دراويش

دارويش ٢٠

#دواريش
بقلم #روز_الفياض
ح٢٠
.
.
احدهم اهداني حلماً ثم غادرني .. دون ان يخبرني كيفَ انامْ ..
.
.
بعد الموقف اللي صار ويه عذراء جنان سألتي :
شصاير بينك وبين عذراء ؟
فؤاد :
شصاير ؟
جنان :
ماادري انت كول .. احس صاير شي ؟
فؤاد :
مصاير شي .. ليش تحسين هيج ؟

سكتت جنان شويه بعدين اتدنت يمي ونصت صوتها :
راح احجيلك فد شي بس بروح امي عليك فؤاد متحجي ولاتعاتبها ولا جنك عرفت مني شي ..
فؤاد :
حلفتيني بأمي بعد .. كولي .
جنان :
شوف .. اني مااريد اطلع نقالة حجي بس اني احس البنية عدها قلق ممستقره او خايفه على مستقبلها يمكن تخاف تروح لامريكا وتعوفها ماادري .. ماادري بس يعني هذا تفسيري ..
فؤاد :
تفسيرج لشنو ؟
جنان :
ذاك اليوم سمعت ابوي يحجيلي على سالفة التعويض اللي على اساس تستلمه انت وظلت تسأل وتكول اشو فؤاد محجالي ولاكلي شي .. بس احنه كنالها بعد مجرد حجي ماكو شي اكيد ..
فؤاد :
اعرف .. ابوي حجالي وهي هم مقصرت ههه .
جنان :
وبعد شي ..
فؤاد :
شنو بعد ؟
جنان :
ذاك اليوم دزتلي مسج تسألني اذا عدنان حصلك واسطه علمود التعويض كتلها هو لحد الان احنه منعرف صدك لو جذب .. كالت ..
فؤاد :
شكالت بعد ؟ احجي اصدميني .
جنان :
حلفتني اذا سمعت شي عن التعويض اي شي انطيها خبر .

هزيت راسي وسكتت ..
جنان :
لتضوج عفيه ..
فؤاد :
لا مااضوج على شنو اضوج .

الصدك اني ضجت وحسيت عذراء كأنما بخيلة ومادية.. او يمكن تخاف خاف انطي لاهلي ..
بنفس اليوم محمود اتصل بيه كلي :
اكلك هذا التعويض طلع مو ثمانين مليون .
فؤاد :
شكد ؟
محمود :
لان انت اللي اتعرضت للتهجير وكان ممكن تنعدم وانضربت وانهانيت وخسرت دراستك ومستقبلك ورجعت بديت من الصفر هناك واتبهذلت بالغربة فاكيد انت المستفيد الاكبر اكثر من بقية العائلة واكثر من المره ..
فؤاد :
ياعائلة ؟ يامره ؟
محمود :
مو انه حاولت اضيف اسم مرتك وياك حتى هي تاخذ تعويض شي شياتين ..

اتعجبت من تفكير محمود كتله :
والعائلة ؟؟؟
محمود :
انت لو ماخذها ومسافر هناك جان كدرت اضيف حتى جهالك للسجل مالك .
فؤاد :
محمود تحجي صدك انت ؟؟!!! ادري غير اسمي موجود بالسجلات والاوراق عدهم الجاية من الامم المتحده ..
محمود :
اي صدك جا اجذب عليك .
فؤاد :
عمي اني مااريد لا لمرتي ولا لاهلي ولا لاي عائلة .. اذا التعويض من حقي فأوكي .. واذا مو من حقي فما اريده ولااريد اي شي .. شبيك محمود اني على تالي عمري اكل حرام !!
محمود :
عمي ياحرام ؟ تحجي صدك انت ؟ احنه غير طاح حظنه بالغربة واطينه شهداء وخسرنه شبابنه وعمرنه وشهاداتنه وشحصلنه ؟ ردينه ايد وره وايد كدام كل شي ماعدنه .. هذا حقنه احنه قاومنه واتغربنه وشبعنه ضيم واكلنه وحل هسه اجانه الدور حتى احنه نقود البلد للمرحلة الجاية وهذا التعويض اقل من حقنه ..
فؤاد :
مااريد اناقشك ولا ارد عالحجي اللي كلته لان لكل واحد بينه قناعاته مختلفة بس اني مااكل حرام ..
محمود :
اهووو انت شجلبت مااكل حرام مااكل حرام قابل انه الاكل حرام ؟ الحمدلله لاماكل حق احد ولا بايك احد هذا حقي وحق الغربة والذل العشته بالغربة وانت بكيفك بعد .