دراويش

دراويش ٦

#دراويش
بقلم #روز_الفياض
ح٦

آمنة :
مادام انت بخير اني بخير .

ابتسمت كتلها :
مادام انتِ بخير اني بخير .
آمنة :
مصدكت من اجت تغريد جابتلي العلاج وكالت هاي من فؤاد .
فؤاد :
ليش مصدكتي؟

سكتت شوية بعدين كالت :
هيج ..
مااريد افسر الاشياء على كيفي .. بس اجيت اشوفكم واطمئن عليكم .
فؤاد :
عليكم ؟؟؟ منو قصدج ؟ هم اني مااريد افسر الاشياء على كيفي .

انحرجت وحاولت تشرح قصدها حتى لاتبين جايه علمودي :
انتو ..
انت ومحمود وتغريد ويجوز غازي والبقية .
فؤاد :
اممم .. اوك .
آمنة :
شكرا عالعلاج ليش تعبت نفسك وعرضت نفسك للخطر .
فؤاد :
يعني لو عرفتي اني مريض متدزيلي علاج ؟
آمنة :
تعرف الجواب متحتاج تسأل .
فؤاد :
وانتِ هم تعرفين ميحتاج تجاملين لو تتشكرين ..

بقت ساكته ..
فؤاد :
شلون صارت ايدج ؟
آمنة :
زينه .. مثلما هي .. يعني .. يمكن بدت تطيب .
فؤاد :
ممكن اشوفها ؟

باوعتلي كالت :
ليش ؟
فؤاد :
اشوف الجرح يجوز مايطيب اذا ميتخيط ..
يجوز يطيب على عيب .
آمنة :
وافرض ... قابل شتسوي ؟
فؤاد :
اخيطه ..

جفلت وخافت كالت :
لا مستحيل لا خليها هيج .
فؤاد :
هاي انتِ دكتوره عود وهيج جبانه لعد شلون باجر عكبة اتطبقين .. شلون تمارسين مهنتج وانتي تخافين ؟
معناها لازم تحولين لغير كلية .
آمنة :
لتحاول تقنعني .. مااكدر اخاف مستحيل . اصلا ابالي اختصاص مغاير ..

سحبت ايدها جانت لافتها بشاش وبديت افتح الشاش وهي تحاول تسحبها وتمنعني افتح الشاش .
اجو تغريد ومحمود يحاولون يقنعوها محمود كلي :
اني رايح عالسريع خمس دقايق ان شاءالله وارجع .
فؤاد :
وين ؟
محمود :
اجيب الادوات .
فؤاد :
منيلك ؟
محمود :
من عمي .. دكتور بالمستشفى العسكري ..
جابلنه باول ليلة اشياء ديتول وكطن وابر ومدري شنو ..
فؤاد :
اوك .. انطلق .

على مكدرنه نقنعها اني وتغريد رجع محمود جايب كل اللي نحتاجة بس آمنة من كل عقلها ظلت تبجي ..

محمود :
يابه اذا ماتقبل غير اطلك تغريد هسه .

التفتت عليه تغريد تباوعله بنص عين كلتله :
هو انت هسه اتحرك واخطبني وبعدين عود هدد تطلكني .
محمود :
شبيج تغريد .. شبيج ؟ هسه وكت بسامير بهالوضع .

ضحكت آمنة وضحكت اني كتلها :
يمكن كل اليحبون هيجي بس يحبون تضرب فيوزاتهم .
آمنة :
يمكن ..
فؤاد :
هسه ؟ نبلش ؟
آمنة :
زين ماكو بنج ؟
فؤاد :
هههههههه لا والله ماعدنه مع الاسف .
محمود :
شكلولج بايك المستشفى ؟
تغريد :
هو انت خطوبة مدبرتها انوب تبوك المستشفى ..
محمود :
شوف هاي .. تريدني انسجن يالله ترتاح .
تغريد :
قابل كايلتلك بوك صدك !!!
محمود :
خايبه اثنينهن سجن العرس والبوك .