دراويش

دراويش ٤٠

#دراويش
بقلم #روز_الفياض
ح٤٠
.
.
.

‏أن وَجهك بِمثابة العودة الى الوَطن لدى شخصاً تعب من الغُربة .
.
.
( فؤاد )
بقيت بقلق على آمنة ..
ماادري انتظر من سيف خبر لو انتظر منها ..
لو ابقى كاعد ومخلي ايدي على خدي ؟

اتذكرت اني من وصلت لهسه ولامره اتصلت على اهلي ولاطمنتهم ..
اتصلت بيهم واتطمنت عليهم بس فراس كلي :
اكلك .. علمود حنان ..
فؤاد :
شبيها ؟
فراس :
الولد على اساس ياخذ ابوه ويسافر بس اتأجلت عملية ابوه ..
فؤاد :
اي ؟
فراس :
فيريد يقدم العرس ..
فؤاد :
امم .. بعد بكيفهم هو وياها يتفقون هذا شي يخصهم ..
فراس :
اني كلت اكلك حتى تكون بالصوره لان عالاكثر اذا كل شي كامل عالاسبوع الجاي يتزوجون .
فؤاد :
الله يسهللهم ان شاءالله بالرفاه والبنين ..
فراس :
ماشي ..
فؤاد :
مادام كل شي كامل ليش ينتظرون بعد قابل زغار همه .. خير البر عاجله .
فراس :
على بركة الله ..

بالليل ظليت افكر اسأل زوج حنان على شغلة آمنة بس استحيت ..
دزيتلها مسج :
مساكم الله بالخير ام سيف ..
آمنة :
مساك الله بالخير والعافية هلو دكتور ..شلونك ؟
فؤاد :
الحمدلله .. بشريني عنج انتِ شلونج ؟
آمنة :
الحمدلله زينه .. شخبارك وين طلعت اليوم ؟
فؤاد :
مطلعت لمكان
آمنة :
ليش ؟ شعجب شنو انت جاي حتى تخلصها بالفندق ؟
فؤاد :
والله بالي جان مشغول عليج مكدرت اطلع ..
آمنة :
ليش ؟ شبيه اني ؟
فؤاد :
ماادري .. حسيتج بعدج ضايجة من الي صار بينج وبين سيف اول يوم .. بصراحة ضميري يأنبني لان اجيت وشفتكم .. وجودي سببلكم مشاكل وضيگة خلك ..
آمنة :
لا لا افه عليك .. بعدك حساس .. لا تره اني وسيف علاقتنه متتأثر بمشكلة عادية .. هاي مثل متكول رياح خفيفة ههههه .
فؤاد :
متأكدة ؟ ام سيف اذا اكو شي اكدر اسويه حتى احل المشكلة اني حاضر ..
آمنة :
لا يمعود ماكو شي والله اصلاً سيوفي ميكدر على زعلي واني هالمرة جنت قاسية وياه حتى ميعيدها والحمدلله اليوم رجع من المدرسة اجه صالحني واعتذر وظل يبجي وكال بعد مااعيدها ..

ارتاح كلبي من عرفته سمع كلامي وراح صالح امه فكتلها :
الله يخليه الج بس اني هم مااقبل تقسين عليه .. ورده هو الله يحفظه ..
آمنة :
ادري بي ورده وادري بي طيب وحباب وفقير ومابي كل اذيه هذا العمر كله معصالي كلمة ولا جادلني بحرف الكلمة الي اكولها ينفذها مباشرةً بدون اعتراض بس اني اتعمدت اقسى عليه .. بس بالنهاية اني اعرفه يرجع يتندم ..
فؤاد :
يعني تعرفيه هههه .
آمنة :
ابني .. تربيتي طبعاً اعرفه ..
فؤاد :
طمنتيني ..
آمنة :
ماكو شي .. بس انت دومك حساس .. اني سيف عندي اعز من روحي مااكدر اضوج لو ازعل منه ..
فؤاد :
امي الله يرحمها قبل من تزعل ويه احد عزيز عليها وره شوية ترجع تحجي وياه فنسألها انت مو جنتي زعلانه تكول زعل الحبايب جذاب .. الحبايب مابينهم زعل ..
آمنة :
اي والله جذاب ..
فؤاد :
اني عطلتج .. انت بالعيادة مو ؟
آمنة :
والله اليوم خلصت شغل من وكت فرجعت للبيت حتى اسوي عشا مرتب لسيوفي .. قبل ماازعل عليه جان مشتهي صينية بطاطا وبقت على بالي عاد اليوم كلت خل اسويها الها ..
فؤاد :
اها اتعلمتوا عالاكل المصري ؟
آمنة :
طبعاً اعجبك اني بالطبخ المصري كشري وكوارع وفته وكل شي اللي يعجبه اسويه اله ..
فؤاد :
والله ياعمي هنياله سيف ..
آمنة :
تعال اتعشى ويانه .
فؤاد :
لا عليكم بالف عافية اني بعدني ممصلي هسه اصلي وانزل للمطعم اضيع الوقت واتمشى شوية يمكن ..
آمنة :
لا لا صلي وانتظرنه هسه اجيب سيف ونجي ناخذك تعال اتعشى ويانه عندي حجي وياك بخصوص المحامي .
فؤاد :
مو وكته مااريد ازعجكم انتو اليوم حاسبين حسابكم على وجبه عائلية خليها غير يوم ان شاءالله .
آمنة :
لاتزعجنه ولاشي هي كلها بتيته تره ليغرك فخامة الاسم صينية بطاطا عبالك فد شي هههه يالله اتركك تصلي على مااخلص اللي بأيدي واجيب سيف ونجي ..
فؤاد :
يعني مصره ؟
آمنة :
ومااقبل المناقشة لازم تجي تشرف بيتنه هنا وتشوف حياتنه .. بعدين سيف محتاج صديق او شخص جبير حتى يعلمه يكون صديقة يرشده في حال حس بالضياع واني مااعرف احد هنا ..
فؤاد :
ماشي .. ماشي .. بس لتجون انتو .. اني اجي ليش يصير الطريق طريقين ترحون وترجعون .
آمنة :
اوكي .. هسه راح ادزلك العنوان بمسج .