في عنق جبران قلادة

الخرزة التاسعة

الکاتبة : أساور الياسري 🖤

***********

شلون لو شوگي ندهني
ومالگيتك ؟
باچر اتحاسب على شگد
زعليتك
باچر اشتاگ لأذيتك😞💔

************
مروان ..

راح ارجع بيكم ل٣ ايام ليورة بس ما راح ادوخكم واشرح هواي راح اشرح شرح مختصر عن الي صار ..

بعد ما خابرت جبران من شفتهم راجعين وعرفتهم رايحين لوسام كلبي دك بخوف لا يكون كاله انو وسام رضت عالطلب ..

حركت سيارتي وتوجهت للبيت وصلت ولكيت جدي كاعد بالحديقة ويفر بسبحته كلت اي اللله جابه خل اروح اكله حتى يلحك يكللهم ..

نزلت من السيارة ورحتله هو انتبه لوجودي بس ما رفع عينه عليه .. كلت ابدي كبل لان بس ابقى شوية ارجع اطمع وتحله بعيني السيارة الي راح تنسحب اكيد وابطل ما احجي ..

بدون حتى سلام كتله : شيخ اني جذبت عليك ..

بسرعة هو رفع راسه عليه وخزرني ولم سبحته بإيدة بعصبيه وكال وهو يقرب ويوكف كدامي : بشنووو ؟؟

كتله واني لاول مرة مااخاف من غضب جدي لان خوفي من غضب ربي وحوبة وسام وحوبة الطعن بالمحصنات اكبر : بسالفة بت عمي شمران واخلاقها .. ترة البنيه اشرف من الشرف وما عليهه لطخة وحدة تمس بالاخلاق .. وما جانت تجذب من اشتكت عليه لان اني صدك تحرشت بيها وتعرضتلها ..

ننطط عيونه بغضب وكالي ويريد يفهم الاهم من هذا كله : والكلته البارحة هم جذب لو هذا صدك ؟؟

كتله بثقة وعدم خوف: هم جذب .. لعب على عقلي الشيط.... قاطعني وهو يحرگ خدي براشدي ما تحركت او سويت شي لان استاهله ..

كال بفحييح : وحگ الي رفع السماوات ما اعديها الك واعاقبك عليها .. بس مو هسه .. والله لاطيح حضك على هاي العمله تانيني انت بس .. وتحسب حسابك رجعه لبغداد ماكو بعد دراستك هنا تكملها ..

دار وجهه واطاني ضهرة وصدرة يصعد وينزل من نفسه العالي

كتله واني ما مهتم بتهديدة : عمي شمران شفته رايح لبغداد .. بلعت ريكي وكتله بخوف من الرد .. درى بيه اني جنت ببغداد وو... ما كدرت اكمل خجلت من نفسي لان رضخت لمخططات جدي وسويت هيج عملة رخيصة ..

التفتلي وعلى شفته ابتسامة شر ورافع حاجبه : اي وكتله ومن خابرتك هو يمي وسمع واقتنع .. تقرب عليه ورفعلي اصبعه بتهديد .. وما راح يسمع الي سمعته اني هسه أبد أبد تعرف شنو يعني أبد ..

تقرب عليه وكام يضرب على جبهتي بإصبعة السبابة ويكول .. يعني هذا الحجي تنسى ما يبقى هنا وهو يقوي ضرباته لجبهتي .. افتهمت

كتله واني ارجع ليورة : لا مااكدر عمي لازم يعرف انو بته ما عدها هيج سوالف ومتربية احسن تربية ..