في عنق جبران قلادة

الخرزة الرابعة والثلاثون

السلام عليكم آشكماتي 🙈♥️

الكاتبة : أساور الياسري 🖤

#منـو عنـده ملـح بـي خيـر
هـذآ يفشـل #العنـدي
اشو كلما #تظوگه النـاس
تنسه وتنگلب #ضدي،💔
************
وسام ..

حسيت نفسي جاي اسمع غلط او اكو شي غلط اكيد كتله بعدم فهم : شنننو ؟؟

كال بابا بهدوء : بدون شنو ولد اسمه صديق اخوج بالكلية اسمه كرار وشايفج ورايدج واحنا نعرفه خوش ولد والله ممكنه وما ناقصة شي ويريد يعقد باجر لان عگب باجر يريد ياخذ امه للخارج يعالجها وحتى من يرجع رأسأ تتزوجون وتلحكين تجهزين نفسح بفترة سفرة ..

اخذت كلامه بإستهزاء ولعب وكتله بهدوء : وشنو منتضر مني اكولك موافقة ..

كال بحده : ومنو كالج منتضر منج رد الولد انطيته كلمة اني وباجر يجي ويجيب السيد ويعقد عليج وانتهى الموضوع ..

ردت اتخبل من كل عقله يحجي كتله بصدمة : بابا من كل عقلك تحجي تريد تزوجني غصب عني ومن شخص لا اعرفه ولا حتى شايفته ..

كال مروان بهدوء : عندي صورته اذا تريدين اشوفجياه ..

هستوني ردت احجي واكله اني وين وانت وين وسمعنا صوت ناصي يكاد ما ينسمع بس بسبب الهدوء سمعناه التفتت ماكو احد ما اهتميت والتفتت على بابا الي شفته كام يتلفت عالولد وارتبك ..

كتله بهدوء واحاول اسيطر على اعصابي : بابا فدوة اني ما اريد اتزوج وانت ما تكدر تجبرني لان هاي حياة مو يوم او يومين واتحملهن وي شخص ما اعرفه ..

كال عمو الي اول مرة يحجي : بابا احنا نعرف مصلحتج واحنا ما دايميلج ولازم نأمنج ببيت رجلج اخواتج كلهن امناهن ببيوت رجولتهن ونريد نخليج ببيتج حتى من نموت نكون مرتاحين يعني ذاك اليوم كسرتي خاطرنا ورفضتي ابن عمج وهسه هم ترفضين سمعنالج ذيج المرة وما جبرناج بس هالمرة ما راح نسمعلج ..

حسيت خنكتني العبرة واني اتذكر شلون رفضت جبران والندم ينهش بيه نهش نزلت راسي بندم و كتله بغصة وماادري شلون طلعت مني : وليش سمعتولي من رفضته وخليته يروح من وراي !! ونزلت دمعتي ..

انتبهت لنفسي وارتبكت بلعت ريكي بصعوبة ورفعت راسي عليهم شفتهم يباوعولي وبابا رافعلي حاجبه ومروان مبتسم بهدوء ومدنك ..

استغربت وضعهم بس حاولت اتجاهله والتفتت على عمو خالد وكتله برجاء : عمو فدوة والله مستعدة ما اتزوج بحياتي بس لتجبروني هالمرة فدوة عمو ..

صاح بيه بابا بعصبيه : كتلج مو بكيفج وباجر تعقدين وانتي ساكته مو هالطولج وممشيتنه على كيفج هذا اريدة وذاك لا ..

عصبيته وفكرة ارتباطي بشخص غير جبران فقدتني عقلي واعصابي كتله بعياط واني احس نفسي اريد انفجر : مو من حققققك تجبرني اني انسانه بالغه هسه ومن حقي من يسألني السيد باجر اكوله اني رافضه ومموافقه ومااريد اتزوج مو بكيفكم تجبروني اذا هيج مستثقلين مني اكدر ارجع لبيتنه ببغداد واخلصكم مني ..