في عنق جبران قلادة

الخرزة الرابعة عشر

الكاتبة : أساور الياسري 🖤

حتى الچانن بيج أكرهن مشتاگلهن
گلبچ ذاك الينسى بسرعة ..
وعنادچ جنت الما جرعة
زيناتچ شيناتچ كلهن مشتاگلهن .♥️ء

أنس ..

اني بعد كلام جدي توجهت لغرفتي مقرر اطلع من البيت كله ولا ذلة جدي .. ردت الم هدومي بس خفت امي تشوفهن وتنهبط واني اريد شوية شوية يلا اكللهم انو اريد ادرس ببغداد او بالحله او بأي مكان اجذب عليهم ..

شوية وسمعت صياح ابوي طلعت اركض ما لحكت بس ع شخطة السيارة مالته وچياد هم ركب سيارته زطلع وراه سألت شكو كالو وسام طالعه من البيت وابوي متخبل خاف صايرلها شي ..

ما اهتميت للموضوع هي جبيرة وفاهمه وواعيه وتعرف شتسوي .. رحت دخلت للغرفه اخذت سويجي ومحفضتي وموبايلي واكو عندي فلوس مصمدهن من مصروف ابوي الي ينطينياه كل فترة ..

اخذتهن واريد اطلع ولاكتني امي ثايرة ومعصبة وهي اصلا من مساع معصبة لان جبران ضارب مازن بس صدمتني من دفعتني بعصبيه وكالت : شناقصك حتى تاخذ بيان المطلگة شلگيت بيها ..

كتلهه بصدمه : شنو .. شنو اخذهه منو كالج اريد اتزوجهه اصلا !!

كالت : هسه جدك كاللهه انس رايدج وهي ما صدكت راحت تركض لغرفتها فرحانه ..

ما استوعبت الكالته امي رأسا عفتهه ورحت اريد اشوف جدي شلاعب من جديد واني رفضت ليش يروح يكل للبنيه مهما كان خطيه تنجرح مشاعرها من اكللها ما رايدج ..

رحت للحديقة الاماميه لكيته كاعد ويسبح ويباوع باللاهدف هيج مجرد يباوع ليكدام ..

رحت وكفت يمه كتله : شيخ شني سالفة بيان مو سديناها وكتلك راح اكل خرة واطلع من البيت بعد شمو تروح تكل للبنيه خطيه وتلعب بمشاعرها ..

كال بدون ما يباوعلي و ببرود قاتل : وليش العب بمشاعرها ع كولتك ؟

كتله : شنو شلون من راح اكللها انو اني ما رايدج وما اتزوجهه تنجرح مشاعرها بسببك ..

كمل ببرودة القاتل : ومنو كالك انت ما راح تاخذها .. والتفتت عليه وباوعلي بنضرة ما عرفت افسرها ..

كتلها بعصبيه وبديت افقد اعصابي : شنو يعني كل من عقلك تريد تغصبني لو اموت مااخليك تغصبني عليها .. ودرت وجهي ..

وكتله واني منطي ضهري واريد امشي : واني هسه رايحلهه حتى يجي الرفض منها ومااطلع بالفشله كدامهم .. ومشيت

بس وكفني وهو يكول : خوش اخذني وياك حتى اني هم اروح اكل لامك على ابوك المخذ عليها وجايب بته وياه الي هسه هو متخببل عليها شنو هايته بدون ما تكله ..

احس اطرافي كلها انشلت وما استوعبت ولساني انربط اريد بس اكله شنو يعني وشقصدك ما كدرت التفتتله لكيته واكف وراي مباشرة ..