دراويش

دراويش ٢٨

#دراويش
بقلم #روز_الفياض
ح٢٨
.
.
.

آنه الأول وتالي أندارلك فدوه . ♥️

آنه الـ بعيونه بس عيونك الحلوه . ♥️
.
.
.
يطير بنا القدر لمسافات بعيدة .. ليحط بنا في اقدارٍ لم نكن يوماً لنختارها .. اقداراً مجبرين على التعايش معها .. مع ذلها وهوانها وقسوتها .. تحت مسمى القسمة والنصيب ..
.
.
.
من الصبح اندك الباب علينه بطريقة مرعبة ..
فزيت مرعوبه هذا مو مكاني ..
ثواني واتذكرت .. والباب بعده يندك حيل .. كريم ماكو ..
طلعت من الغرفة رحت للصالة لكيت كريم نايم عالقنفة وسط قذارته وسمومه والمزبله اللي مسويها ..
والريحة اوووف متنجرع سديت خشمي وفتت كوه يمه ندهته ..
آمنة :
كريم .. كريم .. كريم ..

نايم ويشخر ولايمه ولايسمع :
كريم ... كريييم .. هيه صدك جذب ..

فتح عيونه كوه كال :
هاا ؟؟
آمنة :
الباب يندك اتفلش متسمعه ..
كريم :
هاا ؟
آمنة :
خره بقسمتي ... هذا حظي بعدك لهسه متدري بالدنيا ..

صرخت بوجهه وهو يمسح بوجهه .. بجيت على حظي ..

رحت اباوع من شباك المطبخ اريد اشوف منو .. باب البيت الرئيسي مو عالي ناصي ..
شفت ام كريم ...
آمنة :
استغفر الله ... شهالصبحية الكشره .. اللهي ..

اجه كريم وراي كلي :
منو ؟
آمنة :
خالتي .. امك ..
كريم :
شعدها جايه من الصبح ؟... اففف ..
راح يفتح الباب واني دخلت اغسل وابدل ..

طلعت من الحمام للغرفة مسمعت حتى نفس .. استغربت ..
دخلت بدلت ورحت اسلم عليها ..
لكيتها كاعدة بصفة وتحجي وياه على كييييففف ..
وهو يهز براسه ويكللها :
اي .. اي .. ادري ادري .. شنو قابل اول مره اتزوج هههه .

عرفتها تتحقق من شرفي .. وتنطيه دروس شلون يحكمني ويشكمني ..
اتعوذت من الشيطان وفتت سلمت عليها :
صباح الخير ..
ام كريم :
صباح النور ...

سكتت شوية بعدين كالت :
مبروك ..
أمنة :
شكراً خالة ..
ام كريم :
ليش هيجي بيتج وصخ ؟ مو انتِ عروس .. عيب تجي ناس تتباركلج تشوف هالوصاخة وهالريحة الخايسة ..
آمنة :
انعم الله عليج .. سويتيني وصخه من اول يوم ..
ام كريم :
قابل مجذبه .. هذا شنو ؟.. هذاك شنو ؟
آمنة :
يعني اني جنت اشرب؟ هاي سوالف ابنج متعرفين بي يشرب يعني ..

سكتت معجبها الحجي وظلت تفر بأيدها وكريم مبتسم متفاخر بهالنكاسة ..
كريم :
ههههه يمه والله،عندج سوالف جايتنه من الصبح تردين تتعاركين لو جايه تباركيلنه وتجيبين ريوك .
ام كريم :
عليمن اباركلك،قابل اول مره تتزوج ..
كريم :
اول مره عن حب ههههه .. ريوكج وين تره جوعان ..
ام كريم :
حب لوووو.......

وسكتت، بس الفضول مسمحلي اغلس،كتلها :
لو شنو ؟

ردت علي بطريقة على اساس تتشاقه :
لو رسمتي عليه انتِ وامج ههههه .. يالله الله يرحمها بعد ..