مثل غازي تطبع هههه..
محمود :
تاليتكم شنو ؟

اتنهدت وكتله :
تاليتنه اليوم تبين ..
تغريد :
غلطتي اني قربتها وخليتها تحبك ..

رفعت راسي باوعت لتغريد :
هي بس اللي راح تتأذى يعني ؟
تغريد :
لا مو بس هي ادري بيك انت هم حبيتها واكيد راح تتأذى من تتركها بس ماادري احسها هي متعلقة بيك مثل الطفله ... تحبك حيل ..
رشا :
صحيح كلام تغريد .. متتذكر من نسيت الوردة بدفترك ظلت يومين متحجي وياي وبدها تاكلني بخزراتها ..

فؤاد :
بعد هالحجي مابي اي فائدة ..
وجودها ويانه راح يعرضها ويعرضنه للخطر ..
دريد :
يعني اذا تتركها يزول عنه الخطر ؟؟؟
لا الخطر موجود بيها وبلياها ...
فؤاد :
احنه بكل الحالات بخطر ... هاي منتهين منها ..
بس هي شنو ذنبها ؟؟
مااكدر اخليها تتحمل شي مالها ذنب بي ..
دريد :
ذنبيش يمعود ..
فؤاد :
دريد لتغشم نفسك ... احنه من مشينه بهذا الطريق خلص معناها لفينه حبل المشنقة حوالين رقابنه ... واحتمال اهلنه هم يرحون بيها بس الغريب شنو ذنبه ؟؟
تغريد :
اي بس تره انت مكبر الموضوع .. يعني هاي اني ومحمود شكد صارلنه سوه وهالشي ابد ماسوه بينه مشاكل بيوم من الايام بالعكس احس حبي اله كبر اكثر من قبل وهو نفس الشي ..