دراويش

دراويش ١٩

#دراويش
بقلم #روز_الفياض
ح١٩
.
.
.
انه لو ادري بضياعي يصير منك .. مااحبك .. 💔
.
.
.

بعد مخطبت عذراء طلبت فترة خطوبة اقل مايكون ( ٣ ) شهور طبعاً اني ماعندي مانع لكن ابوي وفراس والبنات معجبهم هالحجي .
ابوي :
ليش هالتأخير يعني ؟ اكو سبب ؟
فؤاد :
لا ماكو بس يعني .. تريد فترة تعارف البنية .. حقها .
فراس :
انوب شنو هالفلم ؟ تعارف شنو تتعرف عليك بعد الزواج شيريد يصير يعني .
فؤاد :
مو مشكلة .
حنان :
والله ماادري .. اشو جنها مصختها بالدلع .
فؤاد :
بعدنه مشفنه خيرها من شرها .. كولوا يالله .
.
.
عذراء :
اشو متجي تشوفني ؟
فؤاد :
تعاي انتِ .. تعاي هنا حتى اشوفج .
عذراء :
عود ليش ؟
فؤاد :
شنو ليش ؟
عذراء :
ليش الا اني اجي ؟
فؤاد :
عادي يعني .. شكو بيها انتِ مو جنتي تجين لهنا كل فترة ؟
عذراء :
لا .. مو عادي .. انت بعدك ضايج من الكلام اللي گاله ابوي ؟

سكتت شوية كلامها صحيح بس مردت نبدي بنكد وزعل فكتلها :
لا .. مو صحيح .. الموضوع انتهى وراح بس بصراحة استحي ومااخذ راحتي عدكم .. ولازم اجي ووياي حراسة .. هاي سالفة .
عذراء :
بس هاي ؟
فؤاد :
يعني هاي شوية ؟
عذراء :
اففف ... اوكي اوكي اني اجي امري لله .
.
.
.
مر الشهر الاول من الخطوبة والثاني ودخلنه بالثالث وخلال هالشهرين اللي مضوا سافرت اني لامريكا حتى اقدم اوراقها على اساس زوجتي حتى اكدر اسحبها بالمستقبل وكان عندي كم شغلة خلصتها ورجعت للعراق قبل الزواج ب ( ٣ ) اسابيع حتى اكمل اموري ..
عذراء :
اريد غرفة اخشاب نجارة .
فؤاد :
نجارة .. اني ماافتهم بهالامور اشوف فراس اذا يعرف ورشة نجارة زينة ..
عذراء :
شوكت نطلع نشتري فرش وبردات وباقي السوالف .
فؤاد :
منو يطلع ؟ اني مااطلع للسوك على هيج سوالف .. شنو رجال شكبرني ماخذج السوك الشباب تتفرج عليج علمود بردات !! ماكو هيج فلم ..
عذراء :
يعني شنو مااطلع ؟
فؤاد :
لتشغلين نفسج بهيجي امور حنان وجنان كل شي جابوا وكل شي رتبوا انت بس عليج بنفسج جهازج وذهبج هاي اللي تطلعيلهم .
عذراء :
كله منك تأخرت هواي وين اكو غرفة تكمل ب( ٣ ) اسابيع ؟
فؤاد :
تخلص لتستعجلين ..
عذراء :
زين ميسون كالت عمو كال النه الغرفة الفوك .. صدك ؟
فؤاد :
الظاهر هيج .. اصلا ماكو غرف فارغة جوه ..
عذراء :
ادري انت كل شي ماتدري ؟
فؤاد :
تره البارحة رجعت .. بعدني مجريت نفس .. اذا ضايقنه الوقت ممكن نأجل فد كم يوم مو مشكلة ليش خايفة انتِ ؟
عذراء :
اريد كل شي يكون بيرفكت .. كل شي مثل مااني اريد ومثلما جنت اتمنى .
فؤاد :
شنو تتمنين ؟
عذراء :
اتمنى اكون احلى عروس وعرسي احلى عرس كون الكل يكول مشايف هيج عرس .
فؤاد :
ههههه شنو يعني مشايف هيجي عرس ؟
عذراء :
ادري غير متزوجة دكتور .. غير لازم يكون زواجي على مستوى ؟
فؤاد :
دكتور مو وزير ههههه .
عذراء :
لا ليش مو وزير انت هسه مو بحزب ........ مو الهم ضلع بالحكومة ؟ يعني ليش متصير وزير ان شاءالله يخلوك وزير الصحة واني اصير مرت الوزير .
فؤاد :
هههههه ماشي ماشي .