دراويش

دراويش ٣٦

#دراويش
بقلم #روز_الفياض
ح٣٦
.
.
.
يوجعني النفس من اتذكر صوركم .. 💔
.
.
بقيت يومين حالتي حالة حسيت نفسي خلص اتخبلت .. ظليت ادعي ربي يثبت علي العقل يارب ..
فؤاد ميت لو عدل ؟؟
اتذكرت كريم من اجه آخر مرة وكلي خابرج دريتي بي عدل !!!
معقولة فؤاد عدل وكريم جان يجذب علي حتى يحرك كلبي كل هالسنين ويعيشني بعذاب ؟؟؟
خلصت عمري احساسي بالذنب ياكل بكلبي وكل فقير اشوفه بالشارع وانطيه انطيه بثواب فؤاد ..
معقولة هالحجي لو اني بعد عندي امل وافسر الحجي بكيفي ؟؟؟

بعد يومين من الانتظار وصل سيف ..
من اتصل بيه كلي طيارتي اليوم توصل رحت قبل الموعد بساعتين وبقيت انتظر ..
لحد مطلع روحي راحت مني ..
من شفته بجيت بجي بالمطار كل الناس ظلت تتفرج علي واني حاضنته وابجي ..
سيف :
ماما شبيج مابيه شي مو رجعت ..
آمنة :
شلعت كلبي ليش ياماما ليش ..
.
.
بيومها بالليل دزيت مسج لفؤاد ..
او للشخص اللي يمثله ويدعي انه هو فؤاد ..
احيانا يرزقك الله معرفة اناس تقضي نصف عمرك متسائلاً لماذا عرفتهم ثم يحدث امر بعد سنوات فتدرك ان الله جعلهم في طريقك يوماً لان وجودهم نعمة من اكبر النعم في حياتك حتى وان كانوا غائبين ..
شكرا لانقاذك حياة ابني )

جاوبني وره شوية :
( لاشكرا على واجب .. اني رديت الجميل مو اكثر .. ) ..

بقيت صافنه عالمسج هواي حسيت ردوده رسمية  فكتبتله :
( واكثر من الجميل .. )
فؤاد :
مفهمت شتقصدين ؟
جاوبتني :
خليت سيف ميعصالي امر ههه .
فؤاد :
الله يحفظه الج ..
آمنة :
سبحان الله سنين انت بعيد عن العراق من طلعت اني انت رجعت ..
فؤاد :
يمكن هيجي احسن .. يمكن لو كنا في نفس المكان راح نكره بعض ..
آمنة :
ليش نكره بعض ؟
فؤاد :
لان انتِ اختاريتي كريم .. اتزوجتي كريم .. واني عندي ثار وياه شتتوقعين تكون النتائج ؟؟
آمنة :
اختاريت الخيار الوحيد المتاح .. مجانت اكو اختيارات ثانية ..

قهرني كلامه .. يمكن من حقه يلومني عالصار وياه بس ماله حق يحكم علي ويتصور اختاريت كريم بأرادتي ...
سكتت وخليت ضيمي بكلبي ..
هو كلامه وياي رسمي .. معذور طلع وارتاح لاكريم ولاغيره اتزوج واستقر وكون عائله مو مثلج حياتج اتوقفت على الماضي وذكرياته ..
عيشج كريم سنين بالعذاب على شي ماضي ومجان متأكد منه وتالي طلع الماضي موجود وعايش ومستقر وعذابج راح بالشط
الله كريم ..
بقيت افكر بكل اللي صار ... عبالك حلم .
يومين اروح للعيادة وارجع بالي مشدوه .. ماعندي تركيز ..
احس نفسي مراهقة ..فرحانه لان طلع حبيبها عايش ..
اشتغل واضحك ويه نفسي ..
كل شوية اتذكر حجاية من حجينه وابتسم لاارادياً ..
شبيج آمنة ..
تره انتِ مو زغيره .. عمرج اثنين وتلاثين سنة ..
شعرج انترس شيب ..
عيونج ذبلانه ..
رغم صارلج يومين متحسنه .. من عرفتي بي عدل .. بس بعدج متزوجة كريم ..
كريم اللي مستحيل يطلكج .. تعرفين كريم كله بالعناد يمشي اذا ردتي الطلاك لازم تتحملين المعاناة اللي راح تشوفيها ويه كريم ..
اني هسه شمنتظرة ؟؟
ليش ماارفع عليه قضية ؟
لازم استغل الوقت .. اكون حره باسرع وقت .. اعيش كم يوم بدون هم وقهر والم وخوف ..
بس لازم اشوفلي محامي شاطر يساعدني ..
.
.
بعد هاليومين كعدت الصبح على مسج من فؤاد يسألني اذا بيت اهلي بعده معروض للبيع ..
جاوبته وكتله البيت ابيعه لشخص مستقل مااريد اتورط مع واحد من الاحزاب بس هاجمني وذكرني بكريم وبحزب البعث ..
انقهرت بس هم رجعت واسيت نفسي انه هو ميعرف شي عن حياتي مع كريم ..
عزاني بأبوي وبغيث اللي جان ميعرف بي مقتول .. وحتى ابينله سبب رفضي لكل ما اله صله بالاحزاب كتله غيث انقتل لان بعثي رغم غيث مااذى بشر هم هذا الطريق هيج نهايته ..
بوقتها يمكن اخذها على نفسه بس كتله مو ذنبي اذا هو شايف هالكلام يشمله ..
سألني :
ذنب منو ؟
آمنة :
ماادري .. اذا تتذكر اني حذرتك من زماان من هالطريق ..
فؤاد :
من زمان شوكت ؟
آمنة :
قبل .. من جنة بعدنه زغار بالكلية ..