دراويش

ملاحظات

هنا واح اوضح كم شغلة بالقصة :
#اول شي اني لارفحاوية ولاعندي احد من رفحا ولا بعمري كان عندي احد منتمي لحزب لاللبعث ولا للاحزاب الحالية هاي حتى تكونون على بينه انه ماكو اي انحياز لاي جهة ..

#ثاني شي بالنسبة للقانون الامريكي في حالة تم الطلاق بين الزوجين يتم تقسيم الممتلكات مناصفة بين الزوجين يعني المرأة اذا اتطلكت تاخذ نصف املاك زوجها من اموال وعقار .هاي بأمريكا .
الا اذا كان اكو اتفاقية قبل الزواج انه مالها حق بشي .

اما في ايران فالزوجة عادة يكون المهر ليرات ذهب لان الذهب دائما سعره في صعود بعكس الفلوس الي ممكن تنزل قيمتها بمرور الوقت .
وايضا المهر المؤجل او المؤخر هذا تاخذه العروس بعد الزواج مو مثل اغلب العراقيين يغلسون عليه الا في حالة الطلاق ينجبر ينطيه .
يحق للزوجة في ايران تختار عضو من اعضاء جسم الزوج حتى يتسجل بأسمها كيفها رجل ايد راس اليعجبها وفي حال اتضرر هذا الجزء الدولة تدفع تعويض للزوجة وتتكفل بعلاج هذا العضو كنوع من التأمين .
في حال تعرض الزوج لحادث فالدولة او الحكومة الايرانية تدفع تعويض للزوجة مثلما احنه عدنه الشخص المسبب للحادث يدفع فصل 😐. لكن التعويض او الفصل يروح للزوجة لان اذا لاسامح الله الزوج صارلة شي فالزوجة هي المتضرر.

شفتوا ليش المراة قوية في بعض البلدان !!🤕
للعلم القانون العراقي اعطى بعض الحقوق للمراة المطلقة يعني احسن من غيرنه وتكدرون تسالون الناس اللي اختصاصهم قانون .

#نجي هسه لموضوع تعويضات رفحا ..
طبعا بالبداية الحكومة اقرت التعويضات لان هواي من جماعة رفحا انعدموا عوائلهم واكو انهدمت بيوتهم واتصادرت فخسروا املاكهم واتغربوا واتبهذلوا واضطروا يبدون من الصفر .
التعويضات ماشملت بس جماعة رفحا وانما شملت ٩٠٪؜ من المهجرين والتعويضات تختلف عن الرواتب ومو كل اللي كانوا برفحا استلموا تعويضات مثلما مو كلهم يستلمون رواتب اكو ناس كل شي مااستلمت رغم اتصادرت املاكهم بزمن النظام السابق وعدهم شهداء لكن ماحصلوا اي تعويض لان ماعدهم واسطة وهنا اذا لاحضتوا فمحمود هو اللي دخل اسم فؤاد حتى يستلم يعني واسطة لان فؤاد مايعرف شي من رجع ولا حاب اللي جاي يصير .
اما ليش وشلون وشوكت اقروا قانون التعويضات ورواتب رفحا ف:
من اتشكلت الحكومة الجديدة واقرت قانون لتعويض السجناء السياسيين اعضاء البرلمان العراقي اللي يمثلون المحافظات ذات الاغلبية ( السنية ) عذرا عالكلمة لكن هذا واقع حال .. طالبوا بتعويضات ورواتب لاعضاء حزب البعث وفدائيو صدام على اعتبارهم ايضا ضحايا سياسيين مثلهم مثل السجناء السياسيين والمهجرين وهنا تم اقرار رواتب رفحا اسوة بفدائيو صدام وقيادات حزب البعث المنحل او المجتث وفق قانون اجتثاث البعث .

وفق صفقة بين احزاب السلطة الحالية والبعثيين شملت أكثر من 200 الف بعثي من فدائيي صدام وقادة أجهزة المخابرات والأمن السابقة وأعضاء الفرق والشعب والكثير من المؤنفلين وأهالي حلبجة اعيدت حقوقهم ورواتبهم بأثر رجعي مقابل تمرير قانون رفحاء وطبعا هالشي مو سر او كلام ممنوع وانما هذا كلام معروف ومنشور عالفيس وغوغل وغيرها يعني كلام عام الكل تعرفه لكن اني نزلته للتوضيح فقط هذا فيما يتعلق برواتب اهالي رفحاء وليس التعويضات .

#اللي عنده معلومة يكتبها واللي يشوف اكو معلومة خطأ يصححها النه بلا زحمة حتى الكل يكون فاهم ..
اني نزلت التوضح حتى تعرفون اكو ناس استلمت تعويضات وواكو ناس استلمت تعويضات ورواتب وامتيازات وعموما هذا كله مو موضوعنه ومااحب نبتعد عن القصة لكن هو مجرد توضيح للرد على تساؤولات البعض اللي ماعدهم معلومات ومعرفة بالامور السياسية اللي صارت بذيج الفترة .