دراويش

دراويش ٤١

#دراويش
بقلم #روز_الفياض
ح٤١
.
.
.

مثل الصوغه اعزك

لهلي ماانطيك .. 💘
.
.
( فؤاد )

بعد محجيت ويه زوج حنان اتصلت على سيف :
سيوفي شلونك ؟
سيف :
هلو عمو شلونك انت ؟
فؤاد :
الحمدلله ..اكلك خو مجاي تدرس لان مااريد اعطلك .
سيف :
لا لا طالع مو بالبيت .
فؤاد :
تمام .. معناها اني اتصلت بزوج اختي المحامي وسألته على قضية الوالدة .
سيف :
اي ؟ شكال ؟
فؤاد :
كلي الافضل لو تجي للعراق وترفع عليه دعوه هناك بالعراق يعني حتى ميكدر يجي ..
سيف :
هاا .. وانت شتكول ؟
فؤاد :
والله يا سيوفي هو محامي وافهم مني ومنك بهالامور فاكيد هو من يكول تجي ترفع عليه دعوه بالعراق معناها هذا الشي احسن لصالحها يعني .. لان ابوك اذا ميحضر الجلسات راح يكون عند المحكمة سبب للموافقة على الطلاق ولو اكو شهود على سوء المعاملة راح يكون افضل ..
سيف :
اني اشهد ..
فؤاد :
انت ؟ لا مو انت .. لابد اكو غيرك هواي ..
سيف :
ليش مو اني يعني ؟
فؤاد :
لان مهما صار ومهما جرى يبقى ابوك ..
سيف :
مو ابوي .. كريم مو ابوي ..
فؤاد :
احنه نفهمك بس الناس لاتفهمك ولاتعذرك ..
سيف :
ماريدهم يعذروني .. شفادونه الناس من جان كريم مطيح حظنه ؟

سمعت صوت آمنة يمه تسأله :
شكو ؟
فؤاد :
الدكتورة يمك ؟ معناها اخذ رأيها واحجي وياها وشوفها شتكول وبعدين نقرر ..
سيف :
مو متاخذني وياها اني اعرفها ..
فؤاد :
احنه شنريد ؟
سيف :
شنريد ؟
فؤاد :
نريد العنب لو كتل الناطور ؟
سيف :
الناطور شنو ؟
فؤاد :
ههههه يعني الحارس ..
سيف :
لا العنب اكيد ..
فؤاد :
معناها الامور متُأخذ بهالتعصب ..احنه نشوف شنو الشي اللي يفيد القضية ويخلي ماما تخلص من هالعذاب وترتاح بدون خسائر او آثار جانبية .. الشي اللي تكوله ماما نسويه .. احنه منريد نزعلها ولانريدها تقلق تره هي تعبانه وماافضل تزيد الضغط عليها خاف متتحمل تره للصبر حدود ..
سيف :
اممم .. ان شاءالله ..
فؤاد :
عفيه عليك .. فكر بامك زين هي ماعدها غيرك ولا انت عندك غيرها .
سيف :
ان شاءالله ..
فؤاد :
يالله مع السلامة .. عود رجعلي خبر ..
سيف :
صار .. مع السلامة ..

سديت التليفون وجنت تعبان فنمت ..
فزيت على صوت التليفون ..
فؤاد :
الو ؟
آمنة :
الو .. هلو دكتور ؟

من سمعت صوتها كعدت على حيلي :
ام سيف ؟ شبيكم خو مبيكم شي ؟
آمنة :
لا لا ماكو شي .. ردت احجي وياك علمود القضية والمحامي بس الظاهر انت نايم .
فؤاد :
اممم .. اي والله جنت نايم .
آمنة :
اعتذر .. جدا اسفة ازعجتك .. باجر اتصل ان شاءالله تصبح على خير ..
فؤاد :
لا لا احجي خلص بعد كعدت ..
آمنة :
لا اخذ راحتك باجر نحجي ..
فؤاد :
مو بعد كعدت مااكدر انام .. عالاقل نحجي بشي مفيد بدل ماابقى كاعد وحدي اصفن ههه .
آمنة :
اففف انت هيج تخلي ضميري يأنبني يعني قهرتني حيل شسوي حتى ترجع تنام ..
فؤاد :
لتفكرين بيه .. احجي .. ياريت كل يوم تتصلين ..