دراويش

دراويش ٤٩

#دراويش
بقلم #روز_الفياض
ح٤٩
.
.
.

ضَلت وشالة ، من الُعمر رِدناها عود وياكُم ..❤️
.
.
.
( آمنة )
خلصت اوراق سيف سواله محمود جواز جديد بالاضافة لباقي الاوراق الرسمية بفترة قياسية وبدون ميروح ويراجع ..

وهنا حان موعد الرحيل واي رحيل فانا سوف اتركك خلفي لاعود الى الغربة التي كنت اعيشها على آمل لقائك ..
بليلة سفرنه الكل اجتمع عد بيت محمود ..
دريد وعائلته وفؤاد وابوه واخوه وحنان ومروان وحتى عدنان وجنان واجت هدى وجهالها ..
اجتمعنه كل احنه على العشا ..
النسوان كعدنه بحدنه جوه وهمه بالحديقة ..
جنان :
يابه شعندج رايحة دابقي هنا المن راجعة هناك اتعودنه عليج .
آمنة :
هههه ياريت اكدر بس بعد مااكدر ابقى علمود سيف ..
جنان :
والله اتعودنه عليج اخابر كلها تحجي بآمنة ابوي وفؤاد وفراس وحنان اجي للبيت كلها تسولف بآمنة انوب من شفناج حبيناج اكثر .
آمنة :
ههههه دوختهم ..
واني هم حبيتكم اكثر الله عوضني باهل ثانين بعد اهلي الله يرحمهم وماادري من ارجع هسه شلون اكدر اتعود عالوحده من جديد ..
حنان :
لاعيني لا بعد هسه مالج عذر كل مدة لازم تجين والشباب ميقصرون الامان والمكان وكل شي همه متكفلين بي انت بس عليج تجيبين جنطتج وتجين .
آمنة :
والنعم منهم والله مقصروا الله يوفقهم يارب اخواني واكثر هذا العوض من رب العالمين بعد مراح غيث وسافر ليث الله عوضني بيهم ولو همه من ذاك الوكت طيبين .
ام رقية :
دخلصي العده هنا يمي والله احطج بعيوني .
آمنة :
لا ياا انوب اخلص العده هنا على بختج ام رقية هههه لا بيتي مناك وبيني وبينج اني لهسه اكو بكلبي خوف من كريم خاف هم يجي بعدين بعد هو عرف العنوان هناك مال بيتنه لازم ارجع هسه ابيعها الشقة واخذ وحده بغير مكان وحتى عنوان العيادة اغيره مااريده يندل طريقنه .
هدى :
ولشوكت تبقين مهزومة منه اتطلكتي بعد طز بي .
آمنة :
خليني اتكفى شره منا لحد متخلص اوراقنه ونروح يم ليث الله اعلم بعد شكد ... اتحملها شلون مكان.

دنكت جنان يمي كالت بصوت ناصي :
يجوز احنه نجيكم من تخلصين العده ..

التفتت عليها كتلها :
كل الهلا بيكم علواه تسووها صدك وتجون .
جنان :
اي نجي ان شاءالله نريد نخطب لابنه هههه .

حسيت بالاحراج وبقيت ساكتة ..
هدى :
آمنة يجوز اني اجيلج هناك اخذلي اسبوع اغير جو بس خل استلم فلوس الفصل من اهل كريم هههههههههههههههههه ..

ضحكنه على هدى وسوالفها ..
بقيت كاعده واباوع لهدى سبحان الله وحده غيري يمكن متحبها لان جانت على علاقه بزوجها وعلاقة مو بريئة ...
بس اني اعرف كريم شكد وصخ .. الله اعلم يجوز هم هددها بشي وخلاها تستسلم اله ..ويجوز يجذب يتبلى عليها ..
وعالاغلب يجذب .. يجوز حاول وياها ومكدر عليها لذلك ظل يألف عليها وعلى شرفها قصص ..
هاي اخلاقه اعوذ بالله منه شنو من بشر ..