دراويش

دراويش ٤٤

#دراويش
بقلم #روز_الفياض
ح٤٤
.
.
.

شايف من تـحب بس تـستحي من آتكول!

وتـضل خـجلانه روحـگ بـينك وبـينك!
.
.
.
رجعنه بنفس اليوم ..
لكن الطريق حسيته شطوله بالرجعة ..
جبت الطريق كله ابجي ..
كل شي بحياتي يبجي .. شهكاتي جانت عالية شكد حاولوا بالسيارة يسكتوني لكن مسكتت ..
والي جان يخليني ازيد بالبجي اشوف فؤاد كل شوية يمد ايده بسكوت ويمسح عيونه ..
هو هم مثلي .. مثل حالي ..
ربي الك المشتكى مااحجي بعد ..
شوية شوية سيطر علي النعاس ..
خليت راسي عالشباك وغفيت ..
حلمت بأم فؤاد مشفت وجها بس شفت مره لابسه ابيض وبيدها مثل عصايه تتجى عليها ..
سلمت عليها كتلها عرفتيني كالت :
اي شلون مااعرفج يومية فؤاد يسولفلي عنج .. امشينه خل نكعد ..
كتلها وين كالت يمي بغرفتي خل اشوفج البيت الكاعده بي ..
مشيت وياها وصلنه لقصر جبييير وبي درج عالي كلما نمشي تكول بعد لحد موصلنه للقمة ..
اكو غرفة فوك معزوله وحدها كالت هاي غرفتي .. دخلت وياها شفت كل شي لونه ابيض .. كتلها اذا ابات عندج وين انام ؟
كالت هاي عندي جرباية ثانية .. اجيت اريد انام عالجرباية كلتلي لاااا لتنامين .. كتلها ليش مو هذا المكان اليمج فارغ خليني انام بي كالت ومنو يبقى يم فؤاد ؟؟ كتلها كلهم يمه كالت لا رجعي رجعي وسلميلنه عليه ..

فزيت من نومي بس كمزت ..
شفتهم كلهم يمي والسيارة واكفة يم باب البيت وفؤاد لازمني من وجهي وايده على خدي ومبين عليه الخوف والقلق .

ظليت لثواني متخشبة ماادري شكو اسمعهم يكولون الحمدلله ..
الى ان فؤاد ترك وجهي ودار وجه يمسح عيونه ..
كعدت عدل مرعوبه ..
ام رقية :
ام سيف حبيبتي حاسه بشي ؟

هزيت راسي لا وكتلها :
لاا .. شصار ؟ شوكت وصلنه ؟
ام رقية :
ماصار شي .. قبل شوية وصلنه بس انت جنتي نايمة ومكعدتي من كعدتج خفت وخوفتهم وياي ..

كلهم صافنين بوجهي ..
آمنة :
مابيه شي ..
محمود :
مابيج شي خويه بس ام رقية خوفتنه .. الحمدلله على سلامتكم وزيارة مقبولة ان شاءالله ..
آمنة :
الله يسلمك .. اللهم آمين .

من ردت انزل من السيارة راساً فؤاد اتلكاني عبالك راح اوكع ..
باوعتله كتله مستغربة ..
اتذكرت الحلم كتله :
الوالدة الله يرحمها تسلم عليك ..
فؤاد :
الله يسلمج ويسلمها ..

شوية وانتبه كلي :
يا والده ؟
آمنة :
والدتك الله يرحمها ... من غفيت حلمت بيها ..

ظل يباوعلي كلي :
شوكت ؟
آمنة :
هسه بالطريق واحنه راجعين ..

حجيتله الحلم ظلم يبجي ... بقوا محمود ودريد صافنين بوجهي بعدين فؤاد كلي :
خل نروح للمستشفى ..
آمنة :
يامستشفى ؟ شبيك دكتور ؟ مجرد حلم ..
محمود :
هاي رؤيا ..
آمنة :
حلم او رؤيا المهم اني مابيه شي مااحس بشي شصار فهموني ؟
دريد :
غبتي عن الوعي الظاهر بالسيارة مو نمتي .. لان من غمضتي ام رقية عبالها نمتي من كالت نمتي سكتنه حتى نخليج ترتاحين بس طول الطريق مافزيتي ولاحتى من وصلنه حسيتي كعدتج ام رقية ندهتج صاحت عليج ماكو .. صاح عليج محمود انه صحت ماكو ..
نزل فؤاد شاف النبض موجود حاجاج ماتسمعين ولاتكعدين بس ظل يضربج على وجهج لحدما كعدتي ..