في عنق جبران قلادة

الخرزة الثلاثون

السلام عليكم يبا 🕊💙

الكاتبة : أساور الياسري 🖤

حلوة اقروها 🙈😭

اول يوم ...
مثل كل حرمه حاچتني وگلت صدفه
ثاني يوم ...
بديت احچي و كلامي وياها بي لهفه
ثالث يوم ...
گمت اشتاگ للكلمات من عدها
رابع يوم ...
دققت بـ اقل تفصيله شالتها
احسبت خرزات معضدها
خامس يوم ...
بديت اتعلق و ما چنت ابينلها
ومشت الايام بيه و ما محسبلها
و صارت اقرب من الدگه الـ بصدري
و بداية يومي بس منها ..
صباح الخير يا عمري
ونهاية يومي بس من ايدها بشَعري
وهسه اتندمت ع العُمر ذاك الراح
-الخلص كله بس ابيش ما ادري 💙

****************
مروان ..

طلعت اركض عسى ولعل الحك علي قبل لا يسافر تأكدت من سويجي بجيبي ورحت اركض لسيارتي لفت انتباهي جياد كاعد بالحديقة بالكاع ويبجي ..

دك كلبي بخوف ورحتله اركض واحس جسمي يرجف لان ما معقولة يبجي على شي عادي وصلت يمته وكوة طلعت الكلمة مني من الخوف : جياد شكو ليش تبجي ؟

رفع راسه عليه والدموع ماليه وجهه والحزن ماحي ملامحه وكال كوة ينسمع صوته من الغصه والخنكة البي : انكسر ضهرنا راح اخونا .. مااات .. وضرب راسه بإيدة بقوة وانهار بالبجي

حسيت شي وكبس على صدري من كلامه شيقصد يعني الولد كلهم هنا ما بيهم شي بس جبران ما موجود .. اريد احجي اريد الكملة تطلع ماكو ..

رجفت رجليه ووكعت بالكاع ونفسي ضاگ وكمت ما اكدر اتنفس وكلبي يريد يطلع من مكانه واني اشوف جياد شلون منكسر ومدنك راسه ويبجي بحرگة ..

كوة طلعت الكلمة واني ما مصدك مستحيل جبران يعوفني ويموت : منو كال ؟؟

عبالك باله مو يمي ولا حجى وياي وراها مباشرة دك تلفونه بإسم " حزام ضهري " عرفته جبران دك كلبي بفرحة وسحبته بسرعه وكلت : الو جبران وين انت ؟ انت بخي..

قاطعة نفس صوت البنيه الي حجت وي جياد متفاجأة عبالهه ما سمعهه مساع : اسفة اخي مساع انقطع الاتصال واعتقد ما سمعتني يأسفني اكولك صاحب هذا الجهاز انطاكم عمرة أثر حادث سير بلا زحمة عليكم ممكن تجون علمود تستلمون الجثه مستشفى ال.... على طريق .... والبقية بحياتكم ..

انقطع عندي السمع والاحساس والرؤية وكلشي من بعد كلمة انطاكم عمرة بعد وراها كلشي ما سمعت منها حسيت وي الكلمة كلبي وكف وغيرة كلشي ما حسيت بعد ..

استنكرت وضع جياد وهو يبجي ويباوعلي بيأس من شاف جمود وجهي جان عنده أمل انو يكون سمع غلط .. كل الي ببالي انو مستحيل جبران يعوفنه ويروح ويخلينا كلنه مثل جياد هيج نبجي ومكسورين وهو يتخبل ولا توكع دمعة واحد بينا ..

كمت وكفت على حيلي وخليت موبايل جياد بجيبي وكومته وهو يبجي رفع راسه كال : وين ماخذني ؟