أبنائى (متفرعه من سلسلة أنا لك..ولكن!) (تحت التعديل الجذري)

الفصل السادس والخمسون

الدكتور بإستغراب:"إجهاض إيه حضرتك؟ الإجهاض حرام."

أمجد وهو بيقوم من مكانه:"طيب هشوف عند دكتور تانى."

ساره:"يا أمجد إنت بتقول إيه؟"

أمجد بضيق:"إنتى تخرصى خالص ، يلا إمشى قدامى."

مسكها من دراعها جامد وخرج من المستشفى...ركبها العربيه غصب عنها وإتحرك..

ساره بدموع:"إنت ليه بتعمل كده؟ أنا ذنبى إيه؟ إبنى ذنبه إيه؟"

أمجد بعصبيه:"إخرصى خالص ، الطفل ده مش هيفضل فى بطنك يوم واحد."

ساره بعدم إستيعاب:"بس إنت كان حلم عمرك تبقى أب."

أمجد وهو بيبصلها بعيون كلها شر:"كان ، يعنى من زمان ، دلوقتى خلاص مابقتش عايز."

ساره برجاء مع دموع:"عشان خاطرى يا أمجد ، نفسى أفرح بيه ده إبنى إللى أنا بحلم بيه من يوم ما اتجوزنا."

إتفاجأت لما لقته فرمل العربيه....

أمجد بعدم إستيعاب:" هو إنتى عايزاه بجد؟!!"

ساره:"أنا كنت بتعالج عشان ربنا يرزقنا بطفل."

أمجد:"وهو انا طلبت منك تروحى تتعالجى؟ أنا عارف إنك كنتى بتتعالجى ، كنت بتمنى إنك ماتحمليش ، أنا قولتلك مليون مره أنا مش عايز غيرك."

ساره:"عشان خاطرى إسمعنى ، ده هيكون إبننا يعنى الحاجه إللى إحنا بنتمناها من زمان أنا ماصدقت إن......."

أمجد برجاء وهو بيقاطعها وبيبص فى عيونها:"عشان خاطرى أنا يا ساره ، إسمعى كلامى."

ساره:"طب ممكن نتفاهم ياحبيبى نوصل لحل."

أمجد بجمود:"من غير تفاهم ، يا أنا يا هو."

ساره بعدم إستيعاب:"إنت بتقول إيه؟"

أمجد بجمود:"زى ماسمعتى يا أنا يا الطفل ده."

ساره:"الطفل ده يبقى إبنك ، إنت إزاى تتكلم كده؟"

أمجد:"مش عايزه لازم تجهضيه."

ساره:"ماينفعش انا مش موافقه ، ده إبنى انا مش هقتل إبنى إنت بتقول إيه!!."

أمجد:"مش بمزاجك."

إتحرك بالعربيه وبدأ يعمل مكالمه...

أمجد:"ألو ، كنت عايز دكتور يعمل عملية إجهاض بسرعه."

قفل المكالمه وركز فى السواقه ،، وهى كانت قاعده جنبه وبتعيط...بس إتصدم لما سمعها...

ساره بشرود:"أنا إختارته هو... مش إنت ،نزلنى."

وقف العربيه فجأه ومتكلمش...نزلت من العربيه وهى بتعيط فى صمت بس وقفها صوته...

أمجد بجمود وهو مش بيبصلها:"إنتى إللى إختارتى ياساره خليكى فاكره ده كويس."