دراويش

دراويش 29

#دراويش
بقلم #روز_الفياض
ح٢٩
.
.
.
الوجع الذي يسكن قلبي منذ سنوات لاتوازيه كلمات ولاتصفه عبارات ..
كنت في كل يوم اكبر مئة عام ..
غزاني الشيب في عز شبابي وبانت تجاعيد الالم على ملامحي وجفت مدامع العين لكثرة مابكيت ولاامل بالنجاة الا بعد ان يشاء الله .. فهل ستكتب لي النجاة يوماً ياالله ؟
.
.
.
من اتزوجت خالتي زارتني مره وحده هي ضحى بتها وبعد اختفوا ..

ام كريم وخواته بعدها هم اختفوا ..
بيوم رجع كريم كلش عصبي مقبل يتغدا ..
آمنة :
شبيك ؟
كريم :
مابيه ..
آمنة :
لعد ليش متريد تتغدا .. اني منتظرتك ماتغديت ..

رد علي بصياح :
مااريد زقنبوت ... روحي اتزقنبي وحدج ...

عفت ورحت للمطبخ ..
بقيت مقهوره ... انسدت شهيتي للاكل رغم جنت كلش،جوعانه ..

طفيت الطباخ وشلت الاكل واندك الجرس ..
باوعت شفت واحد شايفته قبل .. بس معقولة هو ...
لا .. لااا ..مستحيل ..
شجابه على كريم ؟؟

طلع كريم من باب الصالة وفتح الباب وشفت هذا الشخص دخل هو وكريم للحديقة .. بقوا واكفين بره ..
اخذني الفضول رحت للصاله فتحت البردة اريد اشوفه عن قرب هو لو اتخيل ..

شفته ... هووو ..!!!!
كريم !!!!
هذا كريم ..كريم الجان لازكلي نسيب فؤاد ....
شجابه عدنه ؟؟
ووين يعرف،كريم هذا ؟؟؟؟

ظليت متحنطه احاول افهم البينهم شنو بس مكدرت افسره شنو بالضبط ..
معقولة كريم ...مخبر سري ..
عزاااا ...
يعني كريم هو اللي بلغ عني وعن فؤاد وبقية الشلة ؟؟؟؟
واني اكول منو الي بلغ عن تغريد واهلها !!
ماادري شصارلي هو خوف هو صدمة بس كل جسمي ظل يرجف مثل السعفة ..
حسيت نفسي مثل المكتشف جريمة جبيرة واعرف المجرم منو بس المشكلة المن اشتكي اذا المجرم هو يمثل السلطة ..

بقوا فترة بالحديقة كريم زوج اخت فؤاد يحجي وكريم زوجي ويهز راسه وكل فترة يسأله يمكن سؤال ...

رحت للمطبخ واني الف فكرة براسي اخر شي اجت ابالي شغلة خوفتني ..
اخاف يكوله جانت عندي علاقة بفؤاد ... شلون بيه اذا عرف ..

دخل كريم عالسريع بدل ملابسه كتله :
وين ؟
كريم :
عندي شغلة ..
آمنة :
بالدوام ؟
كريم :
اي بالدوام
آمنة :
منو دك الباب ؟
كريم :
ولد .. ويانه .. يالله قفلي الباب وراي يجوز اتأخر ..
آمنة :
شكد تتأخر يعني ؟ لليل ؟
كريم :
يجوز ..
آمنة :
بس عفيه لتشرب ..

دار باوعلي خزرني بعدين كلي :
اذا اجيت شارب معناها انتِ السبب ...
آمنة :
اني ؟ ليش بالله ؟
كريم :
اني اشرب من اضوج ... وقبل لااخذج جنت افكر شلون احصلج وانت كلما احجي وياج تصديني جنت اشرب كلما اتذكرج .. ومن اخذتج ظليت اشرب يومية ..
آمنة :
زين .. اخذتني بعد ليش تشرب ؟
كريم :
لهسه احسج مو الي .... واريد اتأكد من شغلة حتى،ارتاح .. بس اذا طلعت صدك ياآمنة .. لاشوفج النجوم بعز الظهر ..