دراويش

دراويش ٢٣

#دراريش
بقلم #روز_الفياض
ح٢٣
.
.
.

ولن يهواك غيري فاستمر بهذا الصد إني مستمر ،أنادي اللّه في سرٍ وجهرٍ
متى يدنو اللقاء ونستقر 🖤.
.
.
فتحت تليفون عذراء وانصدمت بكم الرسائل اللي وصلت ..
بدافع الفضول فتحت وحده من الرسائل ممذكور اسم فقط رقم والصدمة كانت من قريت المحتوى :
( يالله وينج طولتيها ؟ شنو مكدرتي تدبرين الفلوس ؟ طاح حطج مابيج خير واني مصدك ومتعمد عليج عبالي تفتهمين وتعرفين تتصرفين ) ..

ظليت محتار منو هذا ؟
فتحت مسج ثاني من نفس الرقم :
( امداج اذا صدوك .. لج شايب معرفتي تقشمريه وتطلعين من عنده كم ورقة بالشهر ؟ تبقين طول عمرج ثولة اعلم وافهم وانتِ ولاتفتهمين )

المسج الثالث :
( غبية ٢٥ شنو كوليله ورقة لتخرج اختي كل مناسبة ورقة شبيج افهم بيج متفتهمين )

المسج الرابع :
( حبيبتي احنه شاتفقنه ؟ احنه مو اتفقنه تتحملينه لحد منكون نفسنه بلكي ينطوه التعويض خليه يشتريلج سيارة او قطعة ارض وبعدين اتطلكي منه ونخلص من هالمعاناة ونبدي حياتنه ونتزوج وادللج دلال انت بس اتحملي شوية لخاطري بس خل اسدد ديني وانوب نجمع لمستقبلنه .. )

حسيت نفسي بدوامه ..
هاي شنو ؟ ومنو ؟ وهذا منو ؟
هاي مو بنية هاي بلاء ..
كل هالبلاوي واني ماادري ولاحاس ولامنتبه ..
كل هذا واني حاطج بعيوني ومدللج واكول خطيه ..
كل هذا وعينج فارغة عالبره !!!
كل هالاحترام معجبج ولاغزر بيج !!!
عاجبتج هالاهانات والغلط والرزالة !!
شحجي ؟
شحجي للناس شكول ؟

كعدت عالجرباية حسيت نفسي خجلان من نفسي ..
نسيت فراس ينتظر جوه ..
بقيت كاعد ودمعتي بعيني ..
ماادري هذا حظي لو هو شنو ؟؟
زين اني شمسوي حتى تواجهني كل هالمشاكل والبلاوي بحياتي ؟

صعد فراس يشوفني ليش تاخرت :
وينك يمعود ؟ اتعطلت ؟

شافني منهار وكاعد كلي بقلق :
شبيك ؟ شكو ؟
فؤاد :
بت الكلب على ذمتي وتعرف واحد ثاني ..

ظل يباوعلي مفهم قصدي فراويته المسجات بدا يقراهم وحسيت بصدمته من ملامح وجهه ..
فراس :
الله .. الله ...
هاي شنو ؟!!!!
فؤاد :
هذا طيحان حظها .. الفقيرة المؤدبة اللي صوتها ميطلع .. هاي الردتوها ...
فراس :
مصيبه ..

علا صوتي بالبجي كلي :
لتبجي شبيك فؤاد ؟ طلكها وخلي هالخا... يفيدها ..طايحة الحظ هاي مو مال دلال ونعمة مال اهانه وطيحان حظ ..
فؤاد :
ابجي على حياتي الخلصت بدون راحة .. ماافهمت منها شي كله قهر .. ابجي على ابني اللي راح يجي للدنيا ويعرف امه على ذمة ابوه ومصاحبه واحد زبالة ... ابجي على لان عيبت وضحكت على اللي اختارها دريد ومعجبتني لان مخليه مكياج .. وتالي هاي المؤدبة المثقفة ام الماجستير هيجي تسوي !!!!!
وين العيب اريد افتهم بيه لو بيها ؟؟؟