دراويش

دراويش ٢

مساءالسعادة على قلوبكم 🌹
#دراويش
#روز_الفياض
ح٢
.
.
.

تلونت ايامي بالوان الطيف حينما احببتها ..
لم اكن اعرف معنى الحب قبلها ..
حورية صغيرة دلوعة ..
تصحبني الى المجهول ..
.
.
.
،
احببت آمنة رغم كونها غير آمنة ..
احببت ابنة الجلاد الذي احاربه ... ابنة احد السفاحين او هكذا كنت اظن حينها ..
المهم انني وقعت في شباك العدو ..
واي عدو هو واي قوى يمتلك حينما يوجهة نظرة الي احس اني اعانق السماء ..
لهذه الدرجة احببتها ..

آمنة جانت بنت صريحة وصاحبة شخصية ومرحة جداً ..
حبيتها حيل من اتعرفت عليها عن قرب ..
جانت مختلفة تماماً عن الظاهر اللي جنت اشوفها بي ..
جنت احس نفسي محظوظ بيها .. محظوظ لان حبتني واختارتني من كل هالطلاب اللي عيونهم تلاحكها ..
وكلماتهم ماخفت ولاخف صداها من اول يوم دوام الها ...

آمنة :
فؤاد حبيبي شوكت تخلون تليفون مو متت ؟؟
فؤاد :
لا ياتليفون .. عمي احنه ناس دراويش على باب الله لاعدنه تليفون ولاسيارة ..

ضحكت كالت :
زين شلون احجي وياك لو اشتاقيتلك ؟ افتهمنه يابه انتو ناس دراويش وفقرة بس حتى الدراويش هم لازم عدهم تليفونات هههه ..
فؤاد :
اي انتي شعليج ابوج شتردين يلبيلج قابل مثل ابوي اذا كتلة اريد تشدلنه تليفون غير يسويلي فلقه ههههه ..

سكتت شوية بعدين كالت :
ليش دائماً احس من كلامك انت شايفني انسانة سطحية وافكاري مادية بحته ؟؟
فؤاد:
اني ماكلت هيج ..
آمنة :
ماكلت صحيح بس طريقة كلامك ..
مفرداتك ...
حتى ساعات نظراتك تكول هيجي ...
لهدرجة شايفني انسانة فارغة وتافهه ؟؟!

ماجنت مفكر انه هي حساسة لهدرجة ولاجنت اصلاً قاصد اجرحها او اي شي من الكلام الكالته فكتلها :
لو مفكر مثلما انتي هيجي تفكرين جان ماحبيتج ولاجازفت واتورطت وياج ..

باوعتلي كالت :
جازفت ؟؟!!
واتورطت وياي !!
ليش ؟؟؟؟
فؤاد :
مو قصدي اللي فهمتيه ....
أمونه انتي تعرفين اني مااعرف اعبر ولااعرف اشرح بس فاهمتني بدون مااحجي واكول ...
جازفت وحبيتج لان اكو اشياء متعرفيها عني ...
ومااكدر احجيها بالوقت الحالي ...
واصلاً اذا عرفتيها احتمال تغيرين نظرتج وفكرتج عني واحتمال ... تتندمين لان عرفتيني وحبيتيني ...
آمنة :
ماكو شي ممكن يخليني اتندم لان عرفتك وحبيتك .. ولاممكن اغير نظرتي الك مهما صار ..
فواد :
ماتعرفين شنو ضامتلنه الحياة ...
مااريدج تكرهيني بيوم من الايام ومااريدج تتأذين بسببي ...
آمنة :
مااعرف شضامتلنه الحياة صحيح ... بس مال اكرهك مستحيل ... وحاسة بخوفك علي بس اني اخاف عليك اكثر ...
فؤاد :
خايفة علي منو شنو؟
آمنة :
من الي انت خايف علي منه .... من الشي اللي خلاك من الاول تتردد تحبني ...

سألتها بارتباك :
شنو هو ؟
آمنة :
انت خايف لان ابوي عندة منصب بالحزب ؟

كتلها بخوف حاولت مااكشفه بصوتي ونظراتي :
وليش اخاف من ابوج ؟
آمنة :
تخاف يرفضك لو اتقدمتلي ...
مو صح؟