دراويش

دراويش ١٤

#دراويش
بقلم #روز_الفياض
ح١٤

ســأبقـى أطلبــگ مــن اللــه بطريقــةٌ مستـقيمـة ...
فهـو وحــده القــادر علـى أن يلــوي خطــواتگ نحوي 🙏 ❤
.
.
.
.
حنان بقت يومين متطلع من الغرفة ولاتكعد ويانه ولاتروح للدوام بالبداية كلت خليها ترتاح خليها براحتها بس بعدين رحتلها دكيت عليها الباب كالت :
فوتي ميسون ..

رجعت دكيت الباب كالت :
فوتي شبيج الباب مفتوح ..

هم رجعت دكيته كالت :
اهووو مالي خلك سوالفج تره اريد انام .
فؤاد :
اني فؤاد .

اجت بسرعة فتحت الباب ومبين عليها عيونها مورمه من البجي كتلها :
انعم الله عليج سويتيني ميسون ..

ضحكت وطاحت دمعتها .. قهرتني وكسرت خاطري اخذتها بحضني كتلها :
اهون عليج اكعد وحدي وانت هنا بالغرفة كاعدة وساده عليج الباب ؟
حنان :
لا والله بس مالي خلك ..معدتي تأذيني صار يومين ماادري شبيها .

اتنهدت حيل وكتلها :
ماكو شي يدوم للابد لا الحزن يدوم ولا الفرح يستمر ..
دوام الحال من المحال ..
امشي خل نكعد بالشمس ..

خلت حجابها على راسها وطلعنه كعدنه بالحديقة كتلها :
لاتزعلين من فراس ..
فريس عصبي صحيح بس يحجي لمصلحتج يخاف عليج .. يريدج تعيشين حياتج ..
تتزوجين ..
تصيرين ام ..
تكونين عائلة ...
ميريدج تتكسرين ويمشي بيج العمر وتالي تضطرين تقبلين بواحد متزوج او ارمل او مطلك وعنده جهال ويشترط عليج ميريد بعد طفل ويريدج خدامة اله ولجهاله بس .. ميريدج تظلمين نفسج ..
حنونه لازم تنطين فرصة لشخص يدخل لحياتج حتى تنسين .. اذا تبقين رافضة الموضوع تره مراح تنسين ولاتعيشين ولا تضوكين طعم الراحة ..
اخذيها مني ...
انطي مجال شوية لنفسج حتى تتقبلين غيره .. جنتي صغيرة من اتزوجتي لذلك معذورة متكدرين تنسين لان هو اول رجل دخل حياتج ... ماالومج ...
بس حاولي تفكرين بايجابية اذا هذا الولد اللي اتقدملج اخر واحد بعده رايدج ولازال عنده امل ...
مابيها شي شوفيه .. خل يجي وشوفيه ...
احجي وياه ..
انطي لنفسج فرصة تعيش تجربة جديدة واني متاكد انه الله راح يوفقج وتعيشين مرتاحة لان انتِ طيبة واتحملتي وصبرتي والله سبحانه وتعالى يكول ( وبشر الصابرين ) ..
فكري بالموضوع اخذي وقتج ..
حنان :
الله كريم

خليت ايدي على جتفها كتلها :
شرايج ترحين وياي ؟
حنان :
وين ؟
فؤاد :
لامريكا بعد وين هههه .
حنان :
ها هههه لا ويني ووين امريكا خليني بمكاني احسن هههه .

بعدنه كاعدين اندك الباب فاتت حنان جوه واني فتحته واحد من الحراس جماعة محمود كلي :
دكتور تليفون الك ..

جماعة محمود كان عدهم تليفون ثريا للتواصل مع محمود ..
اخذت التليفون كلت :
الو ؟
محمود :
الو هاا فؤاد .. محمود محمود وياك .
فؤاد :
هلو هلو شلونك ؟
محمود :
الحمدلله انت شلونك ؟ شخبارك ؟
فؤاد :
الحمدلله .. انت شخبارك ؟
محمود :
عوف اخباري على صفحة اتصلت علمود كريم .. هذا الرائد ... رجل آمنة ..