دراويش

دراويش ٩

#دراويش
بقلم #روز_الفياض
ح٩
.
.
.
بقى ابوي كم يوم يسأل ويستفهم بسكوت عن موضوع السفر حتى اسافر ولكن خلال هالفترة الامن اعتقلوا كريم زوج حنان ..
بقى ثلاثة ايام محجوز عدهم منعرف عنه اي شي ومبقى باب مدكه ابوي وعمي لان كريم ماعنده احد .
بقوا عدنه حنان وام كريم لحد مطلع كريم من الحجز ..
كريم من طلع من الامن كان تعبان بسبب الضرب والتعذيب وكتفه مخلوع ..
الايام اللي بقوا بيها عدنه كانت تعذيب بالنسبة الي لان لازم ابقى بالمخبئ مااطلع منه ..
امي وجنان وفراس كانوا يشغلون حنان حتى اطلع للحمام اقضي حاجتي اما الاكل والشرب فراس يجيبلياه بسكوت بالبوكه بس الخنكه الجنت احس بيها عبالك كاعد بكبر ..
ياريت كاعد ...
كل هالايام اني بقيت بيها نايم بفراشي لان المكان ضيق مااكدر اتحرك ..
الشي الوحيد اللي سلاني هو الراديو والقراءة ..
بعد مرجعوا كريم وحنان وام كريم لبيتهم بديت ارتاح حسيت نفسي فعلا جنت سجين واطلقوا سراحي ..
بعدها كعدنه اني واوبوي وفراس حتى نتناقش بموضوع سفري فكال ابوي :
تره متكدر تسافر سفر اصولي .
فؤاد:
يعني شنو ؟
ابوي :
يعني اذا تسافر بجواز احتمال تنلزم ... احتمال هذا كريم الجلب مبلغ عنك هذا الظاهر مخليك براسه ..
فؤاد :
والحل ؟
فراس :
سلم نفسك ..

درت على فراس متفاجأ من كلامه كلي :
سلم نفسك للامريكان ..
فؤاد :
ليش ؟
فراس :
مكدامك خيار ثالث لو امريكا لو ايران واني اكول الامريكان احسن علمود مستقبلك واضمن احنه ايران شنعرف عنهم ومصارلنه هواي من خلصت حربنه وياهم اللي قضت على ( ٨ ) سنوات من عمرنه ..
ابوي :
كلام صحيح .. الامريكان احسن ..

اتنهدت وهزيت راسي موافق واني من هسه احس نفسي جبل كاعد على صدري ومختنك شلون لو جربت الغربة صدك ؟؟
وره يومين رجع ابوي كلي :
اكو منطقة بالبصرة قريبة على ايران اسمها الجزيرة اذا تريد تروح لايران احاول ادبرلك واحد هناك يوصلك .. همه هناك يعرفون الطريق زين .. او اذا مقتنع بالامريكان معناها قرر .. شوكت تروح تسلم نفسك ؟ واكو هواي ناس تكدر توصلك وتساعدك لا تضيع الوقت بالتفكير تره التفكير لاراح يقدم ولا راح يأخر ... لا يمكن يأخر ..
يأخرك عن فرصة لانقاذ نفسك ويمكن تكون فرصة زينة لبناء مستقبلك .. لان هنا بعد ما الك اي مستقبل ..
فؤاد :
معناها باجر.. باجر اروح اسلم نفسي ..

هزه راسه ابوي وخله ايده على جتفي وكلي :
توكلنا على الله ...

بقيت للعصر افكر اريد احسم امري ماادري ليش متردد وخايف اخطو هيج خطوه رغم انه اني اللي اقترحت حل السفر او الهرب خارج العراق لكن هسه احسها خطوة جداً جبيرة وخايف منها ..
خايف اندم ..
رغم ماعندي شي اخسره بالعكس يمكن طلعتي من العراق بيها مكاسب اكثر من بقائي لان اذا ابقى مراح استفاد فوكما خسرت كل شي .. مستقبلي ... حلمي ... آمنة ... عالاكثر بعد راح اخسر حياتي واحتمال اهلي .
بس لو طلعت اكو امل .. استعيد نفسي واحلامي وطموحاتي .. اكو امل اكون دكتور فؤاد وتعب السنين يمكن ميروح هدر .. اكو امل انسى آمنة او الكه آمنة جديدة تؤمن بيه ..
ثاني يوم طلعت من مخبئي او خل اكول غرفتي لان بهذا اليوم حسيتها مو غرفة جوه الكاعد وافوتلها من فتحة مجاري .. لااا حسيتها وطن ..
رحت لجنان طلبت منها تسويلي اي شي كيكة لفات كليجة اي شي عالسريع ..
باوعتلي مستغربة كلتلي :
شتسوي باللفات ؟
مشتهي كيك اسويلك بس الكليجة تاخذ وقت اذا جوعان .. اسويلك هسه لفه سد جوعك على مااسويلك كيكة والكليجة غير يوم ان شاءالله .
فؤاد :
لا مو جوعان .. اريد اكل جاف ... اخذه وياي .
امي :
وين ؟
فؤاد :
راح اطلع بعد صلاة العشا من تظلم الدنيا ...
واسلم نفسي للامريكان ..