في عنق جبران قلادة

الخرزة الثاني والثلاثون

السلام عليكم عيوناتي 🕊💙

الكاتبة : أساور الياسري 🖤

لا تضم حجيك لباجر خاف باجر
مايجيك الجلمة لذتها بوكتها.. ✨

************
وسام ..

طبعا ما ضربني أنس راشدي جانت صدمة بالنسبة الي كولش جبيرة لسببين اولا بحياتي اني محد ماد ايده عليه وضاربني هاي اول مرة وثاني شي من منو من انس الي اعتبرة هو كولشي بحياتي توقعته يعصب من الموضوع لكن ما تخيلته يمد ايدة عليه ويضربني ..

وعلواه عالراشدي الي انصدمت منه حاولت انو اتغاضى عن الراشدي واعتبرة ردة فعل قوية منه وكمت اسوي غدة لبابا واني كل املي بجبران انو يحل الموضوع وي أنس ويخلص هذا كله ويصير سوالف وانصدمت بأنس جايني مثل المخبل لزمني من شعري وبعدهه كمت مااعرف منين تجيني الضربات ..

بالرغم من انو اخوية الي ضاربني وكلهم وكفوا بوجهه وطلعوني من ايدة وكامو يحجون علي بس اني حسيت نفسي ذليلة حسيت نفسي مكسورة حسيت هاي حمايتهم الي شفقة حسيت نفسي صدوك يتيمه ومالي ظهر وسند بالدنيا ..

اخذني للغرفة واني ما يتردد بكلبي وعلى لساني بهمس بس اسم جبران يجي يخلصني من هذا كله وهو مدري وين مختفي من البارحه اتصل علي ما يرد انوب فوك الي اني بي وجسمي ما اكدر احركة احسه كله خدران من الضرب كلبي مقبوظ على جبران لان ما موجود وخايفه علي ..

للعصر همين نايمه وبدون اي سبب هم اجه انس ونهاني بالضرب اكثر من مساع اذا اكلكم جسمي مات من الضرب حتى ايدي مابيه ارفعها بعد حتى بجي ما اكدر ابجي حاضنه بيبي وابجي ودخل جدو طلب نبقى وحدنا بالغرفة احس كلبي انعصر بخوف مااعرف ليش ..

والصدمة والدهشة وهوا شغلات ما اعرف اوصفهن صارن من طلع موبايله وسمعني التسجيل وكلامه وي جبران عن القتل مدري شنو وجبران ما نكر بالعكس اكد الموضوع علي بأنو ما يهمه ..

احس الهوى انكطع عني وبعد ما اشوف كدامي ماعرف يعني ماعرفت شأسوي حسيت جسمي كله تصلب وعضلات وجهي كلهه تقلصت واطراف ايدة تعكمشت وبعدها ما حسيت بشي ..

وعيت على نفسي لكيت نفسي على نفس الوضعية مال الضهر يمكن سحبت كل اوكسجين الغرفة بإرتياح انو كل الي صار حلم يعني كلام جدو عن جبران وضرب أنس الي مرة ثانيه هذا كله جان حلم لان نفس الوضعية نايمين اني وبيبي بالغرفه بس ..

عدلت نومة بيبي وغطيتهه ودورت موبايلي اتصل على جبران بالي يمه ما لكيته كلت خاف البنات شايلاته رحت للحمام اغسل وجهي احس وجهي مشخط تشخط وشفتي مورمه باوعت للمراية ..

وهنا جانت الصدمه من شفت وجهي الي ضايعه تفاصيلة من اثار الضرب والزراك الي صاير بي وشعري المكفوش شنو يعني يعني الجان مساع مو حلم لان من ضربني الضهر شفت وجهي مو هالكد بي اثار ..