يقين الصمت

البارت الأربع والاربعين

مساء الحب على جميع متابعين يقين الصمت
.
.
.
.
.
ركضت وراها .... ومن وصلت لباب القاعه .... شفت سياره حركت بسرعه  وهي صاعده بيها .... مشيت وراها واشرت بيدي بس بدون فايده .... السياره مشت بسرعه .... وصارت بعيده عليه .... كعدت على الرصيف وبجيت .... ليش ياربي ليش ... تحرمني منها بعد ما صارت قريبه وكدام عيوني ..... بقيت كاعده وانتبهت على نفسي من صوت الهورنات .... الي بدت تعلى من تصير السيارات قريبه مني .... وكفت على حيلي ومسحت دموعي ورجعت للقاعه .... وعيني على مكانها ...رحت وكعدت على نفس الكرسي .... حسيت عطرها بالمكان الي جانت كاعده بي ... سألت وحده كاعد قريب .... منها ..بس كالت ما أعرفها ... وغيرها وغيرها ...تقريبا اكثر الي كاعدات قريب منها ميعرفنها ....
رجعت لحيرتي ....ناديه شنو العلاقه الي بينج وبين جنه ... لو جابر يعرفها .... زين اذا وصلت لعزا جنه يعني علاقتها بيهم قويه ...لعد شلون روكان كال ما أعرفها .... اوووف ياربي شيصير لو كدرت احجي وياها واعرف جواب لهاي الاسئله الي راح تدمرني ....بقيت بالقاعه للمغرب ورجعت للبيت ... جان جابر وروكان......   موجودين واكو كم واحد كاعدين وياهم .... صعدت لغرفتي بدلت ملابسي ....
واني كاعد ابدل تذكرت طلب روكان .... بقيت محتاره ...اسوي الي طلبه مني وابقى منتظرته يصعد لو ألبس وأنزل لغرفة الولد وانام يمه بقيت محتاره ......
دزيتله مسج حتى اعرف انتظره بالغرفه لو انزل ..... ماجاوبني 
دزيتله مسج ثاني
بس ما رد عليه
بدلت ونزلت لغرفه الطفل ... أطمنت عليه ..ومن التعب حطيت رأسي على القنفه وغفيت ....

جابر .... رجعنه للبيت ورا ما خلص عزا الزلم .... وبعدنه كاعدين .... اجت رساله لروكان ..... قراها وضم جهازه ورجعت اجته رساله ثانيه
بساعتها تذكرت ذيج الحقيره ...الي دمرت حياة جنه .... واخذت رجلها منها ....واكيد هاي رسايل من طرفها وطار عقلي خاف هاي نهزمت من البيت وكاعده تراسله وخصوصا  اني ما اعرف اخبارها كل هاي الفتره
..نهضت على حيلي وماكو بدماغي غير شئ واحد هو لازم اخلص عليها واحرمها من الهوى مثل ما جنه نحرمت منه
طلعت .... حتى بدون ما أتعذر من الموجودين ... صعدت سيارتي ورحت عليها ... وبالطريق دكيت على الحارس حتى اطمن هي بعدها موجوده بنفس مكانها

سحر ..... كاعده مثل كل يوم ساعه امدد وساعه افتر بالبيت وارجع اكعد بنفس مكاني  وعلى هذا الحال يوميه .... صار الليل ورحت لفراشي حتى انام .... سمعت صوت الباب  نفتح ... كعدت على حيلي ...
ونفتح باب الغرفه واجه جابر عليه سحلني من شعري
.... ليش ليش اني شسويت

جابر ... انتي شمسويه لج انتي مجرمه

سحر ... الله يخليك على كيفك غير اعرف شنو ذنبي ...وليش مجرمه..والله اسأل هذا الحارس ابد ما اذيته ..ولا حجيت ويا

جابر  .. لج انتي قتلتي جنه وخليتيها تموت بحسرتها ..على زوجها وهي حاسه وعايشه الم خيانته الها ..لج انتي وحده قذره ما الها حق تعيش بعد