دراويش

دراويش ٢١

#دراويش
بقلم #روز_الفياض
ح٢١
.
.
.
في بعض الاحيان رسالة واحدة تصلك في ساعة قلق تعيد لك طمأنينة عمرٍ بأكمله ...
.
.
.
جابوا ابن كريم مجتف ومعصبين عيونه كعدوا كبالنه عالكرسي ..
دريد :
هاا سيف ؟ شلونك ؟

من كال اسمه دريد عرفت دريد جان يعرف بموضوعه من قبل ميجيني ..
سيف :
زين ..
دريد :
هاا .. زين ؟ خوش مادام زين .. احنه قابل شنريد منك .. نريدك زين  ههه ..

بقى سيف ساكت ..
فؤاد :
ابوك شلونه ؟
سيف :
ماادري .. علاقتي بي مقطوعه ..
فؤاد :
امم ليش بالله علاقتكم مقطوعه ؟
سيف :
لان اشتكى على امي واتهمها خطفتني وحرض اهل امي سهام عليها هم اشتكوا عليها وكالوا خطفتني ..
فؤاد :
وهي جانت خاطفتك ؟
سيف :
هاي امي .. اكو ام تخطف ابنها ؟

غثتني حجايته كتله :
مو امك .. انت ابن كريم النذل ..

بقى ساكت ..
دريد دار علي كلي :
ابوه الجلب شسوه بيكم .. شوف الدنيا شلون دواره .. هسه يجي مثل الجلب يتوسل حتى نعوف ابنه بس والله مننطيه الا يجي بنفسه ..
سيف :
هو اذاكم اني شنو ذنبي ؟
فؤاد :
ابوك دمر حياة ناس هوايه وضيع سنين عمري وشبابي وحرمني من الشي الوحيد الي جنت اريده ..
دريد :
دكتور بعد انت المسؤول عنه .. عندك شي تريد تعرفه منه ؟ عندك سؤال ؟ براحتك .. احنه جبناه علمودك ..

اخذوا سيف رجعوه للغرفة .. حسيت ضاك صدري اشرت لدريد نطلع ..
رجعت البيت ساكت وبداخلي حقد وغضب جبير مكدرت اسيطر عليه بس فتت للبيت سمعت الجهال يلعبون صيحت عليهم :
بلااا صوووت .. شنو هالدوخة هاي ؟

سكتوا وابوي وفراس وعذراء ظلوا صافنين بوجهي ..
صعدت ابدل ملابسي اجت وراي عذراء :
شبيك ؟ كمزتنه ؟
فؤاد :
مابيه ..
عذراء :
لعد ليش عصبي ؟

رديت عليها بعصبيه :
موو عصبي ..
عذراء :
لعد هاي شنو روحك بخشمك ؟ شكو ؟ متعارك ويه احد ؟

هزيت راسي لا ..
عذراء :
لعد شنو ؟ سمعت شي عن التعويض ضوجك ؟
فؤاد :
الله اكبر .. انتِ ماعندج غير موضوع التعويض .. ماكو تعويض انسيه ميشملني القرار ارتاحي ..
عذراء :
وشدعوه عليك قابل اني راح احطه بجيبي .. والله يالله ..

نزلت جوه وبقيت اني اغلي ..
حاولت اهدأ شوية وبعدين نزلت ..
الجهال شافوني خافوا وسكتوا .. كسروا خاطري .
دنكت بوستهم كتلهم لعبوا براحتكم ..

فراس :
شبيك اليوم ؟
فؤاد :
مابيه .. دايخ شوية .
ابوي :
اخاف ضغطك مو تمام ؟
فؤاد :
والله يايابه ماادري ..
ابوي :
عذراء سويله جاي نومي او عصريله ليمونه وخل يشربها ..

كامت عذراء للمطبخ واني صفنت اتذكر آمنة وافكر ياترى هسه شلون صار شكلها ؟ شراح تسوي من تعرف ابنها معتقل ؟
لا مو معتقل فؤاد لان المعتقل لازم تكون عنده تهمه وهذا ماعنده شي تهمته كريم ابوه .. تهمته ابوه سرق احلامك واخذ من ايدك البنية اللي تحبها واخذ منك لمة الاهل وانطاك غربة وتعب وضيم وفراق .. تهمته انه ابوه واحد ميخاف الله ..