في عنق جبران قلادة

الخرزة العاشرة_ القسم الثاني

********

زينب ..

بعدني كاعدة بغرفتي ورفضت اطلع عليهم بقت امي تصييح وطلعت .. كلبي يدك سريع من الخوف وبابا لهسه ماكو ..

اجه خالي وبدو يحجون واني كاعدة بوقتها بغرفة حبوبتي حتى اسمعهم وبيان يمي خطيه شايله همي .. كلش قربني منها هذا الموضوع

جان عندي ثقة وامل بكلام بابا بأنو هو ما راح يجبرني لكن تحطمت امالي وتوقف عندي الزمن والرجفة تملكت جسمي كله من سمعت صوت جراح ينهي عليه بعد خاف بيها امل اخلص من غيث جراح مستحيل لان نهة عليه ..

التفتت لبيان ونزلت دموعي هي اجتي بسرعة لزمتني من اكتافي لان الرجفه واضحه عليه ..

بقة النقاش بينهم حااد وزادها عليه اصرار أنس انو تخذ جراح حسيت نفسي لعبة يديرونها بيناتهم بكيفهم .. لمن سمعت صوت بابا وكسيت كلبي زادت رجفته وي صوت بابا ..

وصار عندي من كال اسألهه وفرحت والتفتت على بيان حضنتهه بفرح وفرحني اكثر كلام جدي من كال ما تاخذ جراح بس ماادري ليش رغم فرحتي احس كلبي مقبوض ..

بابا كام يصيح على جدو .. وبهاللحضة دك تلفوني هو جان بإيدي رفعته بلهفة وشفت المتصل محمد .. باوعت لبيان كالتلي : بسرعة روحي للبستان حاجي لا تحاجينه هنا لا يجي احد ..

اخذته ورحت بسرعة للبستان ووكفت ورة وحدة من الشجر وفتحت خط .. غليت التلفون على اذني هو رأسا كال : ها عمري كتصله عليه اسف والله جنت بالمحاضرة ..

اني سمعت صوته لو اني كلبتهه نحيب وبجي احس انو هاي اخر مرة احجي وياه ماادري ليش لان حتلو ماتخذ جراح ما يخلوني اخذه ..

هو كال بخوف : زنوبة حبيبتي شبيج تبجين يعيوني .. اني بس ابجي عاط بيه بصوت عالي .. زينب كلبي راح يوكف شبيج تبجين بيج شي يرويحتي يعمري انتي بس سكتي وفهميني شكو ؟؟

كمت احجي واني اناشغ : محمد راح يفرقونه فدوة لا تخليهم ياخذوني منك ..

حسته تخبل وفقد اعصابه كال بعصبيه : شنو زينب شجاي تكولين من ياخذج مني احجي مسحي دموعج واحجي لا تسودنيني هو اني مسودن ..

كتله واني ما زلت ابجي : اليوم الصبح امي كالت غيث ابن خالج يريدج وجايين يخطبونج اله اني كمت ابجي وبابا كال والله ما تصيرين اله وانتي ماراضيه .. بس هسه وكمت ابجي ما كدرت اكمل

محمد تخبل : وهسه شنو احجي زينب لا تخبليني ....

كتله : محمد مو وكت الحجي .. فدووة الحك انوب فوك غييث جراح نهى عليه والله اموت اذا صرت لغيرك ..

سمعته كال بعصبيييه : شنووووووو جرااح نههههة عليج زينب شجاي تخرفي...... ،، ما سمعت الباقي لان التلفون انسحب من ايدي وانسحبت روحي ويا واني اشوف جدي يسحبه مني ويخلي على اذنه ويأشرلي بأصبعه على حلكه بمعنى سكتي ..